Zekaria 9:14 - Baibuli Ekibono kya Katonda 2014

¹⁴ Agho Musengwa Katonda alibonekera ghaigulu gh'abantu be, era yaalasa obusaale bwe bwaja ng'oti kumyansa kwa lukuba. Musengwa Katonda oyo alifuuwa eigwala, memale yaakumbira mu mpewo eyeezungulula n'amaani, eva ku luuyi olw'omukono omusaadha olw'e buvandhuba.

Zekaria 9:14 ပူးပေါင်းရင်းမြစ်များ

Yobu 37:9

Kiwunga ava ku luuyi olw'omukono omugooda olw'e buvandhuba, n'empewo eri benhogonhogo yaava ku luuyi olw'omukono omusaadha olw'e buvandhuba.

Zabbuli 18:14

Yaalasa obulaso bwe yaasansaania abazigu be; yaamyansa olukuba yaababingagho.

Zabbuli 18:15

Iwe Musengwa Katonda bwe wabakaabukira n'empiriito ey'omuuka ogw'omu nhindo yo n'ewulirwa, emisingi egy'ensi gyayerulwa, n'entobo y'enhandha yaaboneka.

Isaia 18:3

Mubakobe muti, ‘Imwe abantu mwenamwena abali mu nsi, mwekalirisenga mubone nga bendera esimbiibwa ku lusozi, era mutegenga kutu muwulire ng'eigwala lifuuye.’

Isaia 21:1

Buno n'obukwenda obugema ku Babiloni. Ng'empewo eyeezungulula n'amaani bw'eidha ng'ebitira mu kiketezo ekikalukalu eky'oku luuyi olw'omukono omusaadha olw'e buvandhuba, n'akabi katyo bwe kaliidha nga kava mu nsi etiisa.

Isaia 27:13

Ku lunaku olwo, eigwala lirivuga n'amaani, okweta Abaisiraeli boonaboona abaliba mu Assiria ni mu Misiri, baidha baasinza Musengwa Katonda ku lusozi olutukuvu mu Yerusalemu.

Isaia 30:30

Musengwa Katonda alireetera abantu boonaboona okuwulira amamiro ge ag'ekitiisa, n'okubona omukono gwe ogubonereza nga gwika. Ghalibaagho enimi edh'omuliro oguzikiriza buli kiri mu ngira yaagwo, era ghaabaagho okughemya n'okutyabuka kw'olukuba, ni kiwunga, n'amaadhi agalimu amabaale ag'omugozi.

Isaia 31:5

Ng'enhonhi bw'eghambaatira abaana baayo okubakuuma, ninze zeena Musengwa Katonda Afuga Amagye ntyo bwe ndidha okukuumanga Yerusalemu, nkirwanirirenga okukiwonia abazigu.”

Isaia 66:15

Bona, Musengwa Katonda aliidhira mu muliro ng'ali n'ebigaali eby'omu lutalo ebiziinhuuka ng'oti kiwunga, ng'aidha okwolesa obusungu bwe obubitirivu, n'okubonereza ng'akozesa enimi edh'omuliro.

Habakkuku 3:11

Endhuba n'omwezi byayemerera, olw'obutangaavu obwavanga mu bulaso bwo nga buziinhuuka, n'olw'okumesunkana okw'eifumo lyo erimyansa.

Habakkuku 3:14

Wafumita omuduumizi ow'abalwani be n'obulaso, ku lule lwe baidha okutusansaania nga bali ng'oti ni kiwunga ow'amaani, nga beesuuta ng'oti n'abaja okutuntuza abaavu aghazira kubakobaku naire.

Zekaria 12:8

Mu kiseera ekyo nze Musengwa Katonda ndikuuma abantu b'omu Yerusalemu, kyaba nti ole aliba nga n'asembayo kuba munafu mu abo, alifuuka wa maani ng'oti ni Daudi bwe yali. Era baidhukulu ba Daudi oyo n'abalibakulemberamu ng'oti ni malaika wa Musengwa Katonda, era ng'oti ni Katonda mwene.

Zekaria 14:3

Agho Musengwa Katonda alimala yaalumba amaghanga ago, yaagalwanisa ng'oti bwe yalwana mu ntalo edhaabita.

Zekaria 2:5

Musengwa Katonda akoba ati mwene n'aliba ekimante eky'omuliro okwezungulula ekibuga ng'akikuuma, era ati mwene n'aliba ekitiibwa ky'ekibuga ekyo.”

Matayo 24:31

Eigwala ery'amaani bwe lirifuuwa, alituma bamalaika be baasoloza abalonde be okuva mu mpewo eina, okuva eigulu ye liva okutuusa ye likoma.

Matayo 28:20

nga mubeegeresa okugema byonabyona bye nabalagira, era mwidhukire nga nze ndi n'imwe enaku dhoonadhoona okutuusa ku nkomerero ey'ensi.”

Ab'e Roma 15:19

mu maani ag'obumanhiso n'ebyewuunhio, ni mu maani aga Mwoyo Mutukuvu. Kale ntyo okuviira irala e Yerusalemu okutuukira irala mu Iluriko, nkobera abantu Amawulire Amalungi aga Kurisito.

Abaheburayi 2:4

Ni Katonda mwene yeena yaakakasa ebibono byaibwe ng'akola obumanhiso, n'ebyewuunhio, n'ebyewuninkiriza eby'endhawulo, era ng'agaba n'ebirabo bya Mwoyo Mutukuvu nga bwe yayendanga.

Yoshua 10:42

Yoshua n'abasaadha be, baaghangula mu lulwana lulala bakyabazinga abo boonaboona, era baabatoolaku ebiketezo byaibwe. Kuba Musengwa Katonda wa Isiraeli, yalwanirira Isiraeli.

Okwolekebwa 6:2

Naja okulinga nti, nga mbona embalaasi endheru. Eyali ali kugivuga ng'ali n'akalaso. Yaagheebwa engule aje ng'aghangula, era aghangule.