Zekaria 2:4 - Baibuli Ekibono kya Katonda 2014

⁴ Malaika eyasooka yaakoba ole owundi ati: “Lumuka oje, okobe omwisuka oyo ali n'olukoba olupima mu ngalo oti, mu Yerusalemu muja kubaamu abantu kamaala inho era nga bali n'ebyayo byaibwe kamaala. Kale nga tibasobola kuweera mu kibuga ekyo nga kyezungulwirwa ekimante.

Zekaria 2:4 ပူးပေါင်းရင်းမြစ်များ

Isaia 33:20

Mulingirire Sioni ekibuga kye tukulizaamu embaga edh'ebibinuko byaife ebyalagirwa. Mubone Yerusalemu nga bwe kirimu emiraala, kuba era ekyo n'ekifo ekibeekamu. Kiriba ng'oti ni weema ye batatoolagho, ng'enkondo dhaayo tidhisimbulwagho, waire emigugha gyayo okukutuka.

Isaia 44:26

Aye nkakasa ebyo omugheereza wange by'ayogera, naatuukiriza omukwenda wange oyo by'alangirira. Ekibuga Yerusalemu nkikakasa nga bwe kiidha okubangamu abantu, n'ebibuga bya Buyudaaya ebyayonoonebwa naabikakasa nga bwe birizimbibwa obuyaaka.

Isaia 49:20

Abantu bo abaazaalirwa mu bunhage balikukoba bati, ‘Ensi eno efuuse ntono inho, tekaatumala, tughe aghantu aghandi ghe tunaaba.’

Isaia 54:16

Bona, ninze ntonda omugheesi w'ebintu by'ekyuma, yaafuguta amanda ag'omuliro, yaagheesa eby'okulwanisa. Era ninze ntonda omwisirukale akozesa eby'okulwanisa ebyo okwita.

Yeremia 1:6

Nze naakoba nti: “Aa, Musengwa Katonda wange, bona eno, nze tiidhi kwogera kuba nkaali muto inho.”

Yeremia 31:24

Abantu baliba mu Buyudaaya ni mu bibuga byakyo byonabyona. Mulibaamu abalimi n'abaayi nga bali n'ebyayo byaibwe.

Yeremia 31:27

“Nze Musengwa Katonda nkoba nti ekiseera kiri kwidha, ndidhuze Isiraeli ni Buyudaaya abantu n'ensolo.

Yeremia 33:22

Ng'emuunienie edh'oku igulu bwedhitabalika, era ng'omusenho ku mbali kw'enhandha bwe gutapimika, zeena ntyo bwe ndireetera baidhukulu ba Daudi omugheereza wange, ni bakabona ab'omu kika kya Levi, okuba abangi einho.”

Ezekieli 38:11

ng'okoba mule oti, ‘Ndidha kuja numbe abantu ab'omu nsi eyo ey'ebibuga ebiteezungulwirwa bimante bigumu. Ndibagwaku nga bali mu miraala, nga bazira kye beekengeera naire, era nga bazira ntegeka yoonayoona ya kwekuuma.’

Danieli 1:17

Katonda yaagha abaisuka abo abana okwega n'okukuguka mu mpandiika edha buli nsambo, ni mu magezi aga buli nsambo. Ate Danieli yaamwongeraku okutegeera ebibaagho mu kubonekerwa, n'okuvuunula ebirooto.

Danieli 1:4

Abaisuka abo baali n'okuba nga baziraku kikyamu kyonakyona, nga baboneka bulungi, nga bali n'obukugu mu bye bakola, nga bagezi, nga beega mangu, era nga basobola okugheereza mu kisaagaati kya kyabazinga. Era baali n'okusomesebwa empandiika n'endhogera ey'olulimi Olubabilonia.

Mika 7:11

Abantu ab'e Yerusalemu, ekiseera kiidha kutuuka musobole okuzimba ekimante okwezunguluza ekibuga kyaimwe. Era agho Yerusalemu kija kugazigha ensalosalo dhaakyo.

Zekaria 1:16

Kale buti ndhize mu Yerusalemu n'okusaasira okungi. Eisinzizo lyange baja kwiramu okulizimba, ni Yerusalemu bakizimbe buyaaka.”

Zekaria 1:17

Malaika era yankoba okulangirira nti: “Musengwa Katonda Afuga Amagye akoba ati ebibuga bye biriiramu okuba obukalamu. Era akoba ati aliiramu okuyambanga Yerusalemu, yaakitwala ng'ekibuga ekikye ku bubwe.”

Zekaria 12:6

“Mu kiseera ekyo ndireetera ebika eby'omu Buyudaaya okuba ng'oti n'omuliro gwe bakunaaniiza mu mmungo y'enku, oba mu binhwa by'engaano. Birizikiriza amaghanga goonagoona agabyezungulwire agho. Aye abantu b'omu Yerusalemu balisigala nga ghazira kabi kabatuuseeku naire.

Zekaria 14:12

Musengwa Katonda alibonereza abantu b'amaghanga agalitanula olutalo ku Yerusalemu, ng'abasindikira endwaire embi einho: emibiri gyaibwe girivunda nga bakaatambula, amaiso gaibwe gaabavundira mu bighanga, n'enimi dhaibwe dhaabavundira mu kanwa.

1 Timotheo 4:12

Ole atakufuginkirizanga lwa buto bwo, aye oba nga kya kuboneraku eri abaikiriza, mu ndhogera, mu kwebisa, mu kugonza, mu kwikiriza, ni mu bwamufu.