Zefania 1:18 - Baibuli Ekibono kya Katonda 2014

¹⁸ Ku lunaku olwo Musengwa Katonda lw'aliragiraku obusungu bwe ezira kirisobola kubawonia, waire feeza ni zaabu waibwe yeenayeena. Obusungu bwe obuli ng'oti muliro, obuva ku nkikidi y'ali nayo ku lw'abantu be, buja kuzikiriza ensi yoonayoona. Aja kutuusa abantu boonaboona ababa ku nsi, ku nkomerero yaibwe eriba ya mangu inho ng'oti kutemya na kuzibula.

Zefania 1:18 ပူးပေါင်းရင်းမြစ်များ

Amainhama 6:7

Yaakoba ati: “Ndidha kusaaniagho omuntu ye natonda ave ku nsi, era nsaaniegho n'ensolo, n'ebyeghaluliza ku itaka, n'enhonhi, kuba neidhwisa ekyabintonza.”

1 Bakyabazinga 14:22

Abantu ab'omu Buyudaaya baakola ebibi ebisinga ebya badhaadha baibwe boonaboona bye baakola. Kale baaleetera Musengwa Katonda okuba n'enkikidi ku lwaibwe.

Yobu 21:30

Ku lunaku Katonda lw'asungughala n'abonereza, omubi buliidho n'awonagho.

Yobu 3:15

Nanditendwike ghalala n'abalangira abaidhuzanga endhu dhaibwe zaabu ni feeza.

Zabbuli 78:58

Basonsoonia Katonda baamusungughaza olw'ebifo byaibwe ebigulumivu bye baasinzizangamu era baamuleetera okuba n'enkikidi olw'ebifaananie ebibaadhe bye baasinzanga.

Zabbuli 79:5

Wo Musengwa Katonda, oja kutusungughalira kutuusa li? Byanda na byanda? Enkikidi y'oli nayo olw'abantu bo eneeyongera kwaka bwake ng'oti muliro?

Ensambo 11:4

Ku lunaku Katonda lw'alamuliraku abantu, okuba omukombe kizira kye kiyamba, aye obutuufu buwonia omuntu okufa.

Ensambo 18:11

Aye omukombe alowooza ati eby'obukombe by'aba nabyo n'ebimukuuma, era ati eby'obukombe ebyo n'ekimante ekigumu ekimwezungulwire okumuwonia abazigu.

Isaia 1:24

Kale ni Musengwa Katonda Afuga Amagye, Katonda oyo owa Isiraeli Aghanga Ebintu Byonabyona, akoba ati: “Ha, imwe abazigu bange ndidha kubamaliraku obusungu bwange, era mbeesasuulizeeku imwe abantakania.

Isaia 10:17

Musengwa Katonda oyo eitaala lya Isiraeli aliba omuliro, Katonda oyo Omutukuvu wa Isiraeli yaaba enimi edh'omuliro; ogulyokya ni gusaaniagho mu lunaku olulala, abo boonaboona abali ng'oti n'amawa n'enkandwa.

Isaia 10:3

Mulikola mutya ku lunaku Musengwa Katonda lw'alibabonerezaaku, n'abatuusaaku akabi akaliva mu nsi ey'eghala? Mulirumukira y'ani okubayamba? Era mulikweka gha obukombe bwaimwe?

Yeremia 7:20

Kale ni bona eno, obusungu bwange n'ekiruyi kyange ndidha kubimalira ku kifo kino, ni ku bantu, ni ku nsolo, ni ku miti, ni ku birime, ng'oti n'omuliro omuntu gw'atasobola kuzikiza.”

Yeremia 7:34

Mu bibuga bya Buyudaaya ni mu nguudo dha Yerusalemu, ndidha kulekeza emizira egy'abali mu binhumo ni mu kusagamba, ndekeze n'egy'abo abali mu mbaga edh'obugole kuba ensi eyo ya kufuuka bifulukwafulukwa omutaba bantu.”

Yeremia 9:11

Musengwa Katonda yankoba ati: “Ndidha kufuula ekibuga Yerusalemu kibe mmungo dha bifunfugu, era kibe ekifo omusula ebibe. Ebibuga by'omu Buyudaaya byonabyona bija kusigala bifulukwa byereere, ghabulegho omuntu abibaamu.”

Ezekieli 16:38

Ndikusalira omusango gwe basalira abakazi abafumbo abenzi era abatemo, naakugha ekibonerezo eky'okwitibwa, olw'obusungu n'enkikidi bye wandeetera okuba nabyo olw'obwenzi bwo.

Ezekieli 23:25

Olw'obusungu obundiku, ndibasindika baakukolaku baakumaliraku ekiruyi kyaibwe. Balikusalaku enhindo n'amatu, baita n'abaana bo. Bwenebwene balitwala batabane bo ni baghala bo baabookya omuliro.

Ezekieli 7:11

Ebikolwa eby'obukambwe byeyongeire, ekyo kyaleetera abantu okukola akabi ku bandi. Aye ku bye bali nabyo byonabyona ghazira kirisigalagho, ka bibe ebintu byaibwe ebingi, oba obukombe bwaibwe, oba ebitiibwa byaibwe.

Ezekieli 7:19

Balisuula ere feeza waibwe mu nguudo, baasuula n'ere zaabu waibwe ng'oti n'ekintu ekitagasa naire kuba feeza ni zaabu tibirisobola kubanunula ku lunaku Musengwa Katonda lw'aliragiraku obusungu bwe. Era tibirisobola kubaigusa mu kwegomba kwaibwe waire okubaigusa ni bibamalaku endhala okubaluma, kuba byene ebyo n'ebyabaleeteranga okwekontola ni bagwa mu kwonoona.

Ezekieli 7:5

Musengwa Katonda akoba ati: “Bona, akabi akomwidhirano kaidha kubaidhira nga kano kaba kaakamala okuvaagho, kabiri ng'akandi kaidha!

Zefania 1:11

Muwowoole inho imwe ababa mu kiketezo eky'eifo eky'ekibuga, kuba abasuubuzi baimwe boonaboona bawoiregho okufa.

Zefania 1:15

Olunaku olwo luja kuba lwa busungu, lwa bizibu, lwa kuzikirira era lwa bulumi. Luja kuba lunaku lwa kuzikirira na kusaanagho. Luja kuba lunaku lwa kivumbi era lwa kazigizigi, olwidhwire ebire n'enzikiiza agemye bedimudimu.

Zefania 2:2

nga mukaali kufuuyibwa ere na mpewo ng'oti bikaba. Mwenenie ng'obusungu bwa Musengwa Katonda obwokya ng'oti muliro bukaali kubaidhaku, era ng'olunaku lw'aja okulagiraku ekiruyi kye lukaali kutuuka.

Zefania 3:8

Musengwa Katonda akoba ati: “Kale ni muteegerere olunaku lwe ndyesimbagho okugha obudhulizi obulumiriza amaghanga ebibi bye gakola. Nsazeegho okusololeza aghalala amaghanga n'obwakyabazinga, mbamalireku ekiruyi kyange kyonakyona kuba obusungu bwange obuli ng'oti muliro, obuva ku nkikidi ye ndi nayo ku bantu bange, buja kuzikiriza ensi yoonayoona.

Matayo 16:26

Omuntu aganhulwamu ki okufuna ensi yoonayoona aye n'afiirwa obulamu bwe? Oba omuntu aghanga kughaayo ki okununula obulamu bwe?

1 Ab'e Korintho 10:22

Twenda kuleetera Katonda kuba wa nkikidi? Niife tumusinga amaani?

Amateeka Agokubiri 31:17

Olwo ndibasungughalira, naabalekulira agho era naabeegisaaku, baazikirizibwa. Ebizibu n'okudaazibwadaazibwa okungi biribaidhira. Olwo baategeera ng'ebyo byonabyona bibatuuseeku, lwa kuba nze Katonda waibwe tikaali ghalala nabo.