Zabbuli 77:18 - Baibuli Ekibono kya Katonda 2014

¹⁸ Olukuba lwo lwatyabuka mu kiwunga nga luvuga ng'oti nkede ya kigaali, okumyansa kwamulisa ensi yoonayoona, ensi yaatengeeta era yeesunda.

Zabbuli 77:18 ပူးပေါင်းရင်းမြစ်များ

2 Samueli 22:14

Musengwa Katonda yaatyabuka oti lukuba mu igulu, oyo Ali Ghaigulu Yeene yaayogera n'amamiro ge.

2 Samueli 22:8

Olwo ensi yaayuuga, yeesunda, emisingi egy'eigulu gyatengeeta era gyadhugumira; kuba agho Musengwa Katonda yali asungughaire.

Zabbuli 104:7

Bwe wagakaabukira gaalumukagho; bwegaawulira amamiro go ng'oli kutyabuka gaaswankukagho.

Zabbuli 18:14

Yaalasa obulaso bwe yaasansaania abazigu be; yaamyansa olukuba yaababingagho.

Zabbuli 18:15

Iwe Musengwa Katonda bwe wabakaabukira n'empiriito ey'omuuka ogw'omu nhindo yo n'ewulirwa, emisingi egy'ensi gyayerulwa, n'entobo y'enhandha yaaboneka.

Zabbuli 18:7

Olwo ensi yaayuuga yeesunda, emisingi egy'ensozi gyatengeeta era gyadhugumira; kuba agho Musengwa Katonda yali asungughaire.

Zabbuli 97:4

Olukuba lwe lumyansa lwamulisa ensi; ensi yaalubona yaatengeeta.

Okuvaayo 19:16

Olunaku olwokusatu ku nkyo ghaabaagho okutyabuka n'okumyansa okw'olukuba, n'ekire ekigemu kyaidha ku lusozi, era ghaabaagho n'okuvuga okw'endeka okw'amaani einho. Abantu boonaboona, nga bali mu weema dhaibwe, baatya inho baadhugumira.

Okuvaayo 19:18

Olusozi Sinai lwaidhula omwosi, kuba Musengwa Katonda yalwikaku ng'ali mu muliro. Era omwosi ogwaluvangaku okuja ghaigulu nga guli ng'oti n'oguva mu kifo aghookerwa ebiwumbe olusozi lwonalwona lwatengeeta bubi inho.

Habakkuku 3:4

Aidha kwidha ng'amyansa ng'oti lukuba; ng'okughemya okw'olukuba kuli kuva mu mukono gwe, omuli amaani ge.

Matayo 27:51

Agho olusuubo olw'omu isinzizo lwakanukamu ghabiri, okuva ghaigulu okutuuka ghansi ensi yeesuukunda, embaale dhaayatika.

Matayo 28:2

Ghaabaagho musisi ow'amaani kuba malaika wa Musengwa yaikirira okuva mu igulu, yaidha yaagalangula eibaale yaalitoolagho yaalityamaku.

Okwolekebwa 11:19

Eisinzizo lya Katonda ery'omu igulu lyaigulwagho n'Esanduuku ey'Endagaano ye, yaaboneka mu isinzizo omwo. Agho ghaabaagho okumyansa okw'eigulu, n'okududumuka, n'okutyabuka okw'olukuba, n'ensi okutengeeta, n'omugozi omungi.

Okwolekebwa 18:1

Ebyo bwe byawa, naabona malaika owundi ng'aika ng'ava mu igulu, ng'ali n'obuyinza obutaloodheka. Ekitiisa kye kyamulisa ensi yoonayoona.

Okwolekebwa 20:11

Agho naabona ekityamo eky'obwakyabazinga ekikologho, nga kyeru, era nga kiriku akityaimeku. Eigulu n'ensi byabulagho mu maiso ge obutairayo kubonekaku.

Abalamuzi 5:4

Wo Musengwa Katonda, bwe wava mu Seiri, n'ova mu kiketezo eky'e Edomu, ensi yatengeeta n'eigulu lyagwisa amaadhi. Bwenebwene amaadhi gaafukumuka okuva mu bire.