Zabbuli 115:14 - Baibuli Ekibono kya Katonda 2014

¹⁴ Nsaba Musengwa Katonda mwenamwena abaghe eizaire, imwe n'abaana baimwe.

Zabbuli 115:14 ပူးပေါင်းရင်းမြစ်များ

Amainhama 13:16

Ndidha kufuula baidhukulu bo okuba abangi ng'oti nkungu mu nsi kibe nti ole bw'alisobola okubala enkungu mu nsi, olwo ni baidhukulu bo boona baliba basobola okubalwa.

Amainhama 17:7

Era ndidha kutaagho endagaano yange n'iwe, era ni baidhukulu bo ab'omu nse dhoonadhoona edhiriiragho, ebenga ndagaano etawaagho. Ndidha kubanga Katonda wo, era Katonda wa baidhukulu bo.

2 Samueli 24:3

Yoabu yaamukoba ati: “Musengwa Katonda wo agwananga yaayongera ku bungi obw'abantu ba Isiraeli emikuzi kikumi okusinga bwe bali, era n'iwe Isebantu kyabazinga ekyo waakyeboneraku n'amaiso go. Aye Isebantu kyabazinga, eky'okubala abantu kikusanhukiza ki?”

Isaia 27:6

Mu biseera ebiri kwidha, Abaisiraeli baidhukulu ba Yakobo balisimba emizi ng'oti muti, baamulisa ekimuli, era baataaku ebibala ebiidhuza ensi.

Isaia 56:8

Musengwa Katonda, oyo asoloza abantu be Abaisiraeli abaabingibwa mu nsi yaibwe, akoba ati alisolozaayo n'abandi, boona baidha beeyongera ku abo abaamala eira okusolozebwa.

Yeremia 30:19

Abantu abakibaamu balyemba enhembo edh'okwebaza, baakuba emizira nga basagamba. Ndibagha enkabi beeyongera okuba abangi nga tibakendeera naire. Abantu balibaghanga ekitiibwa aghazira kunhoomebwa.

Yeremia 33:22

Ng'emuunienie edh'oku igulu bwedhitabalika, era ng'omusenho ku mbali kw'enhandha bwe gutapimika, zeena ntyo bwe ndireetera baidhukulu ba Daudi omugheereza wange, ni bakabona ab'omu kika kya Levi, okuba abangi einho.”

Hosea 1:10

Abaisiraeli baliba bangi inho ng'oti musenho gwa ku nhandha ogutasoboka kubalibwa oba okupimwa. Mperaano Katonda abakoba ati: “Timuli bantu bange,” aye ekiseera kirituuka yaabakoba ati: “Muli baana ba Katonda omulamu.”

Zekaria 10:8

Ndifuuwa akaleetu okweta abantu bange abo, naabasololeza ghalala; kuba ninze nabanunula. Era ndibaleetera okwiramu okwala, baaba kamaala nga bwe baalinga eira.

Ebikolwa by'Abatume 2:39

kuba ekisuubizo kya Katonda kyaimwe n'abaana baimwe, n'abo boonaboona abali eghala, boonaboona Musengwa Katonda waife oyo b'aba ng'ayese.”

Ebikolwa by'Abatume 3:25

Niimwe abaana ab'abalanzi era ab'endagaano Katonda ye yakola ni badhaadha baife ng'ekoba Aburahamu eti ‘Mu izaire lyo amaghanga goonagoona mwe galifunira enkabi.’

Amateeka Agokubiri 1:11

Neeghemba Musengwa Katonda oyo Katonda, Katonda wa badhaadha baimwe, ayongere okubafuula abangi emikuzi lukumi (1,000) okusinga bwe muli buti, era abaghe enkabi nga bweyabasuubiza.

Okwolekebwa 7:4

Agho naawulira omughendo gw'abo abaateebwaku akamanhiso: Baali emitwalo ikumi n'ena n'enkumi ina (144,000), abaava mu buli kika ky'abantu ba Isiraeli.

Okwolekebwa 7:9

Ebyo bwe byawa, naabona eikuukuubira ery'abantu abatabalika nga bava mu maghanga goonagoona, ni mu bika byonabyona, ni mu nse dh'abantu dhoonadhoona, ni mu nnimi dhoonadhoona. Baali nga beemereire gha mberi gh'ekityamo eky'obwakyabazinga, ni mu maiso ag'Entaama Ento, nga bavaire ebivaalo ebyeru era nga bagemye n'ensansa.