Yoshua 22:5 - Baibuli Ekibono kya Katonda 2014

⁵ Mwegenderezenga mulobe kuva ku mateeka n'ebiragiro Musa omugheereza wa Musengwa Katonda bye yabagha: okugonzanga Musengwa Katonda oyo Katonda waimwe okwebisanga nga mwene bw'ayenda okukuumanga ebiragiro bye obutamuvangaku era n'okumugheerezanga n'omwoyo omulala.”

Yoshua 22:5 ပူးပေါင်းရင်းမြစ်များ

Zabbuli 106:3

Beesiimye abo abakolera ku mazima, ni bakola ebituufu ekiseera kyonakyona.

Zabbuli 78:7

Memale olwo batenga obwesige bwaibwe mu Katonda, nga tibeerabira bye yakola, aye nga bagondera ebiragiro bye.

Okuvaayo 15:26

Musengwa Katonda yaabakoba ati: “Bwe muliba abawulize obulungi bwene, nga mukola ebyo ebituufu ye ndi, era nga mugondera amateeka gange n'ebiragiro, tija kubabonereza na bulwaire ku obwo bwe nasindikira Abamisiri. Kuba ninze Musengwa Katonda abawonia endwaire.”

Okuvaayo 20:6

Aye abantu enkumi n'enkumi abangonza, ni bagondera ebiragiro byange, mbooleka okugonza okutakoma.

Okuvaayo 23:13

“Mukuume ebiragiro ebyo byonabyona mulobe kubisobya. Mwerabirire irala emisambwa gyonagyona, era mutaganhanga maina gaagyo na kubabita mu kanwa.

Okuvaayo 23:25

Nze Musengwa Katonda wo, ninze y'obenga osinze, era nze ndidha kukughanga enkabi mu mere ni mu maadhi, era ntoolegho obulwaire obubadaaza.

Ensambo 4:23

Weekuumenga inho by'odhuuba mu mwoyo gwo, kuba obulamu bwo bufugibwa ebyo ebikuli ku mwoyo.

Isaia 55:2

Lwaki mumalira empiiya dhaimwe ku ebyo ebitali mere? Lwaki mufaabiikanira ebyo ebitabaigusa? Mumpulirise bukalamu kye nkoba, olwo musobole okulyanga ebyo ebisinga kuba birungi, era mubenga basangaavu.

Yeremia 12:16

Ate bwebalyega empisa dh'abantu bange n'omwoyo omulala, ni balayiranga mu liina lyange bati, ‘Nga Musengwa Katonda bw'ali omulamu,’ nga bwe baayegeresa abantu bange okulayiranga omusambwa Baali, olwo boona baliba bantu bange, n'ebintu biribajiiranga bukalamu.

Matayo 22:37

Yesu yaamukoba ati: “ ‘Ogonzanga Musengwa Katonda wo n'omutima gwo gwonagwona, n'omwoyo gwo gwonagwona, n'okutegeera kwo kwonakwona.’

Matayo 4:10

Agho Yesu yaamukoba ati: “Sitaani ja ere! Kuba kyaghandiikibwa kiti, ‘Osinzanga Musengwa Katonda wo, era ni yenka y'ogheerezanga.’ ”

Matayo 6:24

“Ghazira asobola kugheereza basengwa babiri kuba, oba alikyagha mulala yaayenda owundi, oba aligumira ku mulala yaasambaadha owundi. Timusobola kugheereza Katonda ate na bya bufuni.

Luka 1:74

Nga tumaze okununulwa mu mikono egy'abazigu baife, tumugheereze aghazira kutya

Yoanne 12:26

Kiisi ayenda okumpeereza annonerezenga. Ghe mba n'omugheereza wange gh'anaabanga. Era Lata alita oyo yeenayeena ampeereza mu kifo eky'ekitiisa.

Yoanne 14:15

“Oba nga mungonza, mugemenga ebiragiro byange.

Ebikolwa by'Abatume 11:23

Bwe yatuukayo n'abona Katonda bw'aghaire abantu abo enkabi, yaasangaala. Yaabakubiriza boonaboona bakalangukire ku Musengwa n'omwoyo mulala.

Ebikolwa by'Abatume 27:23

kuba obwire obwabise malaika wa Katonda wange ye mpeereza yayemereire ghe ndi

Ab'e Roma 1:9

Katonda n'omudhulizi nga bye nkoba bituufu, kuba oyo ye mpeereza n'omwoyo gwange gwonagwona nga nkobera abantu Amawulire Amalungi agagema ku Mwana we. Katonda oyo akiidhi nga buliidho mbaidhukira buli lwe nsaba,

Ab'e Roma 12:9

Okugonza kwaimwe kubenga kwa mazima, mulekenga kukola kibi, mukalangukirenga ku kikalamu.

Ab'e Roma 8:28

Twidhi nga mu buli kintu Katonda akola olw'obukalamu bw'abo abamugonza, era abaayetebwa nga bwe yayenda.

Amateeka Agokubiri 10:20

Mutyenga Musengwa Katonda waimwe, era yenka ye mube musinzenga. Mubenga beesigwa y'ali, era eriina lye lyonka, lye mube mulayirenga.

Amateeka Agokubiri 11:1

Musa yaakoba Abaisiraeli ati: “Mugonzenga Musengwa Katonda waimwe buliidho, era mutuukirizenga byonabyona by'ayenda mukole: amateeka ge, n'ebiragiro bye, n'okulamba kwe.

Amateeka Agokubiri 11:13

“Kale ni mufubenga okutuukiriza ebiragiro, bye mbaghaire olwaleero. Mugonzenga Musengwa Katonda waimwe, mumugheerezenga n'omutima gwaimwe gwonagwona, n'omwoyo gwaimwe gwonagwona.

Amateeka Agokubiri 11:22

“Mukuumenga amateeka ge mbateereiregho obutagavangaku, nga mugonza Musengwa Katonda waimwe, nga mujiira ku ebyo by'abalagira, era nga muba beesigwa y'ali.

Amateeka Agokubiri 13:4

Mujiirenga ku Musengwa Katonda waimwe by'abalagira, era mumutyenga. Mumuwulirenga era mukuumenga ebiragiro bye. Mumusinzenga era mubenga beesigwa y'ali

Amateeka Agokubiri 4:29

Aye nga muli eyo, mwidha kusabanga Musengwa Katonda waimwe. Era bwe munaamusabanga n'omutima gwaimwe gwonagwona era n'omwoyo gwaimwe gwonagwona, aidhanga kubawulira.

Amateeka Agokubiri 4:4

Aye imwe abaagumira ku Musengwa Katonda waimwe, mukaali balamu ni leero.

Amateeka Agokubiri 4:6

Mubikuumenga era mubituukirizenga, kuba ekyo n'ekinaayolekanga abantu abamaghanga agandi nga bwe muli n'amagezi n'okutegeera. Bwe banaawuliranga amateeka ago goonagoona, baidha kukobanga bati, ‘Bwenebwene eighanga lino eikologho, lya bantu bagezi era abategeevu!’

Amateeka Agokubiri 4:9

“Aye mwegenderezenga era mwekuumenga, mulobe kwerabiranga mu bulamu bwaimwe bwonabwona, ebyo imwe beene bye mweboneraku n'agaimwe. Mukoberenga abaana n'abaidhukulu

Amateeka Agokubiri 5:10

Aye ndholeka okugonza okutakoma eri abantu enkumi n'enkumi abangonza, ni bagondera ebiragiro byange.

Amateeka Agokubiri 6:17

Mwegenderezenga okukuuma ebiragiro n'amateeka n'okulamba, Musengwa Katonda waimwe bye yabagha.

Abaheburayi 12:15

Mwekuume ghalobe kubaagho afiirwa kisa kya Katonda, era ghalobe kubaagho bubi buva mu imwe ni butabulatabula era ni bwonoona bantu kamaala.

Yakobo 1:12

Omuntu agumira okulebwa wa nkabi, kuba bw'abita mu kugezesebwa okwo, aligheebwa obulamu ng'ekirabo Katonda kye yasuubiza abo abamugonza.

Yakobo 2:5

Aboluganda abagonzi, muwulire kino: Katonda yalonda abaavu ab'oku nsi kuno okuba abakombe mu kwikiriza, era n'okuba mu Bwakyabazinga bwe yasuubiza abo abamugonza.

Yoshua 23:8

Aye mubenga beesigwa eri Musengwa Katonda nga bwe mubairenga okutuusa ni mpegaano.

Okwolekebwa 15:3

Baayemba olwembo lwa Musa omugheereza wa Katonda, n'olwembo olw'Entaama Ento, nga bakoba bati: “Musengwa Katonda Aghanga Ebintu Byonabyona, by'okola bikologho era byewuunhisa! Kyabazinga ow'amaghanga goonagoona, by'okola bituufu era bya mazima.

1 Samueli 12:20

Samueli yaakoba abantu ati: “Mutatya. Waire mukoze ekibi ekyaga agho mutavanga ku Musengwa Katonda, aye mumugheerezenga n'omwoyo gwaimwe gwonagwona.

1 Samueli 12:24

Kale ni mwisenga mu Musengwa Katonda ekitiisa, mumugheerezenga nga muli beesigwa n'omwoyo gwaimwe gwonagwona, nga mwidhukira ebintu ebikologho by'abakoleire.

1 Samueli 7:3

Agho Samueli yaakoba Abaisiraeli boonaboona ati: “Oba nga mwenda okukyuka okwira ku Musengwa Katonda n'omwoyo gwaimwe gwonagwona, mutoolegho emisambwa egy'amaghanga agandi gyonagyona era mutoolegho n'ebifaananie eby'omusambwa omukazi Ashitarothi. Mwegheereyo irala eri Musengwa Katonda, yenka ye mube mugheereze. Aidha kubawonia Abafilisiti.”