Yoshua 11:20 - Baibuli Ekibono kya Katonda 2014

²⁰ Musengwa Katonda n'eyaleeteranga abantu abo, okukanaghala ni balwana n'Abaisiraeli. Olwo basalirwe omusango gubasinge, era bazikirizibwe aghazira kusaasirwa, nga Musengwa Katonda bwe yalagira Musa.

Yoshua 11:20 ပူးပေါင်းရင်းမြစ်များ

2 Samueli 17:14

Agho Abusalomu n'Abaisiraeli boonaboona baakoba bati: “Amagezi ga Hushai Omuaraki malungi okusinga aga Ahithofeli.” Musengwa Katonda yali asazeegho ng'aja kubaleetera balobe kukolera ku magezi amalungi Ahithofeli ge yagha, mu nsambo eyo aleete akabi ku Abusalomu.

1 Bakyabazinga 12:15

Kale atyo kyabazinga yaaloba kuwulirisa bantu. Musengwa Katonda n'eyaleetera ebintu okuja bityo, olwo atuukirize kye yakoba Yeroboamu mutabane wa Nebati ng'abita mu Ahiya ow'e Shilo.

2 Ebyomubyanda 22:7

Aye Musengwa Katonda yali amaze okutegeka ng'okuzikirira kwa Ahazia kuja kumwidhira lwa kukyalira Yoramu, kuba Ahazia oyo bwe yatuukayo, yaja ni Yoramu okubona Yehu mutabane wa Nimushi, Musengwa Katonda ye yali amaze okulonda nga n'ow'okuzikiriza ab'endhu ya Ahabu.

2 Ebyomubyanda 25:16

Aye yali akaayogera, kyabazinga yaamukoba ati: “Twakulonda li okuba omuwi ow'amagezi wa kyabazinga? Sirika, okutoolaku ng'oli kunoonia kukwita!” Omulanzi yaasirika, aye era ng'amaze okumukoba ati: “Ndidhi nga Katonda mumalirivu okukuzikiriza, kuba okoze ekyo era waaloba kuwulirisa magezi ge nkughaire.”

Okuvaayo 10:1

Agho Musengwa Katonda yaakoba Musa ati: “Ja ongire mu kisaagaati kya kyabazinga, kuba nkalangwisa omwoyo gwe n'egy'abakungu be, balobe kutya. Olwo mbakolemu ebyewuunhio babibone,

Okuvaayo 11:10

Musa ni Aaroni baakola ebyewuunhio bino byonabyona nga kyabazinga abona. Aye Musengwa Katonda yaaleetera kyabazinga oyo okukalanguka omwoyo, yaaloba kutya era yaaloba kuleka Baisiraeli kuva mu nsi ye.

Okuvaayo 14:17

Ndidha kukalangusa emyoyo egy'Abamisiri balobe kutya, boona bangire mu nhandha nga bababingirira, aye kye nja okukola kyabazinga n'abalwani be boonaboona, n'ebigaali bye eby'omu lutalo, n'abavuzi be ab'embalaasi, kija kumpeesa ekitiisa.

Okuvaayo 14:4

Mu kiseera n'ekirala ndidha kumukalangusa omwoyo alobe kutya, atoolere okubabinga ng'ayenda okubagema, aye kye nja okukola kyabazinga n'abalwani be kija kumpeesa ekitiisa, era Abamisiri balimanha nga ninze Musengwa Katonda.” Abaisiraeli baakola nga Musengwa Katonda bweyabakoba.

Okuvaayo 14:8

Musengwa Katonda yaakalangusa omwoyo gwa kyabazinga ow'e Misiri yaaloba kutya, yaatoolera okubinga ng'ayenda okugema Abaisiraeli abaali bali kutambula nga ghazira kye batya.

Okuvaayo 4:21

Era Musengwa Katonda yaakoba Musa ati: “Bw'otuuka e Misiri bona nti okolera mu maiso ga kyabazinga ebyewuunhio byonabyona nga bwendi kukugha obukumu okubikola, aye nja kukalangusa omwoyo gwe alobe kutya, era alobe kuleka bantu bange kuvaayo.

Okuvaayo 9:12

Aye era Musengwa Katonda yaaleetera kyabazinga okukalanguka omwoyo, yaaloba kutya era yaaloba kuwulira nga Musengwa Katonda bweyali amaze okukobera Musa.

Okuvaayo 9:16

Aye ekyakulesaagho ng'oli mulamu lwa kwenda nkwoleke amaani gange, eriina lyange lisaakibwe mu nsi yoonayoona.

Isaia 14:24

Musengwa Katonda Afuga Amagye yeerayiriire ati: “Bwenebwene nga bwe ntegeike okukola, era bwe kiidha okuba; nga bwe nsazeegho, era bwe kiidha okukolebwa.

Isaia 34:2

Musengwa Katonda asungughaliire amaghanga goonagoona, yaasungughalira n'amagye gaago goonagoona, era yaagaghaayo y'abazigu bagazikirize goonagoona.

Ab'e Roma 9:18

Kale ni Katonda asaasira oyo y'aba ayenze okusaasira era yaakalangusa omwoyo gw'oyo y'aba ayenze okukalangusa.

Amateeka Agokubiri 2:30

“Aye kyabazinga w'e Heshiboni, ayetebwa Sihoni, yaaloba kutuganha kubita mu nsi ye, kuba Musengwa Katonda waimwe yamukalangusa omwoyo. Yaamuleetera okudheema, olwo tughange okumughangula, n'okutwala ensi ye, mwe tukaali ni mpegaano.

Amateeka Agokubiri 7:16

Muzikirizenga amaghanga goonagoona Musengwa Katonda waimwe g'anaabatanga mu ngalo, era mutagagemerwanga kivunika. Mutasinzanga bakatonda baago, kuba ekyo kisobola okubafuukira imwe omutego.

Abalamuzi 14:4

Aye ise n'inhina baali tibaidhi nga Musengwa Katonda n'eyasindika Samusoni okukola ekyo kuba Musengwa Katonda oyo yali ali kunoonia ensonga ey'okuvaaku okulwanisa Abafilisiti. Mu biseera ebyo, Abafilisiti n'abaafuganga Isiraeli.

1 Samueli 2:25

Omuntu bw'asobya ye muntu mwine, Katonda amutabagania n'omuntu oyo, aye omuntu bw'asobya ye Musengwa Katonda, naani asobola okumuwolereza?” Aye tibaawulirisa iseibwe bye yabakoba kuba Musengwa Katonda yali amaze okusalagho okubaita.