Yeremia 9:15 - Baibuli Ekibono kya Katonda 2014

¹⁵ N'olw'ekyo, nze Musengwa Katonda Afuga Amagye, Katonda wa Isiraeli, kyenva ni nkoba nti: Bona eno, ndidha kubagha olubiriizi balulye lubakaayire, mbaghe n'amaadhi agalimu eirogo baganhwe.

Yeremia 9:15 ပူးပေါင်းရင်းမြစ်များ

Zabbuli 60:3

Abantu bo obaleeteire obuzibu obukalangufu; otughaire omwenge ogw'emizabbibu okunhwa, gwatugaaliisa ng'oti batamiivu.

Zabbuli 69:21

Endhala bwe yaanuma, mu kifo eky'okumpa emere enkalamu, bampa eri ng'oti butwa; endiwo yaanuma bampa omwenge endoota.

Zabbuli 75:8

Katonda agemereire mu ngalo ekikopo eky'omwenge ogw'emizabbibu omuka ogw'obusungu bwe. Aja kugufukira ababi ab'oku nsi boonaboona, bagunhwe gwonagwona okutuuka ni ku iseedha.

Zabbuli 80:5

Mu kifo ky'emere otuleetera nnaku, mu kifo ky'amaadhi otugha kikopo kiidhuvu eky'amaziga.

Isaia 2:17

Okwekuluntaza okuli mu bantu kulimalibwagho, n'okwegulumiza kwaibwe kwasaanizibwagho. Ku olwo Musengwa Katonda yenka n'aligulumizibwa.

Isaia 2:22

Muve ku kwesiganga abantu, kuba, okutoolaku omuuka ogw'omu nhindo gwe bagheera, kiki ekindi eky'omughendo kye bali nakyo?

Yeremia 23:15

“Agho ni, nze Musengwa Katonda Afuga Amagye, nkoba abalanzi b'omu Yerusalemu nti: ‘Mubone eno, ndidha kubagha olubiriizi balulye lubakaayire, mbaghe n'amaadhi agalimu eirogo baganhwe; kuba baleeteire abantu boonaboona mu nsi eno obutatya Katonda.’

Yeremia 24:10

Ndibaleetera entalo era naabasindikira endhala n'endwaire ya kawumpuli, okutuusa lwe balizikirira ni bawaagho mu nsi ye nabagha beene ni badhaadha baibwe.”

Yeremia 25:15

Agho Musengwa Katonda, Katonda wa Isiraeli yankoba ati: “Toola ekikopo kye ngemye mu ngalo dhange eky'omwenge ogw'emizabbibu ogw'obusungu bwange. Okitwale okighe amaghanga goonagoona ye nnaakutuma, bakinhweku.

Yeremia 44:27

Ndibatuusaaku okuzikirira, mu kifo ky'okubaleetera ebintu okubajiiranga obukalamu. Mwenamwena mulifa, ng'abandi bafiira mu ntalo ate abandi baafa endhala, okutuusa nga mwenamwena muweekereiregho.

Yeremia 49:37

Ndireetera abantu ab'e Elamu okutya abazigu baibwe abenda okubaita. Mu busungu bwange obubitirivu, ndibatuusaaku akabi nga mbasindikira entalo edhiribaita okutuusa lwe ndibasaaniagho.

Yeremia 8:14

Agho abantu ba Musengwa Katonda baakoba bati: “Lwaki tutyaime bwa ghano? Mukole twesoloze, tuje mu bibuga ebyezungulwirwa ebimante ebigumu tufiire eyo. Musengwa Katonda waife atughaireyo tufe. Atughaire amaadhi agalimu eirogo tunhwe, olw'okuba twakola ebibi twamusungughaza.

Okulira 3:15

Yandeetera okudaagadaaga okutaloodheka, kwankaayirira ng'oti n'omuntu ye bakaka ebikaagha.

Okulira 3:19

Bwe ndidhukira okudaazibwadaazibwa kwange n'okutambulatambula eyo ntyo ng'azira waibwe, mba ng'ali kunhwa eirogo erikaagha.

Ezekieli 5:12

Ndibaawulamu ebitundu bisatu: Abaliba mu kitundu ekisooka mulifa endwaire era mwalambuka endhala. Abaliba mu kitundu ekyokubiri muliitibwa mu ntalo edhiryezungulula ekibuga kyaimwe. Ate abaliba mu kitundu ekyokusatu ndibasansaaniza ku ndhuyi dhoonadhoona, empewo yaabatwaliriza. Era ndisowolayo empiima mu kiruutu yaaja ng'ebabingirira.

Ezekieli 5:2

Ekitundu ekisooka oidha kukyokera mu kibuga ng'enaku edh'okuzingiza ekibuga ekyo dhiwoireku. Ekitundu ekyokubiri oidha kukigema mu ngalo oje ng'okisalasala n'empiima obukutukutu okwezunguluza ekibuga. Ate ekitundu ekyokusatu ekinaaba kisigairegho, oidha kukisansaaniza mu mpewo ekitwalirize. Nze mwene ndisowolayo empiima mu kiruutu yaaja ng'ebingirira enviiri dho.

Amateeka Agokubiri 28:36

“Musengwa Katonda aidha kubatwalanga mu ighanga erindi imwe ni badhaadha baimwe lye mutabangamuuku. Aidha kubatwalanga ghalala ni kyabazinga ye munaabanga nga mutairegho okubafuga. Mu ighanga eryo ye mulisinziza bakatonda abaabaadhibwa mu miti ni mu mabaale.

Amateeka Agokubiri 29:18

Mwekuumenga ghalobe kubaagho musaadha oba mukazi, oba maka, oba kika, mu bali ghano olwaleero, akyusa mwoyo gwe n'ava ku Musengwa Katonda waife, n'asinza bakatonda b'amaghanga gandi. Okukola ekyo kuba ng'oti n'omuzi ogusibuka ku kimera ekikaagha era eky'obutwa.

Okwolekebwa 8:11

Eriina ly'emuunienie eyo nga ni “Buka.” Ekitundu eky'amaadhi kirala ku buli bisatu gaafuuka maka, era abantu kamaala baafa olw'okunhwa amaadhi ago, kuba gaali maka.