Yeremia 7:23 - Baibuli Ekibono kya Katonda 2014

²³ Aye nabalagira kino nti, ‘Mumpulirenga, olwo nze ndidha kubanga Katonda waimwe, imwe mube bantu bange. Mujiirenga ku mateeka ge mbagha, olwo byonabyona biidha kubajiiranga bukalamu.’

Yeremia 7:23 ပူးပေါင်းရင်းမြစ်များ

Yobu 36:11

Bwe bawulira ni bamugheereza, bamalaku obulamu bwaibwe nga bafunie ebirungi kamaala, era nga basangaavu.

Zabbuli 119:3

era abatakola bibi, ni bajiira ku by'ayenda.

Zabbuli 40:6

Emisengo, n'ebigheebwayo tobyegomba, era tosabangaku bigheebwayo byokebwa byonabyona kuwaagho, waire ebigheebwayo olw'okusoniyisa ebibi. Aye nze wampa amatu okukuwuliranga.

Zabbuli 81:13

Kale ngoli abantu bange bampulira; kale ngoli Isiraeli ajiira ku bye mmukoba,

Okuvaayo 15:26

Musengwa Katonda yaabakoba ati: “Bwe muliba abawulize obulungi bwene, nga mukola ebyo ebituufu ye ndi, era nga mugondera amateeka gange n'ebiragiro, tija kubabonereza na bulwaire ku obwo bwe nasindikira Abamisiri. Kuba ninze Musengwa Katonda abawonia endwaire.”

Okuvaayo 16:32

Musa yaakoba ati: “Musengwa Katonda yatulagira tulekeghooku akaibo aka mannu, tukaterekere abaana n'abaidhukulu abaliiragho, babone ku mere Musengwa Katonda ye yatughanga nga tuli mu irungu, lwe yatutoola mu Misiri.”

Isaia 3:10

Mukobere abatuufu muti ebyaibwe birungi, kuba baidha kuganhulwanga mu biva mu kukola kwaibwe.

Yeremia 11:4

Endagaano eno nagikola ni badhaadha baibwe, bwe nabatoola mu nsi Misiri, ye baabanga ng'oti n'abali mu muliro ogw'amaani ogusaanuusa ekyuma ekigumu einho. Naabakoba okungonderanga n'okukolanga kiisi kye nalagira olwo babenga bantu bange, nze mbenga Katonda waibwe.

Yeremia 11:7

kuba bwe natoola badhaadha baibwe mu nsi Misiri, nabalabuliragho irala okumpuliranga. Era nkaabalabula ni ye buli eno aghazira kukoogha naire.

Yeremia 13:11

Ng'ekivaalo ky'omu nkende bwe kyegemera irala ku nkende y'omuntu, ntyo bwe nayenda n'abantu b'omu Isiraeli n'ab'omu Buyudaaya boonaboona baneegemereku irala. Olwo babenga bantu bange abaleetera eriina lyange okusaakibwa n'okutiibwa. Aye beene baaloba okungondera.”

Yeremia 22:21

Musengwa Katonda yayogera n'imwe ng'ebintu bikaabajiira bukalamu, aye mwaloba kuwulirisa. Era mutyo bwe mubaire mukolanga buliidho, mwalobera irala okugondera by'akoba.

Yeremia 22:3

Musengwa Katonda oyo akoba ati mukolenga amazima n'ebituufu. Omuntu ye batuntuza mumuwonienga ole amutuntuza. Era mutakolanga kibi kyonakyona oba ekikolwa eky'obukambwe ku basenze, oba bamulekwa, oba banamwandu, oba okwitanga abantu abaziraku musango mu ighanga lino.

Yeremia 24:7

Ndidha kubaleeteranga okuumanha nga ninze Musengwa Katonda. Olwo beene babenga bantu bange, ate nze mbenga Katonda waibwe, kuba baja kukyuka baire ye ndi n'omwoyo gwaibwe gwonagwona.

Yeremia 31:33

Ekiseera ekyo bwe kirituuka, eno n'endagaano ye ndikola n'Abaisiraeli: Ndibataamu amateeka gange, naagaghandiika ku myoyo gyaibwe. Nze ndiba Katonda waibwe, beene baaba bantu bange.

Yeremia 32:23

Aye bwe baatuuka mu nsi eno ni bagitwala n'eba eyaibwe ku bwaibwe, tibaagondera biragiro byo, waire okwebisa nga bwe wabagalagira. Ghazira kye baakolaku ku ebyo bye wabalagira okukola. Kale ni, iwe n'okubaleetaku okuzikirira kuno kwonakwona.

Yeremia 38:20

Nze naamukoba nti: “Abababilonia tibaidha kukuwaayo eri Bayudaaya abo. Nkweghembye gondera obukwenda bwa Musengwa Katonda bwe ndi kukukobera, olwo byonabyona biidha kukujiira bukalamu era baidha kukuleka osigale ng'okaali mulamu.

Yeremia 42:6

Oba binaatusanhusa oba tibiitusanhuse, twidha kugondera Musengwa Katonda waife ye tuli kukukoba otusabire y'ali. Memale ebintu bisobole okutujiiranga obukalamu.”

Zefania 3:2

Kizira muntu ye kiwulirisa era tikiganha kugololwa mu nsobi dhaakyo. Tikyesiga Musengwa Katonda, era tikisaba Katonda waakyo oyo akibeere.

Zekaria 6:15

Abantu ab'eghala baliidha baayamba mu kuzimba obuyaaka eisinzizo lya Musengwa Katonda, olwo mwamanha nga Musengwa Katonda Afuga Amagye n'eyantuma ye muli. Ebyo birituukirira, bwe muligondera n'omwoyo omulala ebyo Musengwa Katonda waimwe by'alagira.

Zekaria 7:7

Byene ebyo Musengwa Katonda bye yayogera ng'abita mu balanzi abaaligho mu biseera eby'eira. Mu biseera ebyo ekibuga Yerusalemu bye kyabeeranga ng'ebintu bikijiira bukalamu nga kiidhwire abantu. Era ng'abantu bali kamaala mu bibuga ebikyezungulwire, ni mu biketezo ebiri ku luuyi olw'omukono omusaadha olw'e buvandhuba, n'ebyo ebiri mu biiko.

Ab'e Roma 16:26

Aye buti ekyama ekyo kimanhisiibwa mu Byaghandiikibwa abalanzi. Katonda atawaagho yalagira kimanhibwe amaghanga goonagoona, abantu baghange okwikiriza Katonda era n'okumugonderanga.

2 Ab'e Korintho 10:5

Tuzikiriza buli kutakana kwonakwona, n'ebitimuguunha ebyekudumbaza mu ngira okulobera Katonda okumanhibwa, era twakyusa buli ndowooza ey'ekidheemu yaagondera Kurisito.

Amateeka Agokubiri 11:27

Mwidha kugheebwanga enkabi, bwe munaawuliranga ebiragiro bya Musengwa Katonda waimwe bye ndi kubagha olwaleero.

Amateeka Agokubiri 13:4

Mujiirenga ku Musengwa Katonda waimwe by'abalagira, era mumutyenga. Mumuwulirenga era mukuumenga ebiragiro bye. Mumusinzenga era mubenga beesigwa y'ali

Amateeka Agokubiri 13:5

Aye omulanzi oyo oba omuvuunuzi w'ebirooto oyo, aitibwenga, kuba abakoba kudheemera Musengwa Katonda waimwe, eyabatoola mu Misiri, ye mwakolanga obwiru. Omuntu ng'oti n'oyo aba ali kubadaaliimya okubatoola ku mpisa, Musengwa Katonda waimwe dhe yabalagira okugemanga, ky'anaavanga n'aitibwa, ni mwetoolaku ekibi ekyo.

Amateeka Agokubiri 30:2

Imwe n'abaidhukulu abaliiragho, bwe munaakyukanga ni mwira eri Musengwa Katonda waimwe, era ni mugonderanga ebiragiro bye, bye ndi kubagha olwaleero, n'omutima gwaimwe gwonagwona era n'omwoyo gwaimwe gwonagwona,

Amateeka Agokubiri 30:20

Mugonzenga Musengwa Katonda waimwe, mumuwulirenga, era mubenga beesigwa y'ali. Kuba oyo, n'obulamu bwaimwe, era n'obughanguzi bwaimwe. Olwo mwidha kubanga mu nsi Musengwa Katonda waimwe ye yasuubiza okugha badhaadha baimwe Aburahamu, ni Isaaka, ni Yakobo.”

Amateeka Agokubiri 30:8

Era muliiramu kabiri okugonderanga Musengwa Katonda, n'okutuukirizanga ebiragiro bye, bye ndi kubagha olwaleero.

Amateeka Agokubiri 4:10

olunaku lwe mwayemerera mu maiso ga Musengwa Katonda waimwe ku lusozi Sinai. Ku olwo Musengwa Katonda lwe yankoba ati, ‘Nsololeza abantu baidhe. Nhenda bawulire bye nja okubakoba, beege okuntyanga n'okumpuliranga enaku dhoonadhoona edh'obulamu bwaibwe, era beegerese n'abaana baibwe okukolanga batyo boona.’

Amateeka Agokubiri 4:40

Mukuumenga amateeka ge n'ebiragiro bye, bye ndi kubagha olwaleero, mughange okubanga obukalamu, imwe n'abaana baimwe abaliiragho, era mughangaalire mu nsi, Musengwa Katonda waimwe y'ali kubagha okubanga eyaimwe enaku dhoonadhoona.”

Amateeka Agokubiri 5:16

“ ‘Mughenga balata baimwe ni bainhaimwe ekitiibwa, nga nze Musengwa Katonda waimwe bwe mbalagira, olwo mughange okubanga obukalamu era mughangaalire mu nsi ye ndi kubagha.

Amateeka Agokubiri 5:29

Kale ngoli baba n'omwoyo ng'oti n'ogwo buliidho, ni bantya era ni bakuumanga ebiragiro byange byonabyona! Olwo beene n'abaidhukulu baibwe bandibairenga bukalamu enaku dhoonadhoona.

Amateeka Agokubiri 5:33

Mujiirenga ku ebyo byonabyona Musengwa Katonda waimwe bye yabalagira, mughange okuba obukalamu, mughangaalire mu nsi ye muja okutwala.”

Amateeka Agokubiri 6:3

Imwe Abaisiraeli muwulire: mwegendereze okutuukirizanga ebyo, musobole okubanga obukalamu era mweyongerenga okuba abangi einho era ab'amaani, nga muli mu nsi eyo engimu era erimu ebirungi kamaala, nga Musengwa Katonda, Katonda wa badhaadha baimwe bweyasuubiza.

Abaheburayi 5:9

Era ng'amaze okutuukirizibwa, abo boonaboona abamugondera yabafuukira ensimuko ey'obulokozi obutawaagho,

1 Samueli 15:22

Samueli yaakoba Saulo ati: “Iwe odhuuba oti Musengwa Katonda asiima inho ebigheebwayo ebyokebwa n'emisengo, ng'oti ni bw'asiima okugondera ebiragiro bye? Bona eno, okumugondera kusinga okumugha emisengo, n'okumuwulira kwasinga okumugha amasavu ag'entaama enume.