Yeremia 51:16 - Baibuli Ekibono kya Katonda 2014

¹⁶ Bw'alagira, amaadhi ku igulu gadudumuka, era asitusa olufu ku ndhuyi dhoonadhoona edh'ensi. Aleetera olukuba okughemya ng'amaadhi gali kugwa, era yaatoolayo empewo mu materekero ge, yaagireeta.

Yeremia 51:16 ပူးပေါင်းရင်းမြစ်များ

Amainhama 8:1

Katonda yaidhukira Noa, era n'ensolo edh'omu nsiko, n'edho enfuge dhe yali nadho mu lyato. Katonda yaasindika empewo yaafuuwa ku nsi, amaadhi gaakendeera.

Yobu 37:13

Agwisa amaadhi okufukirira ensi. Olundi agagwisa lwa kubonereza bantu, ate olundi kaaba kamanhiso akooleka ekisa kye.

Yobu 38:22

Waali oingiireku mu kifo ghe nkuumira omuzira n'amabaale ag'omugozi?

Yobu 40:9

Iwe oyaga ninze amaani? Era osobola okutyabuka n'amamiro agali ng'oti n'agange?

Zabbuli 104:7

Bwe wagakaabukira gaalumukagho; bwegaawulira amamiro go ng'oli kutyabuka gaaswankukagho.

Zabbuli 135:7

Oyo n'asitusa ebire okuva ensi y'ekoma n'asindika olukuba mu maadhi agali kugwa, era n'atoolayo empewo ng'oti n'omuntu bw'atoolayo ebintu bye mu byagi.

Zabbuli 147:18

Agho yaalagira omugozi gwasaanuuka era yaatuma empewo, amaadhi gaakuuluula.

Zabbuli 18:13

Musengwa Katonda yaatyabuka oti lukuba mu igulu, oyo Ali Ghaigulu Yeene yaayogera n'amamiro ge, nga gali ng'oti n'omugozi era ng'oti n'omuliro ogw'amanda.

Zabbuli 46:6

Katonda bw'aboigoka, abamaghanga baidhamu okutya okw'amaani, obwakyabazinga bwatengeesebwa n'ensi yoonayoona yaatengera.

Zabbuli 68:33

oyo aseeyeeya ku igulu, eigulu eryaligho okuva eira n'eira. Wulira bw'akaabuka n'amamiro ag'amaani.

Zabbuli 78:26

Kabiri yaafuuyisa empewo ku igulu eva e buvandhuba era olw'obukumu bwe yaafuuyisa n'empewo eyindi eva ku luuyi olw'omukono omusaadha olw'e buvandhuba.

Okuvaayo 10:13

Kale Musa yaagolola omwigo gwe ng'agusonse ku nsi Misiri. Musengwa Katonda yaaleeta empewo ng'eva e buvandhuba, yaakunta omusana ogwo gwonagwona n'obwire bwonabwona, era okuja okuwuuna enkyo ng'empewo eyo eyava e buvandhuba ereese enzige.

Okuvaayo 10:19

Era Musengwa Katonda yaakyusa empewo ey'e buvandhuba, yaaviira e bugwandhuba n'amaani, yaasitula enzige yaadhisindiikiriza, yaadhituusa mu Nhandha Emyufu. Mu nsi yoonayoona Misiri timwasigala nzige naire endala eti.

Okuvaayo 14:21

Agho Musa yaagolola omukono ng'agusonse ku nhandha. Musengwa Katonda yaasindika empewo ey'amaani eva e buvandhuba, yaayeyaagho amaadhi ag'enhandha obwire bwonabwona. Amaadhi geeyawulamu, aghabaire enhandha ghaafuuka itaka ikalu.

Ezekieli 10:5

Omuvuuma ogw'amaghagha ga bikerubi gwawulirwa n'ere mu luya olw'okuliya, nga guli ng'oti n'amamiro ga Katonda Aghanga Ebintu Byonabyona bwe gawulirwa, bw'aba ng'ayogeire.

Amosi 9:7

Musengwa Katonda akoba ati: “Imwe Abaisiraeli, mulowooza muti muli ba ndhawulo ku Baethiopia? Kituufu imwe nabatoola mu Misiri mu bwiru, aye n'Abafilisiti boona nabatoola mu Kafutori, n'Abasiria naabatoola mu Kiri.

Yona 1:4

Aye Musengwa Katonda yaagheereza empewo ey'amaani ku nhandha, kiwunga yaasiikuula enhandha ebitakobeka, kumpi n'eryato limenhekemenheke.

Yona 4:8

Endhuba bwe yavaayo akasana kaidha, Katonda yaatuma empewo ensu ng'eva ku luuyi olw'e buvandhuba, akasana kaayokya Yona mu mutwe kata azirike yeegomba okufa. Yaakoba ati: “Okufa kusinga okuba omulamu!”