Yeremia 51:11 - Baibuli Ekibono kya Katonda 2014

¹¹ Musengwa Katonda asiikwire enzigu mu bakyabazinga ab'e Media, baidhe balumbe Babilonia, kuba ayenda kugizikiriza. Olwo agyesasulizeeku olw'okuzikiriza eisinzizo lye. Agho abaduumizi b'eigye einunuzi, baalagira bati: “Mughagale obusaale bwaimwe! Mugeme engabo dhaimwe!

Yeremia 51:11 ပူးပေါင်းရင်းမြစ်များ

1 Bakyabazinga 11:14

Agho Musengwa Katonda yaasiikuula omulangira Hadadi ow'e Edomu, yaafuuka omuzigu wa Solomoni.

1 Bakyabazinga 11:23

Agho Katonda yaasiikuulira Solomoni omuzigu owundi, nga ni Rezori mutabane wa Eliada. Rezori oyo yalumuka ku musengwa we Hadadezeri, kyabazinga w'e Zoba.

1 Ebyomubyanda 5:26

Agho Katonda wa Isiraeli yaasiikuula enzigu mu mwoyo gwa Puli kyabazinga w'e Assiria, eriina lye erindi nga ni Tigulathi Pileseri, yaaja yaatwala mu bunhage Abareubeni, n'Abagadi, n'ekitundu ku Bamanasse. Yaabatwala e Hala, n'e Habori, n'e Hara, ni ku mwiga Gozani, baabeera irala eyo ni ye buli eno.

2 Ebyomubyanda 36:22

Mu mwaka ogwasooka ogwa kyabazinga Kuro okufuga Perusia, Musengwa Katonda yatuukiriza ekyo kye yayogera ng'abita mu Yeremia omulanzi. Musengwa Katonda oyo yaleetera kyabazinga Kuro oyo okulangirira ekiragiro mu bwakyabazinga bwe bwonabwona, era yaakita mu bughandiike ati:

Ezera 1:1

Mu mwaka ogwasooka ogwa kyabazinga Kuro okufuga Perusia, Musengwa Katonda yatuukiriza ekyo kye yayogera ng'abita mu Yeremia omulanzi. Musengwa Katonda oyo yaleetera kyabazinga Kuro oyo okulangirira ekiragiro mu bwakyabazinga bwe bwonabwona, nga kighandiikiibwa kiti:

Isaia 10:26

Nze Musengwa Katonda Afuga Amagye ndibakuba abo naababonereza nga bwe naitira Abamidia ku lubaale lw'e Orebu. Ndiita Abassiria abo nga bwe naitira Abamisiri mu nhandha.

Isaia 21:2

Mbonekeirwa akabi akaja okugwagho; mboine anhagulula ng'ali kunhagulula, naabona azikiriza ng'ali kuzikiriza. Iwe eigye ly'omu Elamu, ja olumbe, n'iwe eigye ly'e Media, ja ozingize omuzigu. Katonda aidha kumalagho okudaazibwadaazibwa kwonakwona Babiloni kw'aleeta.

Isaia 21:5

Mbonekeirwa nga bategeike ekiiwulo, baayala ghansi engoye edh'okutyamaku, baatyama, baalya era baanhwa. Okuja okutemya n'okuzibula nga kirangiriirwa kiti: “Imwe abakulu b'abaisirukale, musituke, mutegeke engabo dhaimwe!”

Isaia 41:25

Nasiikuula omuntu ava ku luuyi olw'omukono omugooda olw'e buvandhuba, era wuuyo atuuse. Alikozesa eriina lyange, yaatyankirira abafuzi ng'oti bityanka yaaba ng'oti n'omuwumbi bw'asamba eitosi.

Isaia 45:1

Musengwa Katonda yalonda kyabazinga Kuro, yaamutuma okughangula amaghanga, n'okutoola ku bakyabazinga obukumu. Musengwa Katonda alimwiguliragho emiryango gy'ebibuga, ghaaloba kubaagho agiigalagho. Musengwa Katonda akoba Kuro oyo ati:

Isaia 45:5

Ninze Musengwa Katonda zenka, ezirayo Katonda wundi naire. Ndikugha amaani ge weetaaga, waire nga iwe tondidhi.

Isaia 46:11

Ndyeta omuntu yaidha okuva e buvandhuba. Aliidha ng'oti n'enhonhi eyiiga, yaaja yaakola kye ntegeike. Ntyo bwe nkobye era tiriroba kukituukiriza.

Yeremia 25:25

bakyabazinga boonaboona ab'e Zimuri, n'e Elamu, n'e Media

Yeremia 46:3

“Abaduumizi Abamisiri baakaabuka bati, ‘Mugeme engabo dhaimwe enene n'entono, mwetegekere okuja mu lutalo.

Yeremia 46:4

Imwe abavuzi b'embalaasi, musibe ebigaali byaimwe eby'omu lutalo ku mbalaasi dhaimwe. Mughagale amafumo gaimwe, muvaale enkuufiira dhaimwe edh'ekyuma, n'ebivaalo eby'omu kifuba eby'ekyuma. Muniine ku bigaali eby'omu lutalo ebyo, musimbe enhiriri.’ ”

Yeremia 46:9

Muduumire embalaasi dhije dhirumbe, n'ebigaali eby'omu lutalo biwuluguke embiro! Imwe abalwanisa engabo ab'e Ethiopia n'ab'e Puti, muje mulumbe. N'imwe abakugu mu kulasa obusaale ab'e Ludi, muje mulumbe.’ ”

Yeremia 50:25

Ndhigwiregho eiterekero ery'eby'okulwanisa byange, era naabifulumya nga nsungughaire inho kuba nze Musengwa Katonda Afuga Amagye ndi ni kye nja okubikozesa mu nsi eyo ey'Abakaladea.

Yeremia 50:3

“Eighanga liviire ku luuyi olw'omukono omugooda olw'e buvandhuba, lyalumba ensi Babilonia era lija kugireetera okufuuka eirungu. Abantu n'ensolo baja kugirumukamu, ghabulegho omuntu agibaamu waire omulala ati.”

Yeremia 50:45

Kale ni muwulire kye ntegeike okukola ku kibuga Babiloni, akabi ke neesoomeire okutuusa ku bantu baakyo. Ni bwe baba abaana baibwe, abazigu balibakwekwebya baabatwala, era abantu boonaboona balitya inho.

Yeremia 50:9

Ndi kuja kusiikuula amaghanga ag'amaani agali ku luuyi olw'omukono omugooda olw'e buvandhuba, ngaleetere okulumba ensi Babilonia. Balisimba enhiriri baalumba ensi eyo, baagighangula. Abantu abo bakugu mu kulasa obulaso, era mu kuteeba tibasubwa naire.

Yeremia 51:12

Mughanike ebendera muje mulumbe ekimante ekyezungulwire ekibuga Babiloni. Mwongere ku baisirukale abali kukikuuma babe bangi. Muteegho abakuuma omusana n'abakuuma obwire, era muteegho n'abeeteeze okuzinduukiriza abazigu.” Musengwa Katonda atuukiriiza ekyo kye yeesoomera okukola abantu b'omu Babilonia.

Yeremia 51:24

Musengwa Katonda era akoba ati: “Mulibona nga neesasuliza ku nsi Babilonia n'abantu baayo, olw'ebibi byonabyona bye baakola Yerusalemu.

Yeremia 51:35

Abantu ab'omu Sioni ka bakobe bati: “Obukambwe Abababilonia bwe baatukolaku, ka bubairirengaku beene abo!” Abantu ab'e Yerusalemu ka bakobe bati: “Omusaayi ogw'abantu baife ogwayuyika, ka gwirirenga ku Bababilonia beene abo!”

Yeremia 51:36

Kale ni, Musengwa Katonda akoba ab'e Yerusalemu ati: “Bona, nja kubalwanirira, neesasulize ku bazigu baimwe olw'ebyo bye baabakola. Ndikaza enhandha y'Ababilonia era naalekeza n'emiiga gyaibwe okukuuluula amaadhi.

Danieli 5:30

Obwire bwene obwo Beleshazzari oyo, kyabazinga Omubabilonia, yaitibwa.

Yoeli 3:10

Edhibaire embago dhaimwe edh'okulimisa, mudhigheeseemu mpiima dha kulwanisa; n'obusolobyo obw'okuwoolera, mubugheeseemu mafumo ga kulwanisa. N'abanafu boona ka bafuuke balwani.

Yoeli 3:9

Mulangirire kino eyo mu maghanga, muti, ‘Mutegeke olutalo; mwete abalwani ab'amaani, mukobe abaisirukale beesoloze baidhe.

Abalevi 26:25

Ndidha kubaleeteranga entalo okubabonereza olw'okumenha endagaano yange n'imwe. Era bwe muneesololezanga aghalala mu bibuga byaimwe okwewonia, ndidha kubasindikangamu obulwaire obubi, muwalirizibwenga okweghaayo eri abazigu baimwe.

Zekaria 14:12

Musengwa Katonda alibonereza abantu b'amaghanga agalitanula olutalo ku Yerusalemu, ng'abasindikira endwaire embi einho: emibiri gyaibwe girivunda nga bakaatambula, amaiso gaibwe gaabavundira mu bighanga, n'enimi dhaibwe dhaabavundira mu kanwa.

Zekaria 14:2

Musengwa Katonda akoba ati alisoloza abantu b'amaghanga goonagoona, baalumba Yerusalemu mu lutalo. Balikighangula, baanhagulula ebintu mu mayumba, era baagema abakazi baabakaka. Ekitundu ku bantu baamu balitwalibwa mu bunhage, aye abalisigalagho tibalitoolebwa mu kibuga.