Yeremia 50:12 - Baibuli Ekibono kya Katonda 2014

¹² Aye ekibuga kyaimwe ekyabalabirira obukalamu ng'oti ni maama eyabazaala, abazigu balikinhoomoola era baakiswazaswaza. Eighanga lyaimwe n'eririsembayo mu maghanga goonagoona. Era ensi yaimwe eyo erifuuka irungu omuzira maadhi.

Yeremia 50:12 ပူးပေါင်းရင်းမြစ်များ

Isaia 14:22

Musengwa Katonda Afuga Amagye akoba ati: “Ndirumba Babiloni naakizikiriza kyerabirwa n'okwerabirwa, ghaabulagho awonagho k'abe omwana oba omwidhukulu. Nze Musengwa Katonda ntyo bwe nkobye.

Isaia 23:13

Baali Bababiloni abaafuula Tiro ekifo eky'ensolo edh'omu nsiko, se ti Bassiria. Baakizimbaku ebituuti ebirengererwaku, baakizingiza okukyezunguluza, baamenha endhu dhaamu, era baazikiriza byonabyona ebyakirimu.

Yeremia 12:14

Agho Musengwa Katonda yaakoba ati: “Kino kye ndidha okukola ab'omu maghanga agaliiraine Isiraeli agoonoona ensi ye nagha abantu bange Abaisiraeli. Ndidha kubatoola mu nsi dhaibwe, ng'oti n'omuntu bw'aiwululagho ekisimbe n'emizi gyakyo. Era ndiwonia Abayudaaya naabatoola mu ngalo dh'abantu abo ababi.

Yeremia 15:9

Omukazi eyazaala abaana omusanvu aziriike, amaani gaamuwaamu. Abona nzikiiza waire nga bukaali musana. Ensoni dhimugemye yaaswala. Abo abaliba nga bakaasigairegho ku imwe, ndibaleka abazigu baabaita. Nze Musengwa Katonda, ninze nkobye.”

Yeremia 22:6

Musengwa Katonda ati bw'akoba ku kisaagaati kya kyabazinga wa Buyudaaya: “Ekisaagaati kya kyabazinga wa Buyudaaya kiboneka bulungi ng'oti n'ensi Gileadi, era ng'oti n'ensozi edh'e Lebanoni. Aye nja kukifuula ekifo ekisigaire obwagho kityo, era ekibuga ekiziramu muntu akibaamu naire.

Yeremia 25:12

Emyaka ensanvu egyo bwe giriwaayo, ndibonereza kyabazinga w'e Babilonia n'ab'omu ighanga eryo olw'ebibi byaibwe, naazikiriza ensi yaibwe yaasigala agho etyo ng'eri bwa bifulukwa byereere, ebyanda n'ebyanda.

Yeremia 25:26

ni bakyabazinga boonaboona ababa ku luuyi olw'omukono omugooda olw'e buvandhuba ab'okumpi n'eghala. Boonaboona abo balinhwa, mulala mulala nga banonaganwa. N'obwakyabazinga obundi bwonabwona obuli ku nsi bulinhwa. Abo bwebalimala, olwo kyabazinga ow'e Babilonia yeena yaanhwa.

Yeremia 49:2

Aye bona, ekiseera kiidha kutuuka, abantu ab'omu Rabba ekibuga ekikulu eky'Abammoni, mbaleetere okuwulira okwasiikana okw'omu lutalo. Abazigu balikireka agho kityo nga kifuuse bifulukwa byereere, era nga bookiikya n'ebyalo byakyo omuliro byawaagho. Olwo Abaisiraeli balyeiriza ekiketezo kyaibwe, baakitoola ku abo abaali bakibatoireku.

Yeremia 51:43

Ebibuga byakyo bifuuse bifo ebitiisa einho. Biri ng'oti irungu omuzira maadhi, era omuzira bantu babibaamu waire ababibitamu obubite.

Yeremia 51:47

Kale ni bona, ekiseera kiri kwidha, nsitule olutalo ku bifaananie bye basinza mu Babilonia. Ensi eyo yoonayoona eriswazibwa n'abantu baayo baitibwa, emirambo gyaibwe gyaba bw'agho gityo.

Ab'e Galatia 4:26

Aye Yerusalemu eky'omu igulu kiziramu bwiru era ni inhaife.

Okwolekebwa 17:5

Mu kyeni kye mwali mughandiikiibwamu eriina ery'amakulu amagise liti: “Babiloni omukologho, azaala bamalaaya n'ebyenhinhalwa eby'oku nsi.”