Yeremia 5:6 - Baibuli Ekibono kya Katonda 2014

⁶ Abantu abo bali n'ebibi kamaala era baava inho ku Katonda. Kale ni empologoma dhiriva mu kibira dhaabaita, emisege gyava mu irungu gyabazikiriza, n'empala dhaabeeteega mu bibuga byaibwe, nga kiisi muntu afuluma dhimuyuzayuza.

Yeremia 5:6 ပူးပေါင်းရင်းမြစ်များ

2 Ebyomubyanda 36:14

Ni bakabona abakulu nga kw'otaire n'abakulembeze abantu, boona baakola ebibi einho nga bajiira ku byenhinhalwa byonabyona eby'abamaghanga agandi. Kale baayonoona batyo eisinzizo Musengwa Katonda mwene lye yatukuza mu Yerusalemu.

Ezera 10:10

Ezera kabona yaasituka yaakoba abantu ati: “Mwayonoona okubayiza abakazi abamaghanga agandi, kuba mwayongera bwongere ku musango ensi Isiraeli gw'eri nagwo.

Ezera 9:6

“Wo Katonda wange, nswaire inho era ensoni dhiri kungema okusitula amaiso ninge y'oli, iwe Katonda wange kuba ebibi byaife byebunze emungo etusinga n'obuleeyi, n'emisango gyaife gyebunga emungo etuuka ni ku igulu.

Yobu 10:16

Bwe nkola ekintu ekindeetera okwenhumiriza, oba ng'oti mpologoma wandhiiga; waakola ebyewuunhisa okuunumya.

Zabbuli 104:20

Wakola enzikiiza ereetera obwire okuziba, ensolo dhoonadhoona edh'omu nsiko dhaatoolera okutambula.

Zabbuli 80:13

Embiidhi edh'omu nsiko dhaagutyankirira, na kiisi kya mu nsiko kyonakyona kyeriira okwo.

Isaia 1:23

Abakulembeze bo badheemu, era bagemagana na baibi. Buli muntu agonza kulya nguzi era yaagunirira okugheebwa ebirabo. Tibalwaniriraku bamulekwa, waire okuwulirisa ensonga banamwandu dhe babaleetera.

Isaia 59:12

“Wo Musengwa Katonda, twakola ebibi kamaala y'oli, era okusobya kwaife okwo kwene kutulumiriza kuba ebibi byaife tubibona, n'okusobya kwaife tukwidhi bukalamu.

Yeremia 14:7

Abantu bange bandirira bati, ‘Wo Musengwa Katonda, waire ebibi byaife bitulumiriza olw'okukuvaaku emikuzi kamaala ni twonoona, iwe mala gaganha otuyambe nga bwe watusuubiza.

Yeremia 2:15

Abazigu baibwe babawologomera na maani ng'oti mpologoma. Era baleeteire ensi Isiraeli okufuuka eirungu, baazikiriza ebibuga byamu byafuuka bifulukwa byereere, ghaabulagho omuntu abibaamu.

Yeremia 2:17

Ekyo Abaisiraeli baakyereetera beene, bwe banvaaku nze Musengwa Katonda waibwe, ng'ate ninze eyaboolekanga engira ey'okubitamu.

Yeremia 2:19

Ebibi byaimwe byene n'ebiribakangaivula imwe, era okunvaaku kwaimwe n'okulibasalira omusango okubasinga. Mukibone era mukimanhe nga bwekiri ekibi einho era eky'obulumi, okunvaaku nze Musengwa Katonda waimwe era n'obutantya. Nze Musengwa Katonda Afuga Amagye, ninze nkobye.”

Yeremia 2:31

Imwe Abaisiraeli muwulire nze Musengwa Katonda kye nkoba. Nabeefuukirakuuku naababeera ng'oti irungu, era ng'oti n'ensi egemye enzikiiza eri bedimudimu? Kale imwe bantu bange kiki ekiboogeza muti, ‘Tuli ba idembe, titukaira y'oli?’

Yeremia 25:38

Musengwa Katonda alekuliire agho abantu be, ng'oti n'empologoma bw'eva mu mpuku yaayo. Ebitiisa eby'omu lutalo n'obusungu bwa Musengwa Katonda obubitirivu, bireeteire ensi yaibwe okufuuka ng'oti bwa irungu.”

Yeremia 30:14

Abo be mwakolagananga nabo baabeerabira tibakaabafaaku naire. Nze nabalumba imwe ng'oti ndi bwa muzigu waimwe, naababonereza aghazira kusaasira naire, olw'ebibi byaimwe ebingi n'olw'emisango gyaimwe egitaloodheka.

Yeremia 30:15

Mulekere agho okwemuluguunhia olw'obulumi, kuba amabwa gaimwe tigasoboka kuwonezebwa. Nababonereza ntyo olw'ebibi byaimwe ebingi, n'olw'emisango gyaimwe egitaloodheka.

Yeremia 30:24

Era obusungu bwa Musengwa Katonda obubitirivu tibuja kwika, okutuusa ng'amaze okukola n'okutuukiriza ky'asazeegho okukola. Imwe abantu be, ekyo mulikitegeera bukalamu mu biseera eby'oluvainhuma.

Yeremia 4:7

Azikiriza amaghanga aviireyo, aviireyo ng'oti mpologoma eva mu kisaka kyayo. Aidhie okufafaagania ensi yaimwe; ebibuga byaimwe biidha kufuuka bifulukwa byereere, nga biziramu bantu babibaamu.

Yeremia 49:19

Ng'empologoma bw'evaayo mu kibira ekizibirivu ekiri ku mbali kw'omwiga Yorudani n'eja n'erumba ebyayiro by'ensolo ebirungi, zeena ntyo bwendiidha okuzindula Abaedomu, balumuke bave mu nsi yaibwe. Olwo omuntu ye ndirondagho n'alifuga eighanga eryo. Naani asobola okwegeza ku nze? Naani asobola okuneesonsaaku? Era mufuzi ki asobola okuntakania?

Yeremia 8:5

Memale lwaki imwe abantu bange mwadaaliima ni munvaaku obutenda kwira naire? Mwekalangula ku by'obuguya mwaloba okwira ye ndi.

Yeremia 8:7

Ni bw'aba sekanhulya amanha ebiseera bye eby'okwiriramu eka. Enjiibwa n'obumiini ni ŋaali, bikuuma ebiseera byabyo eby'okusengukiramu. Aye imwe abantu bange timwidhi mateeka gange nze Musengwa Katonda.

Okulira 1:5

Abazigu baakyo buti n'abakifuga era buli kintu kibajiira bukalamu. Musengwa n'eyakireetera okudaagadaaga okwo olw'ebibi byakyo kamaala bye kyakolanga. Abaana baamu baabagema, baabakulembezaamu, baabatwala mu bunhage.

Ezekieli 16:25

Olw'emboneka yo enungi, mu buli maagaanana ga luguudo wataagho ekifo okukoleramu obwamalaaya, weekubanga ku buli muntu eyabitangagho. Mu nsambo eyo obwamalaaya bwo bweyongerangaku buli lunaku.

Ezekieli 22:27

Abakulembeze baamu bali ng'oti misege egikankanula kye gigemye. Baita abantu baabazikiriza, basobole okutwala ebintu byaibwe, bakombaghale.

Ezekieli 23:19

Aye era yeeyongera bweyongere kukola bwamalaaya, nga bwe yabukolanga nga mughala muto e Misiri.

Danieli 7:4

Ekyasooka nga kiri ng'oti mpologoma, aye nga kiri n'amaghagha ng'oti ga nkookooma. Bwe nali nga nkaalingiriire, baakimaanhuulaku amaghagha. Baamala baakisitusa, baakyemereza ku magulu abiri ng'oti muntu, era baakigha okulowooza ng'oti kwa muntu.

Danieli 7:6

Nali nkaalingirira ekyo, okuja okubona ng'eri kuvaayo ekisolo ekindi ekifaanana ng'oti mpala. Kyali n'amaghagha ana agali ng'oti ga nhonhi ku mugongo gwakyo, era nga kiri n'emitwe ena. Ekisolo ekyo baakigha obuyinza okufuga.

Hosea 5:14

Kale ndirumba Isiraeli ni Buyudaaya ng'oti mpologoma. Era nze mwene, ninze ndibayuzayuza, memale neejiira. Ndibaghaluudhania naabatwala nga ghazira n'asobola kubawonia.

Habakkuku 1:8

“Embalaasi dhaibwe dhirumuka embiro okusingaku n'empala, era nkambwe okusingaku emisege egiri endhala einho; dhimaduka nga dhizira kye dhitya. Abadhivuga bava ghala, baidha nga baguluka buguluke ng'oti n'enkookooma bw'eika n'eswankula ky'eja okulya.

Zefania 3:3

Abakungu mu kibuga omwo bali oti mpologoma edhiwologoma. Abalamuzi baamu baaba ng'oti n'emisege egiyiiga eigulo nga giri ndhala inho, ni gitalekaagho kagumba kusigala kubonebwaku nga bukyeire.

Okubala 32:14

Mperaano bona, niimwe mwize mu kifo kya badhaadha baimwe abo, mube oluse olw'abakozi ab'ebibi, era mwongere okuleetera Musengwa Katonda okusungughalira Abaisiraeli ekibitiriire.

Okwolekebwa 13:2

Ekisolo ekyo kye nabona kyali kiboneka ng'oti mpala. Ebigere byakyo nga biri ng'oti n'eby'ekisolo ekikambwe, ate omunwa gwakyo nga guli ng'oti gwa mpologoma. Ogusota gwagha ekisolo ekyo amaani gaagwo, n'ekityamo kyagwo ky'obwakyabazinga, n'obuyinza bungi.