Yeremia 42:18 - Baibuli Ekibono kya Katonda 2014

¹⁸ “Musengwa Katonda Afuga Amagye, Katonda wa Isiraeli, akoba ati, ‘Nga bwe namalira obusungu bwange n'ekiruyi kyange ku bantu b'omu Yerusalemu, era ntyo bwe ndibimalira ni ku imwe, bwe musalagho okuja e Misiri. Mulifuuka ekintu ekitiisa einho, abantu baaboogerangaku nga babayeeyereza bwe babavuma. Era balikozesanga eriina lyaimwe ng'ekikolimo. Era timuliira kabiri mu Buyudaaya naire.’”

Yeremia 42:18 ပူးပေါင်းရင်းမြစ်များ

2 Ebyomubyanda 34:25

Nga bwe banviireku ni baniokeza obubbaani eri emisambwa, ni bansungughaza n'ebyo byonabyona bye bakoze, obusungu bwange bwidha kutumbukira ku kifo kino ng'oti muliro, era tibulizikira.

Isaia 30:3

Aye ni, amaani ga Misiri ge beesiga galibaviiramu kuswala, n'ekya kyabazinga waayo okubakuuma kiribaviiramu kabi keereere.

Isaia 65:15

Abo be nalondamu balikozesanga eriina lyaimwe nga bakolima. Era imwe, nze Musengwa Katonda, ninze mwene ndibaita, aye abo abakola bye nhenda ndibatuuma eriina eiyaaka.

Yeremia 18:16

Ensi yaibwe baagifuula ekintu ekitiisa einho, abantu kye baneesimoozanga buliidho. Buli muntu anaagibitangaku aidha kutengeesanga bwa mutwe olw'okutya okungi.

Yeremia 22:27

Mulyegomba okwira mu nsi eno kabiri, aye timuliira naire.”

Yeremia 23:40

Era ndidha kubaleetera ensoni okubagemanga, abantu babanhoomenga aghazira kwerabira naire.”

Yeremia 24:9

Ndidha kubafuula ekintu ekitiisa einho abantu boonaboona ku nsi, bafuuke eky'okwogerwaku era eky'okuyeeyereza. Baidha kubanga kivumo era kikolimo, eyo yoonayoona ye ndibasansaaniza.

Yeremia 25:9

‘Bona, nja kwetesa abantu boonaboona ababa ku luuyi olw'omukono omugooda olw'e buvandhuba, era ndhetese n'omugheereza wange Nebukadinezzari kyabazinga w'e Babilonia. Memale mbaleete balwanise abantu b'omu Buyudaaya, n'ab'omu maghanga goonagoona agaliiraine agho. Nja kuzikiriza nsaaniegho eighanga lino Buyudaaya ghalala n'amaghanga agaliiraine agho, mu nsambo etiisa einho, buli muntu ageesimoozenga bwesimooze era agavumirirenga ebyanda n'ebyanda. Nze Musengwa Katonda, ninze nkobye.

Yeremia 26:6

Era bwemutaalekere agho kubanga badheemu, nja kukola eisinzizo lino kye nakola Shilo. Olwo amaghanga goonagoona ku nsi, gaidha kukozesanga eriina ery'ekibuga kino nga gakolima.”

Yeremia 29:18

Ndibakiriga n'entalo, n'endhala, n'endwaire ya kawumpuli, era naabafuula ekintu ekitiisa einho abantu boonaboona ku nsi. Yoonayoona ye ndibasansaaniza baidha kubanga kintu kya kukolima, kya kwesimooza, era kya kuvuma.

Yeremia 29:22

Era abantu abaatoolebwa e Yerusalemu ni batwalibwa e Babilonia mu bunhage, bwe banaayendanga okukolimira omuntu, baidha kukobanga bati, ‘Musengwa Katonda agwananga yaakukola kye yakola Zedekia ni Ahabu, kyabazinga ow'e Babilonia be yayokya mu muliro ni bafa.’

Yeremia 33:5

Abababilonia bali kwidha okulwana, baidhuze endhu edho n'ekisaagaati ekyo emirambo egy'abo be nja okwita mu busungu n'ekiruyi. Ekibuga kino nkirekuliire agho olw'ebikolwa ebibi abantu baamu bye bakola.

Yeremia 44:12

Abantu boonaboona abaali bawoniegho mu Buyudaaya, aye ni basalagho nga bamaliriire okuja okuba mu nsi Misiri, ndibaleetera boonaboona okuzikiribwa. Okuviira irala ku basembayo ghansi okutuukira irala ku babbede beene, balifiira mu nsi Misiri, nga babaitira mu ntalo oba nga bafa endhala. Balifuuka ekintu ekitiisa einho, abantu baaboogerangaku nga babayeeyereza bwe babavuma. Era abantu balikozesanga eriina lyaibwe ng'ekikolimo.

Yeremia 44:22

Ni ye buli eno ensi yaimwe yaasigala agho etyo ng'eri bifulukwa byereere omutaba bantu. Era abantu bagivumirira, baakozesa n'eriina lyayo ng'ekikolimo. Olw'okuba Musengwa Katonda yali tasobola kuguminkiriza bikolwa byaimwe ebibi ebyenhinhalwa.

Yeremia 44:6

Kyenava ni mmalira obusungu bwange n'ekiruyi kyange ku bibuga by'omu Buyudaaya, ni mu nguudo dh'omu Yerusalemu. Naabikunaaniaku omuliro, byasigala agho bityo nga bifuuse bifulukwa byereere, nga bwe bikaali ni ye buli eno.

Yeremia 44:8

Lwaki munsungughaza n'ebyo bye mukola, nga muniokeza obubbaani bakatonda ab'omu nsi Misiri ye mwaja okuba? Lwaki muli kukola ebyo okwereetera imwe beene okuzikirira, n'okuleetera abamaghanga agandi okuboogerangaku imwe nga babayeeyereza era nga bwebabakolimira?

Yeremia 6:11

Obusungu obungi kye buviire ni bungema ng'oti n'obubwo. Era bumbitiriireku tikaasobola kubufuga.” Agho Musengwa Katonda yankoba ati: “Obusungu obwo bumalire ku baana abato mu nguudo, ni ku baisuka abeesoloiza. Abasaadha ni bakazi baibwe baja kutwalibwa, n'abantu abakulu n'abakaire einho boona batwalibwe.

Yeremia 7:20

Kale ni bona eno, obusungu bwange n'ekiruyi kyange ndidha kubimalira ku kifo kino, ni ku bantu, ni ku nsolo, ni ku miti, ni ku birime, ng'oti n'omuliro omuntu gw'atasobola kuzikiza.”

Okulira 2:4

Yadhuumuula akalaso ke n'omukono gwe omusaadha, yaakabalinzaamu ng'oti muzigu waibwe. Yaita abo boonaboona abaabeeyagazanga. Obusungu bwe bwabookya ng'oti muliro.

Okulira 2:6

Yamenhagho eisinzizo lye ng'ole bw'amenhagho entindi eba ng'eri mu musiri, endhu eyo abantu mwe baajanga olw'embaga edh'ebibinuko ebyalagirwa, yaagizikiriza yafuuka bifulukwa byereere. Musengwa yalekeza agho ebibinuko ebyalagirwa, yaalekeza ni Sabbato. Era olw'obusungu obungi, kyabazinga ni bakabona takaabaliku naire.

Okulira 4:11

Musengwa Katonda yadhuuna obutalekamu, era obusungu bwe bwayaka ng'oti muliro yaateera oluyiira olwayokya Sioni okutuukira irala ku misingi gyakyo.

Ezekieli 20:34

Mu busungu obubitirivu ndikozesa obuyinza bwange obungi n'amaani gange agataloodheka, naabatoolayo eyo mu maghanga, naabasolozaayo eyo mu nsi ye mwasansaanira.

Ezekieli 22:22

Nga feeza bw'asaanuukira mu kyokero, boona bwe balisaanuukira mu Yerusalemu, memale baamanha nga nze Musengwa Katonda mwene, ninze mbamaliireku obusungu bwange.”

Danieli 9:11

Abaisiraeli boonaboona baamenha amateeka go era baakyuka baakuvaaku, baaloba kugondera by'okoba. Olw'okuba twakola ebibi y'oli, kye wava n'otutuusaaku ebikolimo bye weerayirira okutusindikira, ebyaghandiikibwa mu mateeka ga Musa omugheereza wo.

Danieli 9:27

Omufuzi oyo alikola endagaano ey'amaani n'abantu kamaala okumala emyaka musanvu, era ghagati gh'emyaka egyo alirekeza okughaayo emisengo n'ebigheebwayo. Ole akola ogw'okuzikiriza alitaagho ku ntwiko y'eisinzizo Ekyenhinhalwa Ekizikiriza, okutuusa enkomerero eyategekerwa oyo azikiriza bw'erituuka.”

Hosea 7:16

Banvaaku baasinza omusambwa Baali, bali ng'oti kalaso akagodobanu akateesigika kuteeba. Abakulembeze baibwe balifiira mu ntalo olw'okwogera nga beesuuta. Era balisekererwa mu nsi Misiri.”

Nahumu 1:6

Bw'asungughala ghazira abaagho nga mulamu, era ghazira aghanga kugumira busungu bwe obuli ng'oti muliro. Obusungu bwe obwo bwe butumbuka, ni bwe luba olubaale lumenhekamenheka, lwesa ng'oti nkungu.

Zekaria 8:13

Imwe ab'omu Buyudaaya n'ab'omu Isiraeli, mwali mufuuse ekibono abamaghanga agandi kye baakozesanga okukolima. Aye buti ndidha kubanunula, olwo bakozesenga eriina lyaimwe okusabiranga abantu enkabi. Kale mutatya naire, mugume bugume.”

Okubala 5:27

Bw'anaabanga nga tiyali mwesigwa eri iba era nga yeeyonoona, amaadhi ago olunaaganhwanga ni gamutuuka mu nda, gaidha kumuleeteranga obulumi obubitirivu, azimbezimbe, n'omugulu gwe gukutukeku, era mu bantu be abenga kikolimo.

Okwolekebwa 14:10

yeena alinhwa omwenge ogw'emizabbibu ogw'obusungu bwa Katonda, nga gufukiibwa mu kikopo eky'obusungu bwe era nga tigudhuuluusiibwamu naire. Era alidaazibwadaazibwa n'omuliro n'obunhota bwa salufa, mu maiso ga bamalaika abatukuvu n'ag'Entaama Ento.