Yeremia 4:1 - Baibuli Ekibono kya Katonda 2014

¹ Musengwa Katonda akoba ati: “Imwe Abaisiraeli, oba nga bwene mwenda okukyuka, mukyuke mwire ye ndi. Bwe mutoolagho ebyenhinhalwa byaimwe bye musinza, ni mugumira ku nze aghazira kudaaliima naire,

Yeremia 4:1 ပူးပေါင်းရင်းမြစ်များ

Amainhama 35:2

Agho Yakobo yaakoba ab'omu ndhu ye, n'abo boonaboona abaali naye ati: “Musuule ere emisambwa egy'abamaghanga agandi gye muli nagyo mwetukuze, mukyuse ebivaalo, muvaale ebitukula.

2 Bakyabazinga 23:13

Kyabazinga Yosia yaayonoona ebifo ebigulumivu eby'okusinzizaamu ebyali ku lwetebwa Olusozi olw'Okwonoona oluli ku luuyi olw'e buvandhuba wa Yerusalemu. Ebifo ebyo, kyabazinga Solomoni owa Isiraeli yali abizimbiire ebifaananie eby'emisambwa egyenhinhalwa: ekindi nga kya musambwa omukazi Ashera ogw'Abasidoni, ekindi kyaba kya musambwa Kemoshi ogw'Abamoabu, n'ekindi kyaba kya musambwa Moleki ogw'Abammoni.

2 Bakyabazinga 23:24

Yosia era yaatoolagho mu Yerusalemu ni mu Buyudaaya mwonamwona, abasamize, n'abalogo, n'emisambwa egy'omu maka, n'ebisinzibwa ebitali Katonda, era n'ebintu ebindi byonabyona ebyenhinhalwa. Yaakola ekyo, aghange okuleetera amateeka ago okukakata mu bantu, agaaghandiikibwa mu kitabo Hilikia Omukulu wa Bakabona kye yazuula mu isinzizo.

2 Ebyomubyanda 15:8

Asa bwe yawulira eby'obulanzi Azaria mutabane wa Odedi bye yayogera, yaafuna amaani. Yaatoola mu kiketezo kya Yuda n'ekya Benjamini, ebintu ebyenhinhalwa ebitali Katonda ebyasinzibwanga. Yaatoolayo n'ebyo ebyali mu bibuga ebyo byonabyona bye yanhaga mu kiketezo kya Efuraimu eky'oku nsozi. Era yaizaagho buyaaka alutaari ya Musengwa Katonda eyali emberi gh'eisinzizo.

2 Ebyomubyanda 33:8

Era tiriirayo kutoola Baisiraeli mu nsi ye nagha badhaadha baibwe, ni mbaleetera kutambulatambula eyo batyo, kasita banaatangayo omwoyo okukola byonabyona bye nabalagira, n'okukuuma amateeka goonagoona n'ebiragiro bye nabagha nga mbita mu Musa.”

2 Ebyomubyanda 34:33

Yosia yaatoola ebyenhinhalwa byonabyona mu kiketezo ky'Abaisiraeli. Olwo yaaleetera Abaisiraeli boonaboona okugheereza Musengwa Katonda waibwe. Era ekiseera kyonakyona kye yamala nga mulamu, abantu tibaalekeraku naire okugheereza Musengwa Katonda, Katonda wa badhaadha baibwe.

Isaia 31:6

Musengwa Katonda era yaakoba ati: “Imwe Abaisiraeli, mwandheemera inho mwakola ebibi. Aye mpegaano mukyuke mwire ye ndi.

Yeremia 15:19

Agho Musengwa Katonda yankoba ati: “Bw'onaira ye ndi, zeena ndidha kukwiza obe wange ompeerezenga. Bw'onaalekera okwogera ebiziramu makulu, n'oyogeranga eby'amakulu, oidha kwiramu okuba omulanzi wange. Abantu baidha kwidhanga y'oli, se ti iwe okujanga ye bali.

Yeremia 15:4

Ndidha kubafuula ekintu ekitiisa einho abantu boonaboona ku nsi, olw'ebyo Manasse mutabane wa Hezekia bye yakola mu Yerusalemu nga ni kyabazinga wa Buyudaaya.’

Yeremia 18:11

Kale ni kobera abantu b'omu Buyudaaya n'ab'omu Yerusalemu, oti ndi kukola entegeka okubakolaku akabi, era neetegeike okubabonereza. Bakobe buli muntu alekere okukola ebibi, era akyuse empisa dhe n'ebikolwa bye ebibi.

Yeremia 24:9

Ndidha kubafuula ekintu ekitiisa einho abantu boonaboona ku nsi, bafuuke eky'okwogerwaku era eky'okuyeeyereza. Baidha kubanga kivumo era kikolimo, eyo yoonayoona ye ndibasansaaniza.

Yeremia 25:5

abaabakobanga bati, ‘Buli muntu alekere okukola ebibi era akyuse empisa dhe embi. Memale olwo musigale nga muli mu nsi Musengwa Katonda ye yabagha, imwe ni badhaadha baimwe, ebenga yaimwe ku bwaimwe.

Yeremia 3:1

Musengwa Katonda akoba ati: “Omusaadha bw'abinga mukazi we, omukazi oyo naabayira omusaadha owundi, omusaadha oyo asobola kabiri okwiza omukazi oyo? Olwo ensi eyo eba teyonooneike? Aye imwe Abaisiraeli timwali beesigwa ye ndi, mwaba ng'oti malaaya bw'aba n'abagonzi be abangi. Aye obwo mwenda kabiri kwira ye ndi?

Yeremia 3:12

Kale ja olangirire bino eri Abaisiraeli oti, ‘Imwe Abaisiraeli abatali beesigwa, Musengwa Katonda akoba ati mwire y'ali. Taidha kubalingirira na bukambwe, kuba mwene asaasira. Era taidha kubasungughalira byanda na byanda.

Yeremia 3:14

Imwe abantu abatali beesigwa, mwire ye ndi, kuba ninze musengwa waimwe. Ndidha kutoolanga omuntu mulala mulala okuva mu buli kibuga, era ntoole abantu babiri babiri okuva mu buli maka, mbaleete e Sioni.’ ”

Yeremia 3:22

Musengwa Katonda akoba nti: ‘Imwe abatali beesigwa, mwire ye ndi, ndidha kubawonia mbafuule beesigwa.’ Ate imwe mukoba muti: ‘Bona eno, twidhie y'oli, kuba niiwe Musengwa Katonda waife.

Yeremia 35:15

Buliidho mbaire ntumanga ye muli abagheereza bange abalanzi aghazira kukoogha naire, babakobe mulekere okukola ebibi, mukole ebituufu. Era mulobe kujiiranga ku bakatonda abandi nga mubasinza, olwo musobole okusigalanga mu nsi ye nabagha imwe ni badhaadha baimwe. Aye nga imwe timumpulirisa, waire okufaayo ku bye nkoba.

Yeremia 36:3

Oba katyo abantu b'omu Buyudaaya bwe baliwulira ku kuzikirira okwo kwonakwona kwe ndi kutegeka okubasindikira, balikyuka baava mu mpisa dhaibwe embi. Olwo naabasonigha olw'obubi bwaibwe n'ebibi bye bakola.”

Yeremia 4:4

Mukuume endagaano ye mwakola ninze, nze Musengwa Katonda, era mwegheeyo ye ndi, imwe abantu b'omu Buyudaaya n'ab'omu Yerusalemu, ekiruyi kyange kirobe kutumbuka ng'oti n'omuliro omuntu gw'atasobola kuzikiza, olw'ebibi bye mwakola.”

Yeremia 7:3

Musengwa Katonda Afuga Amagye, Katonda wa Isiraeli, akoba ati: “Mulongoose empisa dhaimwe n'ebikolwa byaimwe, olwo ndidha kubaleka mubenga mu kifo kino.

Yeremia 7:5

“Mulongoose empisa dhaimwe n'ebikolwa byaimwe. Mukolenga ebituufu mu nkolagana ni banaimwe.

Yeremia 7:7

Olwo ndidha kubaleka mubenga mu nsi eno ye nagha eira badhaadha baimwe, ebe yaibwe byanda na byanda.

Ezekieli 11:18

Era bwe baliira, balitoolagho ebintu byonabyona ebibi ebyenhinhalwa.

Ezekieli 18:13

era yaawola omuntu lwa kumufunaku magoba olwo mwene yeeyongere okuba omukombe. Bwenebwene omuntu oyo agwaniire okuba omulamu? Busa naire, tibalimulekagho nga mulamu. Alifa olw'okukola ebyenhinhalwa ebyo byonabyona, era aliba nga ni mwene eyeereeteire okufa.

Ezekieli 43:9

Kale ni, bwe banaalekera okusinza ebitali nze Katonda, ni batoolagho n'ebiidhukizo by'emirambo gya bakyabazinga baibwe, olwo ndidha kubabangamu ebyanda n'ebyanda.”

Hosea 14:1

Imwe Abaisiraeli, mwire eri Musengwa Katonda, oyo Katonda waimwe, kuba ebibi byaimwe byabaleetera okwekontola mwagwa.

Hosea 2:2

Baana bange, mukobe ku inhaimwe, waire nga takaali mukazi wange, era nga zeena tikaali iba. Mumukobeku alekere okukola obwenzi n'obwamalaaya.

Hosea 7:16

Banvaaku baasinza omusambwa Baali, bali ng'oti kalaso akagodobanu akateesigika kuteeba. Abakulembeze baibwe balifiira mu ntalo olw'okwogera nga beesuuta. Era balisekererwa mu nsi Misiri.”

Yoeli 2:12

Musengwa Katonda akoba ati: “Ni bweriba mperaano, kwona mwenenie bya bwenebwene. Mwire ye ndi nga musiiba era nga mulira amaziga.

Zekaria 1:4

Mutaba ng'oti ni badhaadha baimwe, abalanzi ab'eira be baakoberanga obukwenda bwange nze Musengwa Katonda Afuga Amagye. Abalanzi baakobanga badhaadha baimwe okuva mu mpisa dhaibwe embi ni mu bikolwa byaibwe ebibi. Aye badhaadha baimwe baaloba kuwulira nze Musengwa Katonda bye mbakoba, waire okufaayo okukola bye mbalagira.

Amateeka Agokubiri 27:15

‘Omuntu yeenayeena anaakolanga ekifaananie ekibaadhe, oba ekisaanuusiibwa mu kyuma, memale n'akitaagho n'akisinza, akolimirwenga! Kuba okusinza ebitali Katonda kiba ekyenhinhalwa ye Musengwa Katonda.’ Olwo abantu boonaboona baliiramu bati, ‘Amiina.’

Amateeka Agokubiri 4:30

Bwe munaabanga nga muli mu nnaku ng'ebyo byonabyona bibaidhiire, mu biseera eby'oluvainhuma muliira eri Musengwa Katonda waimwe, mwagondera by'abakoba

Yoshua 24:14

“Mpegaano ni mutyenga Musengwa Katonda era mumugheerezenga n'omwoyo mulala nga muli beesigwa. Musuule ere bakatonda badhaadha baimwe be baagheerezanga nga bakaali eruuyi ere ng'osomoike omwiga era ni bwe baali nga bakaali e Misiri, mugheereze Musengwa Katonda yenka.

Abalamuzi 10:16

Kale baasuula ere bakatonda b'abamaghanga agandi, baasinza Musengwa Katonda. Musengwa Katonda oyo yaawulira enaku ku mwoyo olw'okudaazibwadaazibwa kwa Isiraeli.

1 Samueli 7:3

Agho Samueli yaakoba Abaisiraeli boonaboona ati: “Oba nga mwenda okukyuka okwira ku Musengwa Katonda n'omwoyo gwaimwe gwonagwona, mutoolegho emisambwa egy'amaghanga agandi gyonagyona era mutoolegho n'ebifaananie eby'omusambwa omukazi Ashitarothi. Mwegheereyo irala eri Musengwa Katonda, yenka ye mube mugheereze. Aidha kubawonia Abafilisiti.”