Yeremia 32:21 - Baibuli Ekibono kya Katonda 2014

²¹ Watoola abantu bo Abaisiraeli mu Misiri ng'okozesa amaani go agataloodheka. Waakola ebyewuunhio n'ebyewuninkiriza, era waaleetera ebintu ebitiisa einho okubaagho.

Yeremia 32:21 ပူးပေါင်းရင်းမြစ်များ

2 Samueli 7:23

Kale ighanga ki erindi ku nsi, eriri ng'oti n'ery'abantu bo Abaisiraeli iwe Katonda be waja n'onunula babe abantu bo? Waabakolera ebintu ebikologho era ebitiisa, ebyaleetera eriina lyo okumanhika mu nsi yoonayoona, ng'obingayo abamaghanga agandi n'emisambwa gyaibwe mu biketezo bye baalimu, ng'abantu bo bali kumpi okutuukayo.

1 Bakyabazinga 8:42

kuba abantu baliwulira nga bw'oli omukologho era nga bw'okola eby'amaani ebitaloodheka, memale n'aidha okukusinza ng'alingiriire eisinzizo lino,

1 Ebyomubyanda 17:21

Kale ighanga ki erindi ku nsi, eriri ng'oti n'ery'abantu bo Abaisiraeli iwe Katonda be waja n'onunula babe abantu bo? Waabakolera ebintu ebikologho era ebitiisa, ebyaleetera eriina lyo okumanhika mu nsi yoonayoona, waabingayo abamaghanga agandi mu biketezo bye baalimu, ng'abantu bo be wanunula e Misiri bali kumpi okutuukayo.

Zabbuli 105:37

Agho yaatoola Abaisiraeli mu nsi omwo, baaja n'ebintu ebya feeza n'ebya zaabu, nga boonaboona balamu era nga ba maani.

Zabbuli 105:43

Kale yaatoola abantu be mu nsi omwo nga basangaavu, abantu be abo be yeerondera baavaamu nga bemba.

Okuvaayo 13:14

Era mu biseera eby'omu maiso eyo, abaana baimwe bwe balibabuuzanga bati, ‘Kino kitegeeza ki?’ Mubainhonholanga muti, ‘Musengwa Katonda yatutoola mu Misiri mu bwiru ng'akozesa amaani ge agataloodheka,

Okuvaayo 13:9

Era lwidha kubabeereranga kamanhiso ng'oti n'omuntu k'ata ku mukono, era lubabeerenga ekiidhukizo ng'oti n'omuntu ky'asiba mu bweni, olwo amateeka ga Musengwa Katonda galobenga kubava ku minwa; kuba Musengwa Katonda yabatoola mu Misiri ng'akozesa amaani ge agataloodheka.

Okuvaayo 3:20

Kale nja kukozesa amaani gange mbonereze Misiri nga ngisindikira ebintu ebitiisa era ebyewuunhisa. Oluvainhuma lw'ebyo kyabazinga alibaleka mwavaayo.

Okuvaayo 6:1

Aye Musengwa Katonda yaakoba Musa ati: “Buti oja kubona kye nja okukola kyabazinga oyo, kuba aja kukakibwa bukakibwe na maani abakobe baje bwenebwene olw'okukakibwa okwo aja na kubabinga bubinge bave mu nsi ye.”

Okuvaayo 6:6

Agho ni, kobera Abaisiraeli oti, ‘Ninze Musengwa Katonda, era ndidha kubatwikula emirimo emikalangufu Abamisiri gye babakaka okukola. Nja kugolola omukono gwange ogw'amaani, mbonereze Abamisiri n'ebibonerezo ebikakali, mbanunule imwe era mbawonie okuba abairu baibwe.

Isaia 63:12

Musengwa Katonda oyo ali gha, eyakozesa obuyinza bwe, n'akola eby'amaani ng'abita mu Musa, n'ayawulamu amaadhi g'enhandha ng'abantu babona olwo eriina lya Musengwa Katonda oyo ni limanhikananga ebyanda n'ebyanda?”

Amateeka Agokubiri 11:3

Mwabona ebyewuunhio n'ebyewuninkiriza, bye yakolera e Misiri ku kyabazinga waayo, ni ku nsi Misiri yoonayoona.

Amateeka Agokubiri 26:8

Yaatutoola mu Misiri ng'akozesa amaani ge agataloodheka. Yaakola ebyewuunhio n'ebyewuninkiriza, era yaaleetera ebintu ebitiisa einho okubaagho.

Amateeka Agokubiri 4:34

Oba ghalighooku katonda eyaali ageziizaaku okuja okutwala abantu ab'eighanga erindi, abafuule ababe ng'abatoola ghagati mu ighanga erindi, nga Musengwa Katonda waimwe bweyabakolera imwe mu Misiri? Yakozesa amaani ge agataloodheka, yaasindika ebibamba n'olutalo, yaakola ebyewuunhio n'ebyewuninkiriza, era yaaleetera ebintu ebitiisa einho okubaagho, nga mubona.

Amateeka Agokubiri 7:19

Mwidhukirenga ebibamba ebitiisa bye mweboneraku beene n'amaiso gaimwe, n'ebyewuunhio, n'ebyewuninkiriza, n'amaani agataloodheka, Musengwa Katonda waimwe bye yakozesa okubanunulayo. Atyo Musengwa Katonda waimwe bw'aidha okukola ni ku bantu abo boonaboona be muli kutya.