Yeremia 30:5 - Baibuli Ekibono kya Katonda 2014

⁵ “Nawulira amamiro g'omuntu ali kudhugumira, omuntu atiire einho era azira miraala naire.

Yeremia 30:5 ပူးပေါင်းရင်းမြစ်များ

Isaia 5:30

Olunaku olwo bwe lulituuka, baliwologomera mu Isiraeli, ng'oti n'enhandha bw'ewolomboka. Omuntu bw'aliringirira ensi eyo, alibona nzikiiza na nnaku byonka, ng'ebire bikingiriiza omusana, enzikiiza yaidha.

Isaia 59:11

Twenatwena twidhula okutya, twavuuma ng'oti bisolo bikambwe, era twalira ng'oti maghemba. Twegomba Katonda aidhe atuwonie okutuntuzibwa, aye ghazira kikolebwa naire. Era twegomba okulokolebwa, aye kwatuba ghala inho.

Yeremia 12:12

Abanhazi babisebise mu nsozi dhoonadhoona edh'omu irungu edhiziraku kantu. Nze Musengwa Katonda nsindiike olutalo okuzikiriza ensi eyo yoonayoona. Era ghazira muntu ali mu miraala.

Yeremia 25:36

Wulira abakulembeze bwe bali kulira, n'abo abalabirira abantu bwe bali kuwowoola. Musengwa Katonda azikiriiza eighanga lyaibwe,

Yeremia 30:4

Musengwa Katonda akoba abantu b'omu Isiraeli n'ab'omu Buyudaaya ati:

Yeremia 46:5

Aye Musengwa Katonda yeebuuza ati: “Kiki kye ndi kubona? Batiire inho era bali kwira einhuma! Abalwani baibwe ab'amaani baghangwirwa, baaziinhuuka embiro nga bagwidhubana, aghazira kulinga na inhuma. Era buli ghantu ghali ntiisa ndhereere!

Yeremia 6:22

Musengwa Katonda akoba ati: “Bona, ghaligho abantu abaidha okwidha nga bava mu nsi eri ku luuyi olw'omukono omugooda olw'e buvandhuba, eighanga ery'amaani eryo eriva eghala einho liri kwetegekera okulwana olutalo.

Yeremia 6:26

Musengwa Katonda yaakoba abantu be ati: “Imwe abantu bange, muvaale ekutiya era mwevulunge mu ivu olw'enaku. Mulire ng'oti n'alira mutabane we omulala bedengedenge. Mulire lukalukalu, kuba oyo ali kwidha okuzikiriza, aidha kubagwaku bugwe nga timwidhi.

Yeremia 8:16

Abazigu baife bamaze okutuuka mu kibuga ky'e Dani. Embalaasi dhaibwe tudhiwulira nga dhiri kugufula, era nga dhiri kukuba emyasi, n'ensi yoonayoona yaadhugumira. Abazigu baife bali kwidha okuzikiriza ensi yaife n'ebigirimu byonabyona, era bazikirize ebibuga byaife n'abantu ababirimu boonaboona.”

Yeremia 8:19

Wulira, abantu bange bali kulira woonawoona mu ighanga, bati: “Musengwa Katonda takaaba mu Sioni? Oyo Kyabazinga ow'ensi eno takaabaamu?” Aye Musengwa Katonda yaabairamu ati: “Lwaki mwansoononkereza ni mundeetera okusungughala, nga musinza ebifaananie ebibaadhe, ni musinza ebintu ebitali Katonda?”

Yeremia 9:19

Wulira amaliro agali kuva mu Sioni nga gakoba gati: “Tuzikiriire! Era tuswaire inho; kuba bakonseegho endhu dhaife, twava mu nsi yaife.”

Amosi 8:10

Era akoba ati: “Ndifuula ebibinuko byaimwe byaba mikolo gya kulira, n'enhembo dhaimwe dhaaba kugegenga. Ndibamwesaaku enviiri ku mitwe gyaimwe okudhimaliriraku ng'oti mpaata, naabaleetera okwesiba ebikaakaati mu nkende mwanakughala, mwaba ng'oti n'abazaire abafiiriirwa omwana waibwe omulenzi omulala bedengedenge. Olunaku olwo luliba lwa bulumi lwonalwona.

Habakkuku 1:10

Tibata kinhagansi mu bakyabazinga, era batwala buli mufuzi ng'eky'okuzaanhisa. Ezira kifo kya kwewogomamu kibalema; bakibungaku emungo ey'eitaka kwe baniinira, baakitwala.

Habakkuku 1:6

Bona eno, nja kuleetera Abababilonia babe eighanga ery'amaani einho era ery'obukumu. Baje n'obukambwe mu nsi yoonayoona nga banhaga ebiketezo eby'abantu abandi.