Yeremia 27:22 - Baibuli Ekibono kya Katonda 2014

²² Biidha kutwalibwa e Babilonia, era bisigale eyo okutuusa lwe ndiiramu kabiri okubirowoozaaku, ni mbiiza mu kifo kino. Nze Musengwa Katonda, ninze nkobye.”

Yeremia 27:22 ပူးပေါင်းရင်းမြစ်များ

2 Bakyabazinga 25:13

Abababilonia baamenhamenha empango edh'ekyuma eky'ekikomo edhaali mu isinzizo lya Musengwa Katonda, n'ebituuti ebiriku enkede eby'ekyuma eky'ekikomo, n'etanka enkologho nga yoona ya kyuma kya kikomo. Bwe baamala, baatoola ekyuma eky'ekikomo ekyava mu bintu ebyo, baakitwala e Babilonia.

2 Ebyomubyanda 36:21

Ekyo kyabaagho okutuukiriza Musengwa Katonda bye yayogera ng'abita mu Yeremia omulanzi, ati: “Ensi erirekebwa agho etyo okumala entangama ya myaka nsanvu ng'ewuumula, olw'okwesasuuza ekiwuumulo kya Sabbato kye baali tibakuzanga.”

Ezera 1:11

Ebintu byonabyona ebya zaabu n'ebya feeza aghalala, byali enkumi itaanu na bina (5,400). Ebintu ebyo byonabyona Sheshibazzari yabitwala e Yerusalemu ghalala n'abaali mu bunhage, okuva mu nsi Babilonia.

Ezera 7:19

Ebintu bye bakughaire okukozesebwanga mu isinzizo lya Katonda waimwe, mwidha kubitwala mubigheeyo eri Katonda e Yerusalemu nga mutuuse.

Ezera 7:9

Katonda yaaba ghalala nabo, baatuuka e Yerusalemu ku lunaku olusooka olw'omwezi ogwokutaanu.

Ensambo 21:30

Amagezi, n'okutegeera era n'okugalagirwa, byonabyona tibisobola kutakania Musengwa Katonda ni bimusinga.

Yeremia 20:5

Era nja kuleka abazigu baimwe banhage eby'obukombe byaimwe byonabyona ebiri mu kibuga muno, n'ebintu abantu bye baafaabiikanira, n'eby'omughendo einho omuli n'ebya bakyabazinga ab'omu Buyudaaya. Ebyo byonabyona abazigu abo balibinhaga baabitwala e Babilonia.

Yeremia 27:21

Musengwa Katonda akoba ati: “Muwulire bino nze Musengwa Katonda Afuga Amagye bye nkoba, ebigema ku bintu ebyasigala mu isinzizo, ni mu kisaagaati kya kyabazinga wa Buyudaaya e Yerusalemu:

Yeremia 27:7

Amaghanga goonagoona galimugheereza era gaagheereza ni mutabane we ni mwidhukulu we, okutuusa ekiseera bwe kirituuka eighanga lye ni ligwa. Olwo eighanga lye lyona lyafuuka mugheereza wa amaghanga kamaala ag'amaani, agafugibwa bakyabazinga abakologho.

Yeremia 29:10

“Musengwa Katonda akoba ati, ‘Emyaka ensanvu gye nagha Babilonia okubafugiramu bwe giriwaaku, imwe ndibooleka nga bwe mbalumirwa, naatuukiriza kye nasuubiza eky'okubaiza eka.

Yeremia 32:5

Zedekia balimutwala e Babilonia yaaba eyo okutuusa lwe ndisalagho eky'okumukolera. Ni bw'anaagezaaku atya okulwanisa Abababilonia taja kubaghangula. Nze Musengwa Katonda, ninze nkobye.”

Yeremia 34:2

Musengwa Katonda, Katonda wa Isiraeli yankoba nje nkobe kyabazinga Zedekia owa Buyudaaya nti Musengwa Katonda akoba ati: “Bona, nze Musengwa Katonda, Katonda wa Isiraeli nja kughaayo ekibuga kino mu ngalo dha kyabazinga ow'e Babilonia, era aja kukyokya omuliro.

Yeremia 34:3

Era iwe kyabazinga Zedekia weena toliwona. Balikugema baakutwala ye kyabazinga w'e Babilonia oyo, waayogera naye nga mubonagana maiso ku maiso. Era balimala baakutwala e Babilonia.

Yeremia 34:5

Olifa bya bulungi mu miraala. Era ng'abantu bwe baaniosanga obubbaani nga baziika badhaadha bo abaali bakyabazinga okukusooka, weena batyo bwe balikuniokeza obubbaani. Baja kukulira nga bakoba bati, ‘Wo Kyabazinga waife atufiireku!’ Nze Musengwa Katonda, ninze nkobye.”

Danieli 5:23

Weekuluntaliiza ku Musengwa ow'eigulu. Waalagira baaleeta ebikopo ebyatoolebwa mu isinzizo lye, olwo iwe mwene n'abakungu bo, ni bakazi bo ab'omu ndhu n'ab'embali, mwabinhweramu omwenge ogw'emizabbibu. Era mwasaaka ebisinzibwa ebitali Katonda, ebitabona, waire okuwulira, oba okutegeera, bye baakola obw'omu zaabu, ni mu feeza, ni mu kyuma eky'ekikomo, ni mu kyuma ekigumu einho, ni mu miti, ni mu mabaale. Aye mwaloba kuta kitiisa mu Katonda oyo agemereire obulamu bwaimwe era abalabirira mu buli nsambo.

Danieli 9:2

nze Danieli nali ndi kwetegereza ebyaghandiikibwa ebitukuvu, naabona ng'emyaka gija kuba nsanvu, ekibuga Yerusalemu gye kiri n'okumala nga kisigaire bifulukwa byereere, nga Musengwa bwe yamanhisa Yeremia omulanzi.