Yeremia 23:8 - Baibuli Ekibono kya Katonda 2014

⁸ Aye balayirenga mu liina lyange nga Katonda omulamu eyatoola Abaisiraeli mu nsi eri ku luuyi lw'omukono omugooda olw'e buvandhuba, ni mu nsi edhindi dhoonadhoona ye nali mbabingiire. Agho baliba mu nsi eyaibwe yeene.”

Yeremia 23:8 ပူးပေါင်းရင်းမြစ်များ

Isaia 11:11

Olunaku olwo bwe lulituuka, Musengwa Katonda aliiramu okukozesa obuyinza bwe, yaiza abantu be abaliba bawoniegho, yaabatoola mu Assiria, ni mu Misiri, ni mu Pathirosi, ni mu Ethiopia, ni mu Elamu, ni mu Shinari, ni mu Hamathi, ni mu biketezo eby'oku nhandha.

Isaia 14:1

Musengwa Katonda aliiramu okugemerwa Abaisiraeli ekivunika, yaabalonda kabiri okuba abantu be. Era alibaizaayo mu nsi yaibwe, baaba omwo. N'abasenze baliidha baabeeyimbaku, baabanga ghalala ni baidhukulu ba Yakobo abo.

Yeremia 16:14

“Musengwa Katonda yaakoba ati, ekiseera kiri kwidha, mube nga timukaalayira mu liina lyange nga Katonda omulamu eyatoola Abaisiraeli mu nsi Misiri.

Yeremia 16:15

Aye mulayirenga mu liina lyange nga Katonda omulamu eyatoola Abaisiraeli mu nsi eri ku luuyi lw'omukono omugooda olw'e buvandhuba, ni mu nsi edhindi dhoonadhoona ye nali mbabingiire kuba nja kubaiza mu nsi yaibwe ye nagha badhaadha baibwe. Nze Musengwa Katonda, ninze nkobye.”

Yeremia 23:3

Nze mwene ndidha kusoloza abantu bange abaliwonagho nga mbatoola mu nsi dhoonadhoona ye nababingira, mbaize mu nsi yaibwe. Balizaalagana baaba kamaala.

Yeremia 29:14

Bwenebwene mulimbona, naabaleetera ebintu byairamu okubajiiranga obukalamu. Era naabasoloza okuva mu nsi dhoonadhoona ni mu bifo byonabyona mwe nababingira, naabaiza mu nsi mwe nabatoola okubasindika mu bunhage. Nze Musengwa Katonda, ninze nkobye.’

Yeremia 30:10

Kale ni, imwe abantu bange Abaisiraeli, mutatya, waire okweraliikirira. Mubone eno, nze ndibanunula, naabatoola mu nsi eyo ey'eghala, ensi ye mulimu ng'abasibe. Muliira ewaimwe mwatyama mwatereera nga muli mu miraala, era nga ghazira kibatiisa naire.

Yeremia 30:3

kuba bona eno, ekiseera kiri kwidha lwe ndireetera abantu bange Abaisiraeli n'Abayudaaya ebintu okwiramu okubajiiranga obukalamu. Ndibaiza mu nsi ye nagha badhaadha baibwe, era bairamu okugitwala yaaba yaibwe ku bwaibwe. Nze Musengwa Katonda, ninze nkobye.”

Yeremia 31:8

Bona eno, ndibaiza okuva mu bunhage mu nsi eri ku luuyi olw'omukono omugooda olw'e buvandhuba, naabasoloza okuva eghala einho. Abatulu n'abalema, abakazi abali enda n'abali okumpi okuzaala, boonaboona baliidhira ghalala nabo. Baliira baaba eighanga eikologho.

Yeremia 32:37

Bona, ndidha kusoloza abantu bange okuva mu nsi dhoonadhoona ye nabasansaaniza nga mbasungughaliire ebitaloodheka, mbaize mu kifo kino era mbaleetere okukibaamu mu miraala.

Yeremia 8:3

Abantu boonaboona ab'omu ighanga lino eibi, abaliwonagho eyo yoonayoona ye ndiba mbabingiire, balyegomba okufa okusinga okuba abalamu. Nze Musengwa Katonda Afuga Amagye, ninze nkobye.”

Ezekieli 28:25

Musengwa Katonda era yaakoba ati: “Bwe ndimala okusoloza Abaisiraeli ni mbatoola mu maghanga mwe baasansaanira, olwo ab'amaghanga goonagoona balibona bwendi omutukuvu. Era Abaisiraeli abo baliba mu nsi yaibwe, ye nagha omugheereza wange Yakobo.

Ezekieli 34:13

Ndidhitoola eyo mu maghanga, naadhisoloza okuva mu nsi ye dhaasansaanira, naadhiiza mu nsi yaadho. Naadhaayiranga ku nsozi edh'omu Isiraeli, aghali ensulo edh'amaadhi, mu bifo ebibaamu abantu.

Ezekieli 36:24

Ndibatoolayo eyo mu maghanga, naabasolozaayo eyo mu nsi dhoonadhoona, naabaiza mu nsi eyaimwe.

Ezekieli 36:35

Era balikoba bati, ‘Eno ensi eyali erekeibwa obwagho etyo ng'eri bifulukwa byereere, buti efuuse ng'oti n'enimiro ey'e Edeni! N'ebibuga ebyali byonooneibwa era nga byona birekeibwa bw'agho bityo nga biri bifulukwa byereere, buti birimu abantu era byezungulwirwa ebimante ebigumu!’

Ezekieli 37:25

Baliba mu nsi ye nagha Yakobo omugheereza wange, ensi badhaadha baibwe mwe baabanga. Beene, n'abaana baibwe, ni baidhukulu baibwe, omwo mwe baliba ebyanda n'ebyanda. Era kyabazinga ali ng'oti n'omugheereza wange Daudi, n'aja okubafuganga ebyanda n'ebyanda.

Ezekieli 39:28

Olwo abantu bange balimanha nga ninze Musengwa Katonda waibwe kuba ninze nabasindika mu bunhage mu maghanga, kabiri naamala naabasoloza, naabaiza mu nsi eyaibwe nga ghazira waire omulala ati ye ndeseeyo mu maghanga.

Yoeli 3:7

Aye mperaano nja kuleetera abantu abo okuva eyo ye mwabatunda, olwo mwena mbeesasuulizeeku nga mbakola kyene ekyo kye mwabakola.

Mika 7:15

Wo Musengwa Katonda, tukolere ebyewuunhio nga bwe wakolanga mu biseera bye twalinga e Misiri.

Zefania 3:20

Mu kiseera ekyo mwenamwena nja kubasololeza ghalala mbaize eka. Bwenebwene nja kubafuula bamanhifu era abasaakibwa mu nsi yoonayoona, era mbairizeegho ebirungi nga mwenamwena mubona.” Musengwa Katonda n'akobye.