Yeremia 23:16 - Baibuli Ekibono kya Katonda 2014

¹⁶ “Agho Musengwa Katonda Afuga Amagye yaakoba abantu b'e Yerusalemu ati: ‘Mutawulirisa balanzi bye babakoba, nga babasuubiza ebizirayo. Ebyo bye babakobera babiyiiya buyiiye mu myoyo gyaibwe, se ti ebyo nze bye mbakoba.

Yeremia 23:16 ပူးပေါင်းရင်းမြစ်များ

1 Bakyabazinga 22:11

Agho owundi ku balanzi abo, eriina lye nga ni Zedekia mutabane Kenaana, yeekolera amayiga mu kyuma ekigumu einho, yaakoba ati: “Musengwa Katonda akoba ati, ‘Amayiga gano g'oidha okukozesa okufula Abasiria okutuusa lw'olibaghangula.’ ”

2 Bakyabazinga 17:15

Baaloba kugemanga biragiro bye, waire okukuuma endagaano ye yakola ni badhaadha baibwe, era baaloba kufangayo ku kulabula, kwe yabalabulangamu. Baasinzanga ebisinzibwa ebitali Katonda ebitagasa, olwo ni beene baafuuka ebitagasa, era baajiiranga ku mpisa edh'abamaghanga agandi agabeezungulwire. Ate nga Musengwa Katonda yabalobera okwebisanga ng'oti n'abamaghanga ago.

2 Ebyomubyanda 18:5

Agho kyabazinga wa Isiraeli yaasoloza abalanzi ebikumi bina (400), yaababuuza ati: “Nje numbe Ramothi eky'e Gileadi, oba ntakirumba?” Bairamu bati: “Ja okirumbe, Musengwa Katonda aidha kukikugha okighangule.”

Ensambo 19:27

Mwana wange, bw'olekera okuwulirisa bye nkugalagira, oidha kwerabira ni bye wali oidhi.

Yeremia 14:14

Aye Musengwa Katonda yankoba ati: “Abalanzi abo balanga bya buguya mu liina lyange. Nze tibatumangaku oba okubalagira ekintu kyonakyona, waire okwogera nabo. Okubonekerwa kwe boogeraku kwa buguya, ni bye balagula biziramu makulu, babiyiiya buyiiye beene.

Yeremia 2:5

Musengwa Katonda akoba ati: “Kisobyo ki badhaadha baimwe kye bambonamu, memale ni basalagho okunvaaku. Ni baja okusinza ebintuntu ebiziramu makulu, era ni beene ni bafuuka abaziramu makulu?

Yeremia 23:21

Agho Musengwa Katonda yaakoba ati: “Nze tyatuma balanzi abo, aye beene baaja buje. Tyabagha bukwenda naire, aye beene baalanga bulange mu liina lyange.

Yeremia 23:26

Abalanzi abo balikomya li okudaaliimya abantu bange, nga babakobera eby'obuguya bye bayiiya obuyiiye?

Yeremia 29:23

Ebyo n'ebiribatuukaku kuba beereetaku omusango bwe baakola ebibi ebitakobeka mu Isiraeli. Baayenda ku baka banaibwe, era baayogera eby'obuguya nga bakozesa eriina lya Musengwa Katonda, ate nga Musengwa Katonda oyo tabatumangaku kubyogera. Musengwa Katonda mwene oyo aidhi bye baakola era mwene n'omudhulizi abalumiriza. Musengwa Katonda mwene, n'akobye.”

Yeremia 29:8

Nze Musengwa Katonda Afuga Amagye, Katonda wa Isiraeli, ndi kubalabula nti mutaganhanga balanzi ababa mu imwe kubaguya, waire omuntu owundi yeenayeena akoba ati asobola okulagula ebiri mu maiso. Mutawulirisanga birooto byaibwe bye beeroosaloosa.

Yeremia 9:12

Nze naabuuza Musengwa Katonda nti: “Wo Musengwa Katonda, lwaki ensi eyonooneike n'eba nkalu ng'oti irungu, era ni ghabula omuntu agibitamu? Naani omugezi asobola okutegeera kino? Naani ye wakiinhonhola asobola okukobera abandi?”

Yeremia 9:20

Nze naakoba nti: “Bakazi imwe, muwulire ebibono bya Musengwa Katonda, era mwetegereze by'akoba. Mwegerese baghala baimwe okulira amaziga, era buli muntu ayegerese mwine okugegenga;

Okulira 2:9

Endhigi dhaakyo dhaagwa era ebiwumpu byadheebungaku, n'eminhololo egyadhisibanga gyamenhekamenheka. Kyabazinga waamu n'abakungu be bali eyo mu maghanga mu bunhage, era mu kibuga ekyo timukaalimu mateeka. Abalanzi baamu tibakaabonekerwa Musengwa Katonda.

Ezekieli 13:16

abo nga n'abalanzi ab'omu Isiraeli abaalanga ku Yerusalemu, bati baabonekerwa nga kija kubaamu miraala myereere, waire nga mu butuufu bwene tighaali miraala naire. Nze Musengwa Katonda ninze nkobye.”

Ezekieli 13:23

Kale ni timukairayo kufuna kubonekerwa kwa bulimba, waire okwiramu kabiri okulanga eby'obuguya. Nja kuwonia abantu bange mbatoole mu buyinza bwaimwe, olwo mumanhe nga ninze Musengwa Katonda.”

Ezekieli 13:3

Musengwa Katonda akoba ati: “Abalanzi abo abasiru bakagwireku, abajiira ku bye bayiiyiiza obuyiiye beene nga ghazira na kubonekerwa kwonakwona kwe bafunie.

Ezekieli 13:6

Balimba abantu bati babonekeirwa era baalanga eby'obuguya. Baabakobera mbu bali kwogera bukwenda bwange nze Musengwa Katonda, ate nga ti ninze mbatumye. Era basuubira mbu nze ndidha kutuukiriza bye bakobye.

Ezekieli 22:28

Abalanzi baamu baghemba ku bibi ebyo, ng'omuntu bw'asiiga ekimante langi endheru. Okubonekerwa kwe bafuna kwa buguya, ni bye balagula ti bituufu naire, nga bakoba mbu, ‘Musengwa Katonda akoba ati,’ ate nga nze Musengwa Katonda nzira kye nkobye naire.

Mika 2:11

“Abantu bano benda omulanzi aja ng'abakobera obukwenda obwidhwire okuguya, ng'abakoba ati, ‘Mwidha kufunanga omwenge ogw'emizabbibu n'ebitamiiza ebindi.’

Matayo 7:15

“Mwekuume abalanzi abaguya, abo abaidha ye muli nga beefuula bawolu oti ntaama, ate nga munda n'emisege emiswankuzi.

Ab'e Roma 1:21

Waire baamanha Katonda aye tibaamwisaamu kitiisa nga Katonda, oba okumwebaza. Aye baira mu kulowooza bitagasa n'emyoyo gyaibwe egizira kye giidhi gyaidhula enzikiiza.

1 Yoanne 4:1

Bakagwa, mutaikirizanga buli mwoyo, aye mulebenga buli mwoyo mubone oba nga wa Katonda; kuba abalanzi kamaala abaguya basansaaniire mu nsi.