Yeremia 21:4 - Baibuli Ekibono kya Katonda 2014

⁴ “Muje mukobe Zedekia muti Musengwa Katonda, Katonda wa Isiraeli akoba ati, ‘Nja kughangula eigye lyo eriri kulwanisa kyabazinga w'e Babilonia n'eigye lye eribazingiiza okubeezunguluza. Era nja kusolokeza eby'okulwanisa byaimwe ghagati mu kibuga.

Yeremia 21:4 ပူးပေါင်းရင်းမြစ်များ

Isaia 10:4

Muliba nga muzira kindi kya kukola okutoolaku okutwalibwa mu busibe, oba okwitibwa mu lutalo. Aye waire ng'ebyo bimaze okubaagho, obusungu bwe bwidha kusigala nga bukaaligho. Era asigale ng'akaagalwire omukono gwe okubabonereza.

Isaia 13:4

Muwulire akasasamalo akali ku lusozi ng'oti n'amamiro ag'olukunkumuli lw'abantu. Muwulire okwasiikana okw'obwakyabazinga, okwasiikana okw'amaghanga agali kwesoloza. Musengwa Katonda Afuga Amagye ali kusoloza eigye okulwana olutalo.

Isaia 5:5

Mpegaano ka mbakobere kye nja okukolera eisamba lyange eryo: Nja kulitoolaku olukomera olulyezungulwire, mmenhegho n'ekigo ekirikuuma, ensolo dhiriire omwo era dhirityankirire.

Yeremia 20:4

Musengwa Katonda mwene akobye ati, ‘Bona, ndidha kukufuula ekintu ekitiisa eri iwe mwene n'eri bakagwa bo, era olibona nga boonaboona baitibwa abazigu baibwe mu lutalo. Nja kughaayo abantu b'omu Buyudaaya boonaboona mu ngalo dha kyabazinga w'e Babilonia. Abandi alibatwala e Babilonia ng'abanhage, ate abandi yaabaita.

Yeremia 21:3

Agho nze naabakoba nti:

Yeremia 32:24

Bona, Abababilonia babunze ku kibuga emungo ey'eitaka ey'okuniiniraku, nga benda bakirumbe bakigeme. Olw'okuba ghaligho olutalo, n'endhala, n'endwaire ya kawumpuli, Abababilonia abo baidha kusobola okugema ekibuga kino. Era obona nga bye wakoba byonabyona bituukiriire.

Yeremia 32:3

Kyabazinga Zedekia n'eyalagira bansibe kuba nalanga nti Musengwa Katonda yakoba ati: “Nja kuleka kyabazinga w'e Babilonia ageme ekibuga kino.

Yeremia 32:5

Zedekia balimutwala e Babilonia yaaba eyo okutuusa lwe ndisalagho eky'okumukolera. Ni bw'anaagezaaku atya okulwanisa Abababilonia taja kubaghangula. Nze Musengwa Katonda, ninze nkobye.”

Yeremia 33:5

Abababilonia bali kwidha okulwana, baidhuze endhu edho n'ekisaagaati ekyo emirambo egy'abo be nja okwita mu busungu n'ekiruyi. Ekibuga kino nkirekuliire agho olw'ebikolwa ebibi abantu baamu bye bakola.

Yeremia 35:17

Kale ni, nze Musengwa Katonda Afuga Amagye, Katonda wa Isiraeli, nja kutuusa abantu b'omu Buyudaaya n'ab'omu Yerusalemu ku kuzikirira, nga bwe nabeesoomera eira. Kino nja kukikola lwa kuba nayogera n'imwe aye mwaloba kumpulirisa, era naabeeta aye mwaloba kunvugira.”

Yeremia 39:3

Bwe baamala okugema Yerusalemu, abakungu abakulu boonaboona aba kyabazinga w'e Babilonia bangira baatyama mu bifo ebyali ku gwetebwa Omulyango Ogwaghagati. Abakungu abo nga ni bano: Nerugali Sharezeri, Shamugari Nebo, Sarasekimu Rabusarisi, ni Nerugali Sharezeri owundi.

Yeremia 52:18

Baatwala ensugha, n'ebitiiyo, ni makansu edhisala ebisiriiza ku ntambi dh'entaala, n'ebintu mwe baatanga obubbaani, n'ebintu ebindi byonabyona eby'ekyuma eky'ekikomo bye baakozesanga mu kugheereza mu isinzizo.

Okulira 2:3

Amaani Abaisiraeli ge baali nago, Musengwa yasungughala ekibitiriire yaagabamalamu. Yaalekera agho okubabeera, baalumbibwa abazigu. Obusungu bwe bwayakira ku Bayudaaya ng'oti muliro, yaazikiriza buli kintu.

Okulira 2:5

Musengwa yafuuka ng'oti muzigu wa Baisiraeli yaabazikiriza; yaazikiriza ebisaagaati eby'abakungu byonabyona era yaamenhamenha ebifo eby'okwewogomamu byafuuka bifulukwa byereere. Yaaleetera okulira mu Bayudaaya okweyongera.

Okulira 2:7

Musengwa yazira alutaari ye, yaalekulira agho eisinzizo lye. Era yaganha abazigu baamenha ebisenge byalyo. Abazigu baakubira mu ndhu ya Musengwa emizira egy'obughanguzi, ng'oti n'Abaisiraeli beene bwe baakubirangamu emizira egy'embaga edh'ebibinuko ebyalagirwa.

Ezekieli 39:3

Agho ndikuba akalaso ko, kaakuva mu mukono omugooda, era naaleetera obusaale bwo bw'ogemye mu mukono omusaadha okugwa.

Hosea 9:12

Aye ni bwe balizaala abaana, era ndibabatoolaku boonaboona ghaaloba kusigalagho waire omulala ati omulamu. Lwe ndibavaamu ni mbalekulira agho, baliba bakagwireku!”

Zekaria 14:2

Musengwa Katonda akoba ati alisoloza abantu b'amaghanga goonagoona, baalumba Yerusalemu mu lutalo. Balikighangula, baanhagulula ebintu mu mayumba, era baagema abakazi baabakaka. Ekitundu ku bantu baamu balitwalibwa mu bunhage, aye abalisigalagho tibalitoolebwa mu kibuga.

Matayo 22:7

Kyabazinga yaanakughala, yaasindika amagye ge gaazikiriza abaisi abo era gaayokya n'ekibuga kyaibwe.