Yeremia 2:20 - Baibuli Ekibono kya Katonda 2014

²⁰ Musengwa Katonda akoba ati: “Imwe Abaisiraeli, mwava ira nga muloba nze okubafuga, mwandheemera, mwakoba muti, ‘Titwidha kumusinzanga.’ Era mwasinzizanga emisambwa ku buli lusozi olugulumivu, na buli ghansi mu kinsense eky'omuti omuzibirivu.

Yeremia 2:20 ပူးပေါင်းရင်းမြစ်များ

1 Bakyabazinga 12:32

Era yaataagho ekibinuko, kibengagho mu mwezi ogwomunaana, ku lunaku olweikumi n'eitaanu, nga kye baabanga nakyo mu Buyudaaya. Yaaja ku alutaari e Betheli yaaghaayo emisengo y'ebifaananie eby'ente ento bye yakola, era yaataagho bakabona abaagheerezanga mu masabo ge yazimba.

1 Bakyabazinga 14:23

Baamusungughaza kuba boona beezimbira ku buli lusozi olugulumivu, na buli ghansi mu kinsense kya muti muzibirivu, baataagho ebifo ebigulumivu eby'okusinzizaamu, n'empango, n'ebifaananie eby'omusambwa omukazi, Ashera.

Zabbuli 107:14

Yaabatoola mu nzikiiza etiisa einho, yaakutulakutula endhegere edhaali dhibasibye.

Zabbuli 2:3

Nga bakoba bati: “Ka twekutule ku ndhegere dhaibwe, era ka twetoole ebikoligo byaibwe mu nkoto!”

Zabbuli 78:58

Basonsoonia Katonda baamusungughaza olw'ebifo byaibwe ebigulumivu bye baasinzizangamu era baamuleetera okuba n'enkikidi olw'ebifaananie ebibaadhe bye baasinzanga.

Okuvaayo 19:8

Abantu boonaboona bamwiramu bati: “Ebyo byonabyona Musengwa Katonda by'atukobye okukola twidha kubikola.” Era Musa yaaja okukobera Musengwa Katonda ng'abantu bwe baakoba.

Okuvaayo 24:3

Agho Musa yaaja yaakobera abantu ebyo byonabyona Musengwa Katonda bye yamukoba era n'ebiragiro. Era abantu boonaboona bairamu n'omwoyo mulala bati: “Ebyo byonabyona Musengwa Katonda by'atukobye twidha kubikola.”

Okuvaayo 3:8

era n'okwika mbawonie Abamisiri, mbatoole mu nsi eyo, mbatwale mu nsi enene, engimu era erimu ebirungi kamaala ensi omuli buti Abakanaani, Abahitti, Abamori, Abaperizzi, Abahivi, n'Abayebusi.

Isaia 1:21

Kyewuunhisa okubona ng'ekibuga ekyalinga ekyesigwa, kifuuse ng'oti malaaya. Ate nga kyaidhulangamu abantu abakola amazima, era kyabangamu abantu abatuufu. Aye mperaano kirimu batemo beereere.

Isaia 10:27

Olunaku olwo bwe lulituuka, imwe ndibatoola mu buyinza bw'Abassiria, naabatwikula n'obuzito bwe baabatwikanga, naazikiriza ebikoligo ebibali ku mabega.”

Isaia 14:25

Ndizikiriza Abassiria mu nsi yange, naabatyankirira n'ebigere ku nsozi dhange. Nditoola ku bantu bange ekikoligo eky'Abassiria abo, naabatwikula ebizito bye baabatwikanga.

Isaia 9:4

Kuba obatoireku obuzito obwabavunanga, waamenhamenha emiigo gye baabakubisanga ku mabega, waaghangula amaghanga agaatuntuzanga abantu bo, ng'oti ni bwe waghangula Abamidia.

Yeremia 13:27

Musengwa Katonda oyo ababona nga mukola ebintu ebyenhinhalwa. Era yaababona nga muja eri bakatonda ab'amaghanga agandi ku nsozi ni mu nsiko. Mwaba ng'oti n'omuntu omwenzi, oba ng'oti n'embalaasi enume bw'emoolera okuniina enkazi. Imwe abantu ab'e Yerusalemu mukagwireku! Mulibaaku li abalongoofu?

Yeremia 17:2

Abantu baimwe tibeerabiranga kusinziza Ashera omusambwa omukazi, ku alutaari dhaibwe, ni buli ghansi mu kinsense eky'omuti omuzibirivu, ni ku buli kasozi,

Yeremia 2:31

Imwe Abaisiraeli muwulire nze Musengwa Katonda kye nkoba. Nabeefuukirakuuku naababeera ng'oti irungu, era ng'oti n'ensi egemye enzikiiza eri bedimudimu? Kale imwe bantu bange kiki ekiboogeza muti, ‘Tuli ba idembe, titukaira y'oli?’

Yeremia 3:13

Aye mwikirize nga muli n'omusango olw'okudheemera nze Musengwa Katonda waimwe, ni mweghaayo okusinza bakatonda abagwira buli ghansi mu kinsense eky'omuti omuzibirivu. Era mwaloba kumpulira na kugondera biragiro byange. Nze Musengwa Katonda, ninze nkobye.

Yeremia 30:8

Musengwa Katonda Afuga Amagye, akoba ati: “Olunaku olwo bwe lulituuka ndimenhamenha ebikoligo ebiri mu nkoto dhaibwe, era naakutulakutula n'endhegere dhe baabasiba. Tibaliiramu kabiri kuba bairu ba bamaghanga gandi.

Yeremia 5:5

Ndidha kuja y'abakulembeze ndhogere nabo; kuba abo baidhi Musengwa Katonda by'ayenda, era baidhi amateeka ga Katonda waibwe oyo.” Aye boonaboona aghalala baadheemera Musengwa Katonda, baaloba kuwulira mateeka ge.

Ezekieli 16:28

“Wayendaku ni ku Bassiria boona, olw'obutasinwa bw'oli nabwo. Bwenebwene waalaaya nabo, aye era waasigala ng'okaayenda bwende.

Ezekieli 16:31

ni weezimbira mu buli maagaanana ga luguudo amasabo okukoleramu obwamalaaya, ni mu buli luya lwa kibuga n'ozimbamu ebifo ebigulumivu eby'okusinzizaamu ebintu ebyo ebitali nze Katonda. Aye ate waaba nga toli kunoonia mpiiya ng'oti ni malaaya eyeetunda!

Ezekieli 16:41

Balyokya endhu dho, baakubonereza ng'abakazi abandi kamaala babona. Nze ndikulekeza okukola obwamalaaya, waaba nga tokaagulirira bagonzi bo.

Ezekieli 20:28

Bwe nabatuusa mu nsi nze mwene ye neerayirira okubagha, ng'olwo buli ghe baabonanga akasozi akagulumivu oba omuti ogw'amakaba amangi amazibirivu, ng'agho bagheeragho emisengo gyaibwe. Ebigheebwayo byaibwe bye baagheeranga mu bifo ebyo, n'obuwoowo bwe baaniokezangayo, era n'ebigheebwayo eby'okunhwa bye baafukangayo, byansungughazanga busungughaze.

Ezekieli 23:5

“Waire Ohola yali mukazi wange, aye era yakolanga obwamalaaya, yeefulugutanga n'abagonzi be Abassiria.

Hosea 1:2

Omukuzi ogwasooka Musengwa Katonda okwogerera mu Hosea, Musengwa Katonda oyo yakoba Hosea ati: “Ja ofumbirwe omukazi atali mwesigwa malaaya, ozaale naye abaana ab'obwamalaaya, kuba abantu bange banviireku nze Musengwa Katonda, tibakaali beesigwa naire.”

Hosea 2:5

Inhaibwe yakola obwamalaaya, oyo eyabazaala yeebisa mu nsambo eswaza ng'akoba ati: “Ndidha kuja y'abagonzi bange, bampe emere, n'amaadhi, n'engoye empegheevu, n'edho edhaakolebwa mu buviiri bw'entaama, n'omuzigo ogw'ebibala eby'emiti emyoliva, n'eby'okunhwa.”

Hosea 3:3

Naamukoba nti: “Oteekwa okumala ekiseera ekireeyi ng'oli wange. Otakola bwamalaaya waire okwenda omusaadha owundi, era zeena ntyo bwendidha okwebisa y'oli.”

Hosea 4:13

Baghaayo emisengo ku ngulu okw'ensozi enene, baaghaayo ebigheebwayo ku busozi obutono, ni ghansi gh'emiti emikologho emizibirivu, kuba ebinsense byagyo birungi. Baghala baibwe kyebava ni bakola obwamalaaya, ni bakazi baibwe ni bakola obwenzi.

Hosea 9:1

Imwe Abaisiraeli, mulobe kusagamba waire okuba abasangaavu ng'oti n'abantu abatatya Katonda; kuba mwaloba okuba abeesigwa mwava ku Katonda waimwe. Mwasanhukira inho engaano eva mu bifo aghakubirwa engaano, nga mulowooza muti eyo n'empeera emisambwa ye gibagha olw'okwetunda ye giri nga bamalaaya.

Abalevi 26:13

Ninze Musengwa Katonda waimwe, eyabatoola mu Misiri, mulekere okuba abairu. Naatoolagho obuyinza obwali bubasibiire ghansi, naabatambuza nga mwesimbye.”

Nahumu 1:13

Buti ni, nja kumenhamenha ebikoligo Abassiria abo bye baabata imwe mu nkoto, n'endhegere dhe baabasibya.”

Amateeka Agokubiri 12:2

Muli n'okuzikiriza ebifo byonabyona, ab'amaghanga ge muja okutwala mwe basinziza bakatonda baibwe: ku nsozi enene, ni ku busozi obutono, ni ghansi mu binsense by'emiti emizibirivu.

Amateeka Agokubiri 15:15

Mwidhukire nga mwali bairu mu Misiri, Musengwa Katonda waimwe yaabanunula. Kyenva ndi kubagha ekiragiro ekyo mpegaano.

Amateeka Agokubiri 26:17

Mukakaisa olwaleero muti Musengwa Katonda ni Katonda waimwe, era nga mwidha kujiiranga ku by'alagira, nga mukuuma amateeka ge n'ebiragiro bye.

Amateeka Agokubiri 4:20

Aye imwe yabagemaku, yaabatoola e Misiri ye mwabanga ng'oti n'abali mu muliro ogw'amaani ogusaanuusa ekyuma ekigumu einho. Yaabafuulira irala abantu be nga bwe muli mpegaano.

Amateeka Agokubiri 4:34

Oba ghalighooku katonda eyaali ageziizaaku okuja okutwala abantu ab'eighanga erindi, abafuule ababe ng'abatoola ghagati mu ighanga erindi, nga Musengwa Katonda waimwe bweyabakolera imwe mu Misiri? Yakozesa amaani ge agataloodheka, yaasindika ebibamba n'olutalo, yaakola ebyewuunhio n'ebyewuninkiriza, era yaaleetera ebintu ebitiisa einho okubaagho, nga mubona.

Amateeka Agokubiri 5:27

Musa, niiwe obe oje, owulire Musengwa Katonda waife by'anaakoba. Memale oire otukobere byonabyona by'anaaba akukobye. Twidha kubiwulirisa, tubituukirize.’

Yoshua 1:16

Baamwiramu bati: “Twidha kukolanga byonabyona by'otukobye, era twidha kujanga woonawoona gh'onaatukobanga okuja.

Yoshua 24:24

Abantu baakoba Yoshua bati: “Twidha kugheerezanga Musengwa Katonda waife, era twidha kugonderanga ebiragiro bye.”

Yoshua 24:26

Yoshua yaaghandiika ebiragiro bino mu kitabo eky'amateeka ga Katonda. Agho yaatoola eibaale eikologho yaalisimba ghansi agh'omuti omuvule mu kifo kya Musengwa Katonda ekitukuvu.

Okwolekebwa 17:1

Agho owundi ku bamalaika omusanvu abaali n'ebibya omusanvu, yaidha yankoba ati: “Idha nkulage omusango bwe gusalirwa malaaya omukulu atyaime okumpi n'amaadhi amangi.

Abalamuzi 10:6

Agho Abaisiraeli kabiri baakola ebibi ye Musengwa Katonda, nga basinza emisambwa, Baali ni Ashitarothi. Era baasinza bakatonda b'Abasiria, n'ab'Abasidoni, n'ab'Abamoabu, n'ab'Abammoni, n'ab'Abafilisiti. Abaisiraeli abo, baava ku Musengwa Katonda, baalekera agho okumusinza.

Abalamuzi 2:11

Agho Abaisiraeli baayonoona ye Musengwa Katonda, baasinza emisambwa egyetebwa Baali.

Abalamuzi 2:13

Baava ku Musengwa Katonda, baagheereza emisambwa egyetebwa Baali ni Ashitarothi.

1 Samueli 12:10

Agho badhaadha baimwe baalirira Musengwa Katonda, nga bakoba bati: ‘Twakola ebibi, kuba twava ku Musengwa Katonda twagheereza emisambwa Baali ni Ashitarothi. Aye mperaano tukweghemba otuwonie abazigu baife, twidha kukugheerezanga.’