19 Agho nze naasaba nti: “Wo Musengwa Katonda, wulira bye nkoba. Wulira abazigu bange bye bandhogeraku.
Wo Musengwa Katonda lingirira obone ebitutuuseeku, era otege kutu owulire ebibono Sennakeribu by'agheereiza okukuvuma, iwe Katonda omulamu.
Baali bali kugezaaku bwa kututiisa nga badhuuba bati ekyo kinaatunafuya, twalekera agho okukola. Aye naasaba nti: “Wo Katonda wange nhongera amaani.”
Ka bankolimire aye nga iwe ompa bwa nkabi! Ni bwe baanumba, ka baswale aye nga nze omugheereza wo nsangaala busangaale.
Bandhogeraku bibi byereere, waire nga nze mbagonza era naabasabira.
Agho abantu beeteesa bati: “Mwidhe tubeeku ni kye tukola Yeremia ono. Ni bwetunaamutoolagho, tituja kubula bakabona ba kutugalagiranga, era tituja kubula bagezi ba kwebuuzangaku, waire okubulwa abalanzi abatukobera obukwenda bwa Katonda. Ka tumuteeku emisango, era tulekere okuwulirisanga by'akoba.”
Omuntu akoze ekirungi, bwenebwene agwanira kusasulwamu kibi? Oidhukira nga bwenaidhanga y'oli ni mbawolerezaagho olobe kubamaliraku busungu. Aye ate buti basimye ebiina nga benda ngwemu nfe!
Wo Musengwa Katonda Afuga Amagye, iwe oleba abantu mu mazima waabona bye balowooza mu myoyo gyaibwe. Kale leka nteege mbone nga bw'onaaneesasulizaagho ku bantu abo; kuba ensonga dhange ndhandhwire mu maiso go.
Wo Musengwa Katonda, iwe bona ebibi bye bankola, nkusaba obasalire omusango gubasinge.
Abazigu baife, mulobe kutusekerera mbu kuba tugwire. Tuja kusituka! Waire tuli mu nzikiiza buti, Musengwa Katonda aidha kutugha obutangaavu.