Yeremia 17:8 - Baibuli Ekibono kya Katonda 2014

⁸ Ali ng'oti n'omuti ogwasimbibwa ku mwiga, ogukunkunia emizi gyagwo ni gituuka ku maadhi. Tigutya musana ni bwe gwaka okwaga gha, kuba amakaba gaagwo gasigala nga ti maniavu. Ghazira kigweraliikiriza oba amaadhi gagwa oba tigagwa, kuba buli kiseera gutaaku ebibala.”

Yeremia 17:8 ပူးပေါင်းရင်းမြစ်များ

Yobu 29:19

Nali ng'oti muti ogulandiza emizi aghali amaadhi, nga n'omusulo gugwa ku nsaga dhaagwo obwire bwonabwona.

Yobu 8:16

Baba ng'oti n'ebimera ebiboneka obulungi ng'omusana gukaali kwaka, ensaga dhaabyo ni dheeyandhalira mu nimiro.

Zabbuli 1:3

Ali ng'oti n'omuti ogwasimbibwa ku mwiga, ogwama ebibala mu biseera byagwo, era oguli n'amakaba agataniala. Ghazira ky'akola ni kimufiiririra.

Ensambo 11:28

Ole eyeesiga obukombe bwe aja kukala ng'oti ikaba lya muti oguwaawiiza, aye omutuufu aja kugimuka ng'oti ikaba lya muti ogusibwisa.

Isaia 58:11

Nze Musengwa Katonda mwene ndibakulemberangamu buli kaakyeire, naabagha ebirungi ebibamala obukalamu era naabaleetera okuba abagumu era ab'amaani. Mulibanga ng'oti n'enimiro ye bafukirira amaadhi, era ng'oti n'ensulo y'amaadhi etakala.

Isaia 61:3

Era yantuma eri abo abali mu Sioni, mbavaaze engule ku mitwe gyaibwe mu kifo ky'eivu lye beebbaase. Era mbaleetere okusangaala mu kifo eky'okunakughala, mbaleetere n'olwembo olw'okusaaka mu kifo eky'okuba mu bughafu. Olwo babe ng'oti n'emiti emikologho Musengwa Katonda mwene gye yeesimbira; era bakolenga ebituufu ebireetera Musengwa Katonda oyo okugheebwa ekitiisa.

Yeremia 39:18

Bwenebwene ndikuwonia baaloba kukwita, waawoniagho obulamu bwo olw'okuneesiga. Nze Musengwa Katonda, ninze nkobye.’ ”

Ezekieli 31:3

Bona eno, ndidha kubageza ku muti omuvule mu kibira e Lebanoni. Oguli n'ensaga enungi edhikola ekinsense ekizibirivu, era omuleeyiriri, ng'obusanso bw'ensaga dhaagwo butuuka ni mu bire.

Ezekieli 47:12

Ku mbali ni ku mbali okw'omwiga ogwo kulimeraku emiti egya buli nsambo, nga gibalaku ebibala ebiriibwa. Amakaba g'emiti egyo tigalinialanga, era emiti egyo tigirirekeranga kutaaku bibala. Giidha kutangaku ebibala ebiyaaka buli mwezi, olw'okuba ginhwa amaadhi agava mu isinzizo. Ebibala byagyo binaabanga mere, n'amakaba gaagyo gaabanga bulezi obuwonia.”