Yeremia 15:2 - Baibuli Ekibono kya Katonda 2014

² Bwe bakubuuza ye babe baje, bakobe oti nze Musengwa Katonda nkobye nti, ‘Ab'okufa endwaire ya kawumpuli, baje eri endwaire ya kawumpuli. Ab'okufiira mu lutalo, baje eri olutalo. Ab'okufa endhala, baje eri endhala. Ab'okutwalibwa mu busibe, baje mu busibe.’

Yeremia 15:2 ပူးပေါင်းရင်းမြစ်များ

Isaia 10:4

Muliba nga muzira kindi kya kukola okutoolaku okutwalibwa mu busibe, oba okwitibwa mu lutalo. Aye waire ng'ebyo bimaze okubaagho, obusungu bwe bwidha kusigala nga bukaaligho. Era asigale ng'akaagalwire omukono gwe okubabonereza.

Isaia 24:18

Ole alirumuka n'awona entiisa, aligwa mu lwina. Ate ole aligezaaku n'ava mu lwina, aligwa bwa ku mutego gwamugemya. Ebituli eby'oku igulu biigule, kale amaadhi galiyuyika okuva ku igulu, n'emisingi gy'ensi gyatengeeta.

Yeremia 14:12

Ni bwe banaasiiba, nze tija kuwulirisa bye bansaba nga bandirira. Era ni bwe banampanga ebigheebwayo ebyokebwa n'ebigheebwayo eby'emere y'empeke, nze tiidha kubasiimanga. Aye ndidha bwa kubazikiriza mu ntalo era mbasindikire endhala n'endwaire ya kawumpuli bibaite.”

Yeremia 14:16

N'abantu be bakobera obulanzi obwo boona baliitibwa mu nsambo n'endala. Emirambo gyaibwe, ghalala n'egya bakazi baibwe, n'egya batabane baibwe ni baghala baibwe, gija kusuulibwa mu nguudo dha Yerusalemu, nga ghazira na muntu agiziika mu nsambo eyo mbeesasuulizeeku olw'ebibi byaibwe.”

Yeremia 16:4

Baja kufanga endwaire embi einho, era ghazira aja kubalira waire okubaziika. Emirambo gyaibwe gija kubanga ku itaka okwo ng'oti mmungo ya busa. Baja kwitibwanga mu ntalo oba balambukenga endhala bafe, n'emirambo gyaibwe giriibwenga enhonhi n'ensolo dh'omu nsiko.

Yeremia 19:7

Mu kifo ekyo mwe nditabuliratabulira entegeka dhoonadhoona edh'abantu b'omu Buyudaaya n'ab'omu Yerusalemu. Ndireetera abazigu baibwe okubaghangula era baabaitira mu ntalo. Emirambo gyaibwe ndigigabula enhonhi n'ensolo edh'omu nsiko dhaagirya.

Yeremia 43:11

Nebukadinezzari oyo aliidha yaalwanisa Misiri era yaagighangula. Abo abaategekerwa okufa endwaire ya kawumpuli balifa endwaire ya kawumpuli, abo abaategekerwa okutwalibwa mu busibe balitwalibwa mu busibe, n'abo abaategekerwa okufiira mu lutalo balifiira mu lutalo.

Ezekieli 12:11

Bakobe oti ekyo ky'okoze n'akamanhiso k'ebyo ebija okubatuukaku. Balibabinga ewaibwe, baaja mu bunhage.

Ezekieli 14:21

Agho ni Musengwa Katonda akoba ati: “Bwenebwene tikirisingagho inho bwe ndisindika ku Yerusalemu ebibonerezo byange ebina ebikakali: olutalo, endhala, ensolo edh'akabi, n'endwaire ya kawumpuli, okuja okukiitamu abantu n'ensolo?

Ezekieli 33:27

“Era bakobe oti nze Musengwa Katonda ndi kubalabula nti nga bwendi omulamu, bwenebwene abantu abo abali mu bifo ebyayonoonebwa, baliitibwa mu lutalo. Abo abaliba eyo mu nsiko ndigha ensolo emirambo gyaibwe dhaagikankamira. Ate abo abaliba mu bifo eby'okwewogomamu n'abo abaliba mu mpuku, balifa endwaire ya kawumpuli.

Ezekieli 5:12

Ndibaawulamu ebitundu bisatu: Abaliba mu kitundu ekisooka mulifa endwaire era mwalambuka endhala. Abaliba mu kitundu ekyokubiri muliitibwa mu ntalo edhiryezungulula ekibuga kyaimwe. Ate abaliba mu kitundu ekyokusatu ndibasansaaniza ku ndhuyi dhoonadhoona, empewo yaabatwaliriza. Era ndisowolayo empiima mu kiruutu yaaja ng'ebabingirira.

Ezekieli 5:2

Ekitundu ekisooka oidha kukyokera mu kibuga ng'enaku edh'okuzingiza ekibuga ekyo dhiwoireku. Ekitundu ekyokubiri oidha kukigema mu ngalo oje ng'okisalasala n'empiima obukutukutu okwezunguluza ekibuga. Ate ekitundu ekyokusatu ekinaaba kisigairegho, oidha kukisansaaniza mu mpewo ekitwalirize. Nze mwene ndisowolayo empiima mu kiruutu yaaja ng'ebingirira enviiri dho.

Danieli 9:12

Otuukiriiza ekyo kye watwesoomera okutukola ife n'abafuzi abatufuga waatutuusaaku akabi akataloodheka, kuba wabonereza Yerusalemu ekibitiriire okusinga ebibuga ebindi byonabyona ebiri ghansi gh'eigulu.

Amosi 5:19

Kiriba ng'oti n'omuntu ali kulumuka ku mpologoma, kabiri n'ayagaanana n'ekisolo ekikambwe. Oba ng'oti n'omuntu angira mu ndhu ni yeesiira ku kimante, omusota ni gumumoodha omukono.

Zekaria 11:9

Agho naakoba entaama nti: “Tikaali mwayi waimwe. Edho edh'okufa ka dhife, edho edh'okuzikirira ka dhizikirire, edho edhinaasigalagho ka dhiriidhagane emamba.”

Okwolekebwa 13:10

Kiisi muntu eyategekerwa okunhagibwa, alitwalibwa mu bunhage. Era kiisi muntu eyategekerwa okwitibwa empiima, alifa mpiima. Agho ni abatuukirivu bateekwa okuba n'okwikiriza era n'okuguminkiriza.