Yeremia 14:19 - Baibuli Ekibono kya Katonda 2014

¹⁹ Wo Musengwa Katonda, obwo Abayudaaya wabaviiraku irala, waakyagha abantu b'e Sioni? Lwaki watulumya n'otutaaku ebibwa otyo, ni tutasobola kuwonezebwa? Twasuubira okufuna emiraala, aye ghazira kalungi ke twafunamu. Era twasuubira okufuna ekiseera eky'okuwonezebwa, aye bona, twafuna bwa bitutiisa.

Yeremia 14:19 ပူးပေါင်းရင်းမြစ်များ

2 Ebyomubyanda 36:16

Aye baayeeyereza abakwenda ba Katonda baanhooma bye yabakoba, era baasekerera abalanzi be, okutuusa lwe baaleetera Musengwa Katonda oyo okubasungughalira ekibitiriire, nga tibakaasobola kuwona.

Yobu 30:26

Aye bwe nasuubira ebirungi, ate bibi n'ebyaidha. Bwe nateegerera obutangaavu, ate nzikiiza n'eyaidha.

Zabbuli 78:59

Katonda bwe yabona ebyo yaidhula ekiruyi, era yaabatooleraku irala omwoyo.

Zabbuli 89:38

Aye kabiri mpegaano iwe Musengwa Katonda oswire ere omuntu ye wasiiga omuzigo era tokaamulaadha; oidhwire ekiruyi ku muntu ye walonda.

Ensambo 29:1

Omuntu ye banenia emikuzi kamaala ng'ayongera bwa kukalambalira mu nsobi, mu kaseera buseera balimutentena nga takairayo kuwona.

Yeremia 12:7

Musengwa Katonda akoba ati: “Ndekuliire agho Abaisiraeli, eighanga eryo lye neerondera ndiviireku. Abantu abo be ngonza einho mbaghaireyo mu ngalo dh'abazigu baibwe.

Yeremia 12:8

Abantu bange be neerondera banfuukiire ng'oti mpologoma bw'ewologomera mu kibira, bankaabukira nga banvuma. Kyenviire ni mbakyagha.

Yeremia 15:1

Agho Musengwa Katonda yankoba ati: “Musa ni Samueli ni bwe bandyemereire ghano ninze, okuwolereza abantu abo ye ndi, era nze tinandisaasiire bantu abo naire. Babinge baje, banve mu maiso.

Yeremia 15:18

Lwaki obulumi bwange bweyongera bweyongere? Lwaki eibwa lyange lifuuse lya kokolo, ni litawona? Oyenda kunfuukira ng'oti n'akaiga akateesigika, akakala mu biseera by'endoboozi? Oba ng'oti n'amaadhi agaloba okugwa mu biseera ebituufu?”

Yeremia 30:12

Musengwa Katonda era akoba abantu be ati: “Amabwa gaimwe tigasobola kuwonezebwa, gafuuse ga kokolo, tigawonezeka naire.

Yeremia 30:13

Ghazira muntu wa kubalabirira, ghazira bulezi bwa kuta ku mabwa gaimwe, era muzira isuubi lya kuwonezebwa.

Yeremia 51:5

kuba nze Musengwa Katonda, Katonda Afuga Amagye, tirekuliire agho Baisiraeli na Bayudaaya, waire nga beene baiza omusango ye ndi, nze Omutukuvu wa Isiraeli.

Yeremia 6:30

Baidha kwetebwanga biseedha bya feeza, kuba nze Musengwa Katonda mbalekuliire agho.”

Yeremia 7:29

“Imwe abantu b'e Yerusalemu, musaleku enviiri dhaimwe mudhisuule ere; mulirire eyo ku nsozi edhiziraku kantu, kuba nze Musengwa Katonda nsungughaire era ndekuliire agho abantu bange.

Yeremia 8:15

Twasuubira okufuna emiraala, aye ghazira kalungi ke twafunamu. Era twasuubira okufuna ekiseera eky'okuwonezebwa, aye bona eno, twafuna bwa bitutiisa.

Yeremia 8:22

Mu Gileadi tekaaliyo bulezi? Tekaaliyo bayigha? Kiki ekirobeire abantu bange okuwona?

Okulira 2:13

Abantu ab'e Yerusalemu, imwe be ngonza oti ki, nkobe ki? Mbageze ku ki? Mbafaananie ki imwe, ekinaabaleetera okusaasirwa? Okuzikirizibwa kwaimwe tikwakukoma oti n'amaadhi ag'enhandha agaidha ni gaabeeyaagho obweye; ghazira aghanga kwizaagho bintu byazikirizibwa.

Okulira 2:22

Wayeta abazigu bange baaneezungulula, ng'oti n'abantu abeesoloiza ku lunaku olw'embaga ey'ekibinuko ekyalagirwa. Era Musengwa Katonda, ku olwo lunaku lwe wasungughaliraku, nga ghazira asobola kukunuuka oba kukuwona. Abazigu bange baazikiriza abaana be nalera ni nkuza.

Okulira 4:17

Twalingirira, amaiso gaatuuka okutunafugha, aye ng'ezira buyambi. Ghaligho eighanga lye twalingirirangaku nga tudhuuba tuti lighanga okutubeera, aye tiryatubeera.

Okulira 5:22

Obwo bwenebwene watusuulira irala ere nga toliirayo kutwiza y'oli? Okusungughala kwo tikuja kukoma?

Mika 1:12

Abantu ab'e Marothi beeraliikirivu nga tibaidhi oba banaafuna anaabayamba, kuba babona nga Musengwa Katonda aseesiisa ebizibu kumpi inho ni Yerusalemu.

1 Ab'e Thessalonika 5:3

Abantu balikoba bati: “Ghaligho emiraala era ghazira kabi,” aye balija okubona bati ng'okuzikirira kubatuuseeku. Kulibazindula ng'oti n'ebisa eby'omwana bwe bizindula omukazi ali kumpi okuzaala, era tighaliba gha kuwonera.