Yakobo 5:11 - Baibuli Ekibono kya Katonda 2014

¹¹ Abantu abo abaaguminkiriza tubeeta ba nkabi. Imwe mwawulira obuguminkiriza bwa Yobu era mwabona ni Musengwa bye yamukolera ku nkomerero, kuba Musengwa wa kisa era musaasizi.

Yakobo 5:11 ပူးပေါင်းရင်းမြစ်များ

1 Ebyomubyanda 21:13

Agho Daudi yaakoba Gadi ati: “Enaku engemye inho naasoberwa. Aye ekisinga leka Katonda ali n'ekivunika ekyodo ambonereze mwene, mu kifo eky'okubonerezebwa abantu obuntu.”

2 Ebyomubyanda 30:9

Bwe munaakyuka ni mwira eri Musengwa Katonda, abo abaatwala baganda baimwe n'abaana baimwe nga basibe, baidha kubagemerwa ekivunika, babalekule baire mu nsi eno kuba Musengwa Katonda waimwe wa kisa era asaasira. Taja kubakuba nkoone nga mwize y'ali.”

Nehemia 9:17

Baaloba kuwulira na kwidhukira ebyewuninkiriza bye wabakolamu. Baakalangusa bwa myoyo gyaibwe, baataagho omuntu abakulembere abaizeeyo mu bwiru e Misiri. Aye iwe oli Katonda asonigha, ekiseera kyonakyona. Oli wa kivunika, osaasira, era olwagho okusungughala. Era olw'okuba iwe obagonza inho obutalekera, tiwabalekulira agho.

Nehemia 9:31

Aye era olw'okusaasira kwo okutaloodheka, tiwabalekulira agho waire okubazikiriza, kuba oli Katonda wa kivunika era asaasira.

Yobu 1:1

Ghaaligho omusaadha mu nsi eyetebwa Uzi, ng'ayetebwa Yobu. Omusaadha oyo yali muntu aziraku musango era omwesimbu, ng'atya Katonda era nga yeekuuma obutakola kibi.

Yobu 1:2

Yali n'abaana abalenzi musanvu, n'abaana abaghala basatu.

Yobu 2:10

Aye Yobu yaamukoba ati: “Oli kwogera ng'oti n'abakazi abasirusiru bwe boogera. Obwo, tunaasanhukiranga birungi byonka Katonda by'atugha, twaloba kusanhukira bitunhiga by'atugha?” Mu ebyo byonabyona ebyagwagho Yobu tiyayogera bubi ku Katonda.

Yobu 23:10

Aye mwene aidhi engira ye ngema. Bw'alimala okundeba, alindhagaana nga ndi mutukuvu ng'oti ni zaabu omukenenule.

Zabbuli 103:13

Ng'omuzaire bw'aghembeera abaana be, ni Musengwa Katonda atyo bw'aghembeera abo abamutya.

Zabbuli 103:8

Musengwa Katonda asaasira era wa kivunika, alwagho okusungughala era yaagonza inho abantu obutalekera.

Zabbuli 116:5

Musengwa Katonda wa kivunika era mulungi. Katonda waife asaasira!

Zabbuli 119:132

Nningirira ongemerwe ekivunika, nga bw'okola abo abakugonza.

Zabbuli 145:8

Musengwa Katonda wa kivunika era asaasira, alwagho okusungughala era agonza inho abantu obutalekera.

Zabbuli 37:37

Weekalirisenga omuntu aziraku musango era omutuufu; omuntu ayenda emiraala tabula izaire.

Zabbuli 51:1

Wo Katonda, nsaasira, olw'okugonza kwo okutakoma sasaagho ebibi byange, olw'okusaasira kwo okungi einho.

Zabbuli 78:38

Aye Katonda olw'okuba n'okusaasira okungi einho, yaabasonigha okwonoona kwaibwe, yaaloba kubazikiriza kubamalagho. Emikuzi kamaala ng'afuga obusungu, yaamira ekiruyi kye

Zabbuli 86:15

Aye iwe Musengwa Katonda, niiwe Katonda asaasira era agemerwa abantu ekivunika, olwagho okusungughala, ogonza abantu obutalekera era oli mwesigwa inho.

Zabbuli 86:5

Wo Musengwa Katonda iwe oli mulungi, onsonigha era tolekera kugonza abo abakusinza.

Zabbuli 94:12

Wo Musengwa Katonda, nga wa nkabi omuntu y'okangaivula, oyo y'oyegeresa amateeka go.

Okuvaayo 34:6

Musengwa Katonda yaabita mu maiso ga Musa era yaalangirira ati: “Nze Musengwa Katonda, ninze Katonda asaasira era agemerwa abantu ekivunika, alwagho okusungughala, agonza abantu obutalekera era omwesigwa einho.

Omulangirizi 7:8

Omuntu ali kumaliriza ekintu asinga ole ali kutoolera obutoolere, n'omuntu omuguminkiriza yaasinga ole eyeekuluntaza.

Isaia 63:7

Ndiromboodha nga Musengwa Katonda bw'atugonza nga talekera, era naamusaaka olw'ebyo byonabyona by'atukoleire. Era ndimusaaka kuba ayoleike ekisa ekitaloodheka eri ab'endhu ya Isiraeli, olw'okusaasira kw'ali nakwo okwidhwire okugonza okungi einho.

Isaia 63:9

Yaabalumirwa mu kudaazibwadaazibwa kwaibwe kwonakwona, era yaabawonia mwene, se ti malaika we. Era olw'okugonza kwe n'okusaasira kwe by'ali nabyo, yaabanunula era yaabalabiriranga okuva eira n'eira.

Okulira 3:22

Okugonza kwa Musengwa tikukoma n'ekisa kye tikiwa.

Danieli 9:9

Aye iwe Musengwa Katonda waife osaasira era waasonigha, waire nga twakudheemera.

Yoeli 2:13

Mutakanulamu bivaalo byaimwe okwoleka nga bwe munakughaire, aye mwemenhe mu myoyo gyaimwe, ekyo n'ekibe kyoleke okwenenia kwaimwe.” Kale ni mwire ye Musengwa Katonda waimwe, kuba wa kivunika era asaasira inho. Agonza inho abantu obutalekera era yaabaguminkiriza. Buliidho aba mwetegefu okukyusa ebirowoozo bye, yaaloba kubabonereza.

Yona 4:2

Agho yaakoba ati: “Wo Musengwa Katonda, bino ti bye nakoba nga nkaali mu nsi yange? Nze namanha ng'oli wa kivunika era asaasira einho. Ogonza inho abantu obutalekera era obaguminkiriza buliidho oli mwetegefu okukyusa ebidhuubo byo waaloba kubabonereza. Era kyova obona nali numukiire e Tarushishi.

Mika 7:18

Ezirayo katonda ali ng'oti niiwe, Musengwa Katonda. Osonigha ebibi eby'abantu bo abawoniegho. Tosungughala bujiiririire, aye osangaala okutwoleka okugonza kwo okutakoma.

Okubala 14:18

‘Nze Musengwa Katonda ndwagho okusungughala, ngonza abantu obutalekera, era naasonigha aboonooni n'abadheemu. Aye tiriroba kubonereza aliku musango. Ndibonereza abaana n'abaidhukulu olw'ebibi eby'abazaire baibwe, okutuukira irala ku luse olwokusatu n'olwokuna.’

Matayo 10:22

Abantu boonaboona balibakyagha olw'eriina lyange. Aye oyo alyekalangula okutuusa ku nkomerero, alirokolwa.

Luka 1:50

Ekisa kye ku bamutya kirigho ku nse n'ense.

Luka 11:10

Kuba buli asaba afuna, buli ayagala azuula era buli akonkona ku lwigi aliigulirwagho.

Luka 6:36

Mubenga ba kisa nga Lata waimwe bw'ali ow'ekisa.

Ab'e Roma 2:4

Oba, onhooma ekisa kye ekingi, n'okugema empola kwe, n'okuguminkiriza kwe? Toidhi nga ekisa kya Katonda kikuleetera okwenenia?

Ab'Efeso 1:6

Olwo tumusaake olw'okutwoleka ekisa mu kitiisa kye, kye yatugheera mu Mwana we omugonzi ng'ekirabo.

Ab'Efeso 2:4

Aye Katonda olw'ekisa kye ekyodo n'olw'okugonza einho kw'atugonzaamu,

Abaheburayi 10:39

Aye ife tituli mu abo abaira einhuma ni bazikirira, aye tuli mu abo abaikiriza ni balokolebwa.

Abaheburayi 3:14

Kiri nti tuba tuli kwisa kirala mu Kurisito, kasita tukalangula obwesige bwaife bwe twatoolera nabwo, ni tubutuukiza irala ku nkomerero.

Abaheburayi 3:6

Aye Kurisito yali mwesigwa ng'omwana akulira enhumba ya Katonda era ife niife enhumba ya Katonda kasita tukalanguka era ni twesiimira mu kusuubira.

Yakobo 1:12

Omuntu agumira okulebwa wa nkabi, kuba bw'abita mu kugezesebwa okwo, aligheebwa obulamu ng'ekirabo Katonda kye yasuubiza abo abamugonza.

Yakobo 1:2

Aboluganda, bwe mutuukibwangaku ebizibu ebya buli nsambo, musangaalenga.

1 Petero 1:13

Kale ni mu myoyo gyaimwe mubenga beetegefu era mwefugenga. Eisuubi lyaimwe lyonalyona mulitenga mu kisa Katonda ky'aja okubagemerwa ku lunaku Yesu Kurisito lw'alibonekeraku.

1 Petero 3:14

Ni bwe munaadaazibwadaazibwanga olw'okukola ekituufu, muli ba nkabi. Mutatyanga muntu yeenayeena waire okweraliikirira,

2 Petero 2:9

Ebyo biraga nga Katonda aidhi okutoola abamutya mu buzibu, era n'okukuumira ababi mu kubonerezebwa okutuusa ku lunaku olw'okusalirwaku omusango.