Omulangirizi 1:13 - Baibuli Ekibono kya Katonda 2014

¹³ Neeghaayo n'amagezi gange, naanoonereza era naayagaaza byonabyona ebikolebwa ku nsi. Naabona ng'ebyo byonabyona, n'omulimo omukalangufu ogutasanhusa naire, Katonda gwe yagha abaana ab'abantu okwetawulamu.

Omulangirizi 1:13 ပူးပေါင်းရင်းမြစ်များ

Amainhama 3:19

Oidha kufaabiikananga era ogezimulenga, memale ofunenga eky'okulya, okutuusa lw'oliirayo mu itaka mwe wakolebwa. Mu itaka mwe wava, era mu itaka mw'oliira.”

Yobu 28:3

Abantu babinga enzikiiza nga bakunaania entaala, baayagala eyo mu itaka ghansi, amabaale ge banaasimayo eyo mu nzikiiza egemye bedimudimu.

Zabbuli 111:2

Ebintu Musengwa Katonda by'akola bikologho ate bikulu, abo boonaboona ababyenda babyetegereza.

Ensambo 18:1

Omuntu omweyawuze yeerowoozaaku yenka, era atakania abandi boonaboona bye babona nga n'ebituufu.

Ensambo 18:15

Omuntu omutegeevu ayenda okwega, era omugezi anoonenkereza okumanha.

Ensambo 23:26

Mwana wange, tanga omwoyo ku bye nkukoba, era otwale obulamu bwange ng'eky'okuboneraku.

Ensambo 25:2

Tugha Katonda ekitiisa olw'ebyo by'atugisa, aye twagha bakyabazinga ekitiisa olw'ebyo bye banoonereza ni bazuula.

Ensambo 4:7

Amagezi n'ekintu ekiwula obukulu. Kale ni funanga amagezi. Era mu byonabyona by'onaafunanga, twalanga amagezi nga n'ekintu ekikulu.

Omulangirizi 1:17

Neeghaayo inho nsobole okumanha okwawulagho amagezi n'eiralu, n'obusiru. Aye naabona nga kyona kiri ng'oti kubinga mpewo kugigema.

Omulangirizi 11:5

Nga bw'otaidhi ngira empewo y'ebitamu, waire okumanha amagumba bwe gakulira mu nda ey'omukazi ali enda, era otyo bw'otaidhi ngeri Katonda y'akolamu ebintu byonabyona.

Omulangirizi 12:12

Mwana wange, ghaligho ekintu ekindi ky'ogwaine okumanha: okughandiika ebitabo tikukoma, n'okusoma einho kukooya omubiri.

Omulangirizi 2:23

Ekiseera eky'obulamu bwe akimala mu bulumi na kweraliikirira, n'obwire yaaloba kutenduka, kuwuumuza ku birowoozo. Ekyo kyona muzira muganhulo.

Omulangirizi 2:26

Omuntu asiimya Katonda, Katonda amugha amagezi n'okumanha era n'eisanhu, aye omwonooni Katonda amugha gwa kusoloza nga bw'atereka obukombe, amale abughe oyo asiimya Katonda. Ekyo kyona muzira muganhulo, era kiri ng'oti kubinga mpewo ogigeme.

Omulangirizi 3:10

Nabona nga Katonda yateeragho abantu okwetawulanga mu kufaabiikana.

Omulangirizi 3:11

Yaakola buli kintu nga kija bukalamu mu kiseera kyakyo. Yaata mu bantu omwoyo ogwenda okumanha ebyaligho, n'ebirigho, era n'ebiribaagho, aye yaaloba kubagha kumanha mwene Katonda by'akola okuva mu kwinhama okutuuka ku nkomerero.

Omulangirizi 4:4

Agho naabona ng'ekireetera abantu okukola einho ni bakuguka mu mirimo, kuba kwegomba kufuna ebirungi banaibwe bye baba nabyo. Ekyo kyona muzira muganhulo, era kiri ng'oti kubinga mpewo ogigeme.

Omulangirizi 4:8

Ghabaagho omuntu aziraku mwana oba muganda we, aye nga buli kiseera ayenda kweyongera kufuna bya bukombe. Nga tiyeebuuzaaku ati: “Ndi kufaabiikanira ani, ni ndoba okwesanhusa?” Ekyo kyona kiziramu muganhulo, era kireeta n'enaku.

Omulangirizi 7:25

Agho neemalira ku kunoonereza, nsobole okufuna n'okumanha amagezi, era ntegeere ebintu byonabyona nga bwe biri. Olwo mmanhe ng'omuntu okuba omubi kiba kya busiru, era ng'obusiru buli ng'oti iralu lyene.

Omulangirizi 8:9

Ebyo byonabyona nabyetegereza bwe nalowooza einho ku ebyo abantu bye bakola ku nsi, naabona ng'abantu abandi bwe bafugisa banaibwe obukambwe, aye ate boonaboona ni balumizibwa abafuzi beene n'abo be bafuga.

1 Timotheo 4:15

Ebyo bikolenga era obiisengaku omwoyo, olwo boonaboona babone nga bwe weeyongera okukola obukalamu.