Okwolekebwa 10:1 - Baibuli Ekibono kya Katonda 2014

¹ Agho naabona malaika owundi ow'amaani ng'ava mu igulu. Yali avaire ekireri, era ku mutwe gwe nga kuliku musoke, mu maiso ge ng'ali kwaka ng'oti ndhuba, ate amagulu ge nga gali ng'oti mpango dha muliro.

Okwolekebwa 10:1 ပူးပေါင်းရင်းမြစ်များ

Zabbuli 104:3

Oba eyo ghaigulu ku maadhi, waavuga ebire ng'oti n'ekigaali kyo eky'omu lutalo, waajiira ku maghagha ag'empewo.

Zabbuli 97:2

Ali ghagati mu bire n'enzikiiza eri bedimudimu, afuga mu butuufu ng'akolera ku mazima.

Okuvaayo 16:10

Aaroni bweyali ali kwogera eri Abaisiraeli, baaja okulinga bati mu irungu, nga babona ekitiisa kya Musengwa Katonda nga kibonekera mu kire.

Olwembo 5:15

Amagulu ge malungi ng'oti n'empango dhe baakola mu mabaale ag'omughendo agamirimiinha, ni badhita mu bikolo ebya zaabu. Era wa kitiibwa ng'oti n'ensozi edh'e Lebanoni, n'emiti gyaku emivule egyegombebwa.

Isaia 19:1

Buno n'obukwenda obugema ku Misiri. Bona, Musengwa Katonda atyaime ku kire ekirumuka embiro, ali kukivuga ng'aja e Misiri. Ebisinzibwa ebitali Katonda eby'e Misiri bija kudhugumira mu maiso ge, n'Abamisiri emyoyo gija kubatekemuka.

Isaia 54:9

“Nga bwe nalayira mu biseera bya Noa obutairamu kabiri kuleeta maadhi ga mwidhuzo kubanda ku nsi, ni leero ntyo bwe ndi kulayira obutairamu kabiri kukusungughaliranga na kukudhuukanga, waire okukubonerezanga.

Okulira 3:44

Weebwikirira ekire olobe kuwulira nga tuli kukusaba.

Ezekieli 1:28

obufaanana ni musoke asala ku igulu ng'amaadhi gali kughemya. Ekyo n'ekifaananie ekyaligho ekyayoleka ekitiisa kya Musengwa Katonda. Bwe nabona ebyo naakuba amakiryaivu era naakutama n'ekyeni kyatuuka ku itaka. Agho naawulira amamiro agakoba gati:

Danieli 10:6

Omubiri gwe gwali gumesunkana ng'oti ibaale lya mughendo eryetebwa berulo. Nga mu maiso amyensuuka ng'oti kughemya kwa lukuba. Amaiso ge nga gali ng'oti gaaka omuliro. Amakono ge n'amagulu ge nga gamirimiinha ng'oti kyuma kya kikomo ekizigule. Nga bw'ayogera, amamiro ge gaba ng'oti n'ag'olukunkumuli olw'abantu.

Danieli 7:13

Mu kubonekerwa okw'omu bwire obwo, naja okulinga nti nga mbona afaanana ng'oti mwana wa muntu, ng'ali kwidhira mu bire. Era yaaja y'Oyo eyaligho okuva eira n'eira, baamwandhulayo.

Abalevi 16:2

Yaakoba ati: “Koba Aaroni muganda wo, alobe kumalanga gaja buli gh'ayendeire munda gh'olutimbe mu Kifo Ekitukuvu gha kisandikiza eky'Esanduuku y'Endagaano. Olwo alobe kufa, kuba ndidha kubonekeranga mu kire ghaigulu gh'ekisandikiza ekyo.

Matayo 17:2

Agho yaafuuka obundi nga babona, amaiso ge gaayaka oti ndhuba, n'ebivaalo bye byayakaayakana oti musana.

Luka 21:27

Agho ng'abantu babona Omwana ow'Omuntu ng'aidhira mu kire n'amaani n'ekitiisa ekingi.

Ebikolwa by'Abatume 26:13

Isebantu kyabazinga, nga ndi mu ngira, esaawa mukaaga edh'omusana, naabona okumyansa okwava mu igulu nga kusinga okwaka okw'endhuba, kwaneezungulula n'abo be twali tutambula nabo.

Okwolekebwa 1:7

Bona, wuuyo aliidhira ku bireri! Abantu boonaboona balimubona, era n'abo abaamufumita balimubona. Abantu boonaboona ku nsi baligegenga ku lulwe. N'ekyo. Amiina.

Okwolekebwa 18:1

Ebyo bwe byawa, naabona malaika owundi ng'aika ng'ava mu igulu, ng'ali n'obuyinza obutaloodheka. Ekitiisa kye kyamulisa ensi yoonayoona.

Okwolekebwa 18:21

Agho naabona malaika ow'amaani, yaaginga eibaale eriri ng'oti lubengo lukologho, yalisuula mu nhandha ng'akoba ati: “Babiloni ekibuga ekikologho kityo bwe kirisuulibwa ghansi n'amaani amangi, ni kitairayo kuboneka kabiri.

Okwolekebwa 20:1

Agho naabona malaika ng'aika ng'ava mu igulu, ng'agemye ekisumuluzo ky'olwina olutakoma, era ng'agemye n'oludhegere olunene.

Okwolekebwa 4:3

Oyo eyali akityaimeku, emboneka ye, ng'amesunkana ng'amabaale ga yasipera ni sarudio. Musoke yali yeezungulwire ekityamo ekyo, nga amesunkana ng'oti n'eibaale lya semaragido.

Okwolekebwa 5:2

Era naabona malaika ow'amaani, yaabuuza n'amamiro ag'amaani ati: “Naani agwaine okukakampula obumanhiso obusibye enzingo y'ekitabo n'okugizingulula?”

Okwolekebwa 8:13

Agho naabona era naawulira enkookooma, yaaguluka nga yeeruupiise ghaigulu ng'eyasiikana eti: “Mukagwireku! Mukagwireku! Mukagwireku imwe abali ku nsi, amagwala agandi asatu bwe ganaavuga bamalaika abasatu ge baja okufuuwa.”