Okuvaayo 34:13 - Baibuli Ekibono kya Katonda 2014

¹³ Mu kifo eky'okukola nabo endagaano, mumenhemenhegho alutaari dhaibwe, n'ebituuti byaibwe eby'amabaale, era n'ebifaananie bya Ashera, omusambwa gwaibwe omukazi.

Okuvaayo 34:13 ပူးပေါင်းရင်းမြစ်များ

1 Bakyabazinga 14:15

N'okuva ku olwo, Musengwa Katonda aja kubonereza ensi Isiraeli edhugumire ng'oti n'olugada bwe lutengeeta mu maadhi. Era aja kutoola Abaisiraeli mu nsi eno enungi ye yagha badhaadha baibwe, abasansaanize eyo ng'osomoike omwiga Eufurate, kuba baamusungughaza nga beekolera ebifaananie by'omusambwa omukazi, Ashera.

2 Bakyabazinga 10:27

Kale baamenhagho empango ya Baali eyo, era baamenhagho n'eisabo lye. Eisabo eryo ghe lyali, baafuulagho ekifo eky'okujangamu okweyamba, era kityo bwe kikaali ni ye buli eno.

2 Bakyabazinga 18:4

Yaatoolagho ebifo ebigulumivu eby'okusinzizaamu, yaamenhagho empango, era yaatematema ebifaananie by'omusambwa omukazi Ashera. Era yaamenhamenha omusota ogw'ekyuma eky'ekikomo Musa gwe yakola n'agweta Nehushitani kuba n'okutuusa mu biseera ebyo, Abaisiraeli baali bakaaguniokeza obubbaani.

2 Bakyabazinga 23:14

Kyabazinga Yosia yaamenhamenha empango, era yaatematema n'ebifaananie eby'omusambwa Ashera. Mu bifo byabyo yaidhuzaamu amagumba g'abafu.

2 Ebyomubyanda 14:3

Yaatoolagho alutaari edh'abamaghanga agandi n'ebifo ebigulumivu eby'okusinzizaamu, yaamenhamenhagho empango edh'amabaale, era yaatemagho n'ebifaananie bya Ashera, omusambwa gwaibwe omukazi.

2 Ebyomubyanda 15:16

Era kyabazinga Asa oyo yaatoola ni ku dhaadha we Maaka ekitiibwa eky'okuba inhina owa kyabazinga, kuba Maaka oyo yakola ekifaananie ekyenhinhalwa ekyasinzibwanga, eky'omusambwa omukazi Ashera. Asa yaatemagho ekifaananie ekyo, yaakimenhamenha, yaakyokera ku kaiga Kiduroni.

2 Ebyomubyanda 17:6

Omwoyo gwe yagumaliranga ku kukola ebyo Musengwa Katonda by'ayenda, era yaatoolagho mu Buyudaaya ebifo ebigulumivu bye baasinzizangamu, n'ebifaananie by'omusambwa omukazi Ashera.

2 Ebyomubyanda 24:18

Baava ku kusinzizanga mu isinzizo lya Musengwa Katonda, Katonda wa badhaadha baibwe, baira ku kusinzanga omusambwa omukazi Ashera n'ebisinzibwa ebindi ebitali Katonda. Era Musengwa Katonda oyo yaasungughalira Buyudaaya ni Yerusalemu, olw'omusango gwaibwe ogwo.

2 Ebyomubyanda 31:1

Ebyo byonabyona nga biwoire, Abaisiraeli boonaboona abaaligho baaja mu bibuga bya Buyudaaya, baamenhamenha empango edh'amabaale, baasimulagho ebifaananie eby'omusambwa omukazi Ashera n'ebifo ebigulumivu eby'okusinzizaamu, ni alutaari. Baaja baakola batyo mu biketezo ebindi byonabyona ebya Yuda, n'ebya Benjamini, n'ebya Efuraimu, n'ebya Manasse, okutuusa lwe baabizikiriza byonabyona. Agho abantu boonaboona bairayo mu bibuga byaibwe, buli muntu mu kibandha kye.

2 Ebyomubyanda 33:19

Ate ebigema ku ebyo Manasse bye yasaba Katonda, n'ebyo Katonda oyo bye yamwiramu olw'okusaba okwo, n'ebibi ghalala n'ebisobyo byonabyona bye yakola, n'ebifo ebigulumivu bye yazimba okusinzizangamu, n'ebifaananie eby'omusambwa omukazi Ashera bye yataagho, n'ebisinzibwa ebitali Katonda bye yasinzanga ng'akaali kugonda kwenenia, byonabyona byaghandiikibwa mu Byafaayo eby'abalanzi.

Okuvaayo 23:24

Otakubiranga misambwa gyaibwe makiryaivu, oba okugisinza, oba okukola ebyo beene bye bagikolera. Aye ogizikirizanga, era waamenhamenhanga empango dhaagyo edh'amabaale.

Isaia 17:8

Balirekera agho okufangayo einho ku alutaari dhe beekolera beene n'engalo edhaibwe, era baalekera agho okwesiganga ebintu obuntu beene bye beekolera ka bibe ebifaananie bya Ashera omusambwa gwaibwe omukazi, oba alutaari edhiniokezebwaku obubbaani.

Isaia 27:9

Aye Abaisiraeli balisoniyibwa ebibi byaibwe, nga bamaze okumenhamenha alutaari dh'emisambwa n'okusekulasekula amabaale gaadho ni gafuuka ensaano. Era nga bamaze okukomya okuniokezanga obubbaani ku alutaari edho, era nga basaaniizaagho kiisi kamanhiso akooleka omusambwa omukazi Ashera.

Yeremia 17:2

Abantu baimwe tibeerabiranga kusinziza Ashera omusambwa omukazi, ku alutaari dhaibwe, ni buli ghansi mu kinsense eky'omuti omuzibirivu, ni ku buli kasozi,

Mika 5:14

Ndiiwululagho ebifaananie eby'omusambwa omukazi ogwetebwa Ashera era naazikiriza n'ebibuga byaimwe.

Okubala 33:52

mwidha kubingangamu abatyamye baamu boonaboona be munaayagaanangamu, muzikirizenga ebifaananie byaibwe byonabyona ebibaadhe mu mabaale, n'ebyo ebyakolebwa mu kyuma ekisaanuusiibwa, era musaaniengagho ebifo byaibwe ebigulumivu eby'okusinzizaamu.

Amateeka Agokubiri 16:21

Bwe munaabanga nga mukolera Musengwa Katonda waimwe alutaari, mutasimbangagho mu mbali mwayo muti gwa kamanhiso ka musambwa omukazi, Ashera.

Amateeka Agokubiri 16:22

Era mutasimbangagho mpango ya ibaale ey'okusinzizangaku ebitali Katonda ebyo Musengwa Katonda waimwe tabyenderaku irala.

Amateeka Agokubiri 7:5

Agho ni mubabisenga muti: mumenhemenhenga alutaari dhaibwe, mutemetemenga empango dha bakatonda baibwe edh'amabaale, mwasaageyasaagenga ebifaananie ebibaadhe eby'omusambwa gwaibwe omukazi Ashera, era mwokyenga n'omuliro ebintu byaibwe bye basinza ebitali Katonda.

Abalamuzi 2:2

Era mwena naabakoba obutakolanga ndagaano na bantu ababa mu nsi eno mumenhemenhengagho bwa alutaari dhaibwe.’ Aye mukoze ki kino? Timukoze nga bwe nabalagira.

Abalamuzi 6:25

Mu bwire obwo, malaika wa Musengwa Katonda yaakoba Gideoni ati: “Toola ente ya lata wo enume, n'ente eyindi enume ey'emyaka omusanvu, omenhemenhegho alutaari lata wo ye yazimbira Baali, era otemeteme n'empagi ya Ashera egiri ku mbali agho.

Abalamuzi 6:26

Olwo ozimbire Musengwa Katonda wo alutaari ghaigulu ku kigulumo kino, ng'okozesa amabaale agataanhiibwa obukalamu. Era, olwo otoole ente ere eyokubiri ogigheeyo ng'ekigheebwayo ekyokebwa, ng'ogyokesa enku edh'empagi ere eya Ashera y'otemyetemye.”