Okuvaayo 20:4 - Baibuli Ekibono kya Katonda 2014

⁴ “Muteekoleranga kibaadhe oba kiwumbe ekifaanana ekintu kyonakyona ekiri ghaigulu ku igulu, oba ghansi ku nsi, oba waire ekiri mu maadhi agali ghansi agh'ensi.

Okuvaayo 20:4 ပူးပေါင်းရင်းမြစ်များ

1 Bakyabazinga 12:28

Kale kyabazinga Yeroboamu oyo yaalowoolereza inho ku kintu ekyo, era yaamala yaakola ebifaananie eby'ente ento bibiri mu zaabu. Agho yaakoba abantu ati: “Mubairenga nga muja e Yerusalemu okumala ekiseera ekireeyi ekimala. Mubone eno, imwe Abaisiraeli, bano ni bakatonda baimwe abaabatoola mu Misiri.”

2 Bakyabazinga 17:12

baasinzanga ebitali Katonda, Musengwa Katonda bye yabakoba ati: “Mutabisinzanga!”

2 Ebyomubyanda 33:7

Yaata mu isinzizo ekifaananie eky'omusambwa omukazi Ashera kye yabaadha. Ate nga eisinzizo eryo, Musengwa Katonda lye yakoba Daudi ni mutabane we Solomoni ati: “Mu isinzizo lino eriri mu kibuga Yerusalemu kye nalondamu mu bibuga byonabyona eby'ebika bya Isiraeli, mwe banansinzizanga enaku dhoonadhoona.

Zabbuli 78:58

Basonsoonia Katonda baamusungughaza olw'ebifo byaibwe ebigulumivu bye baasinzizangamu era baamuleetera okuba n'enkikidi olw'ebifaananie ebibaadhe bye baasinzanga.

Zabbuli 97:7

Abo boonaboona abasinza ebitali Katonda, ni beesaaka olw'okwesiga ebifaananie obufaananie ebyo ebiziramu na muganhulo, baswazibwa; kuba ebyo byonabyona bimukubira amakiryaivu.

Okuvaayo 20:23

Mutakolanga bakatonda mu feeza ni mubasinziza ghalala ninze, waire okwekolera bakatonda mu zaabu.

Okuvaayo 32:1

Abantu bwe baabona nga Musa alwire okuniinuka okuva ku lusozi, beesoloza baidha ye Aaroni, baamukoba bati: “Situkiramu otukolere bakatonda abanaatukulemberamu. Ono omusaadha Musa eyatutoola mu Misiri titwidhi kyamutuukaku.”

Okuvaayo 32:23

Kale beene n'abaakoba bati, ‘Tukolere bakatonda abanaatukulemberamu. Ono omusaadha Musa eyatutoola mu Misiri, titwidhi kyamutuukaku.’

Okuvaayo 32:4

Aaroni yaadhitoola, yaadhisaanuusa, era yaakozesa akatiba yaabakoleramu ekifaananie eky'ente ento enume. Agho baakoba bati: “Isiraeli, ono ni katonda wo eyakutoola mu Misiri!”

Okuvaayo 32:8

Amangu gano baviire ku biragiro bye nabagha. Baasaanuusiiza zaabu, beekolera ekifaananie eky'ente ento enume era baakisinza, baakigha omusengo nga bakoba mbu, ‘Isiraeli, ono ni katonda wo eyakutoola mu Misiri!’

Okuvaayo 34:17

“Muteewumbiranga kifaananie kya katonda nga mukozesa akatiba n'ekyuma ekisaanuuse, ni mumala ni mumusinza.

Isaia 42:17

Abo abeesiga ebifaananie ebibaadhe, ni bakoba ebifaananie ebyakolebwa mu kyuma ekisaanuusiibwa bati, ‘Niimwe bakatonda baife’, ndibaleetera okunhoomebwa n'okuswazibwa.”

Isaia 42:8

Nze ninze Musengwa Katonda, eryo n'eriina lyange. Ekitiisa kyange tikigabiraku muntu wundi, waire okusaakibwa kwange okukughaaku ebifaananie ebibaadhe.

Isaia 45:16

Abo boonaboona abakola ebisinzibwa ebitali Katonda, ensoni dhiribagema era baaswazibwaswazibwa.

Ezekieli 20:7

Naabakoba nti basuule ere ebyenhinhalwa ebibasikiriza, era balobe kweyonoona nga basinza ebitali nze Katonda eby'omu Misiri, kuba ninze Musengwa Katonda waibwe.

Ezekieli 8:10

Kale naingira, naabona ng'ebimante byonabyona baabitonatona n'ebifaananie eby'ebitonde ebyeghaluliza ku itaka ebya buli nsambo, n'eby'ensolo edhitali nongoofu, n'eby'ebintu ebindi Abaisiraeli bye baasinzanga.

Ezekieli 8:3

Agho yaagolola ekyaboneka okuba ng'oti n'omukono gwe, yaavuunhia enviiri edh'oku mutwe gwange, yambeedera ku nviiri edho naalengeedhera okwo. Era nga nkaali mu kubonekerwa kwa Katonda okwo, omwoyo gwa Katonda gwambeedera mu mpewo gwantwala e Yerusalemu. Gwantuusa ku mulyango ogwingira mu luya olw'eisinzizo olw'omunda olwali ku luuyi olw'omukono omugooda olw'e buvandhuba. Mu luya olwo n'omwali ekifaananie abantu kye baasinzanga ni basungughaza Katonda einho, ni bamuleetera okuba n'enkikidi.

Abalevi 19:4

“Mutanvangaku ni musinza bitali Katonda, era muteekoleranga misambwa mu byuma bisaanuusiibwa ni mugisinza. Ninze Musengwa Katonda waimwe.

Abalevi 26:1

“Muteekoleranga bifaananie, oba ebiwumbe, oba empango ezimbibwa, oba eibaale eibaadhe, nga bya kusinzibwa. Ninze Musengwa Katonda waimwe.

Okubala 12:8

Oyo ndhogera naye butereevu maiso ku maiso, se ti mu bikoiko. Era ambona bukalamu nga bwe nfaanana. Kale mukana mutya ni mwemuluguunhiza omugheereza wange oyo Musa?”

Ebikolwa by'Abatume 17:29

Agho ni nga bwe tuli eizaire lya Katonda, titugwaine kudhuuba tuti Katonda afaanana ebintu ebikolebwa mu zaabu, oba mu feeza, oba mu mabaale, mu magezi ni mu kutetenkania kw'abantu.

Ab'e Roma 1:23

Mu kifo eky'okusinza Katonda atawaagho, basinza ebifaananie eby'abantu obuntu, oba eby'enhonhi, oba eby'ensolo, oba ebyekulula.

Amateeka Agokubiri 16:22

Era mutasimbangagho mpango ya ibaale ey'okusinzizangaku ebitali Katonda ebyo Musengwa Katonda waimwe tabyenderaku irala.

Amateeka Agokubiri 27:15

‘Omuntu yeenayeena anaakolanga ekifaananie ekibaadhe, oba ekisaanuusiibwa mu kyuma, memale n'akitaagho n'akisinza, akolimirwenga! Kuba okusinza ebitali Katonda kiba ekyenhinhalwa ye Musengwa Katonda.’ Olwo abantu boonaboona baliiramu bati, ‘Amiina.’

Amateeka Agokubiri 5:8

“ ‘Muteekoleranga kibaadhe oba kiwumbe ekifaanana ekintu kyonakyona ekiri ghaigulu ku igulu, oba ghansi ku nsi, oba waire ekiri mu maadhi agali ghansi agh'ensi.

Okwolekebwa 16:2

Malaika asooka yaaja, yaayugha ekibya kye ku nsi. Amabwa amanene era amabi einho gaagema abantu abaaliku akamanhiso k'ekisolo n'abo abaasinza ekifaananie kyakyo.

Okwolekebwa 9:20

Abantu abandi boonaboona, abataitibwa bibamba bino, baaloba kwenenia mu ebyo bye baakolanga: Baaloba kuleka okusinza emizimu emibi n'ebisinzibwa ebitali Katonda bye baakola mu zaabu, ni mu feeza, ni mu kyuma eky'ekikomo, ni mu mabaale, ni mu miti, ebitasobola kubona oba kuwulira oba kutambula.

Abalamuzi 17:3

Agho yairiza inhina ebitundu bya feeza ebyo. Inhina yaakoba ati: “Ka mpeeyo feeza ono abe wa Musengwa Katonda, ku lw'omwana wange, bamusaanuuse asiigibwe ku kifaananie ekibaadhe. Kale ni, feeza ono nja kumukwiriza.”