Okuvaayo 15:2 - Baibuli Ekibono kya Katonda 2014

² Bwemba ni Musengwa Katonda nfuna amaani n'okwemba naayemba; Musengwa Katonda oyo amponia abazigu. Oyo ni Katonda wange era ndidha kumusaakanga. Oyo ni Katonda wa lata wange era mmugulumiza.

Okuvaayo 15:2 ပူးပေါင်းရင်းမြစ်များ

Amainhama 17:7

Era ndidha kutaagho endagaano yange n'iwe, era ni baidhukulu bo ab'omu nse dhoonadhoona edhiriiragho, ebenga ndagaano etawaagho. Ndidha kubanga Katonda wo, era Katonda wa baidhukulu bo.

Amainhama 49:18

Wo Musengwa Katonda, nkuteegereire oidhe ondokole.

2 Samueli 22:3

Musengwa Katonda ni Katonda wange, n'olubaale lwe numukiramu okwewonia, era n'engabo mwe neewoma; n'omulwanirizi wange amponia byonabyona. Musengwa Katonda n'obulumukiro bwange, era n'ekifo kyange eky'okwewogomamu, oyo n'amponia abakambwe.

2 Samueli 22:47

“Musengwa Katonda mulamu! Oyo olubaale mwe neewogoma asaakibwenga; Katonda oyo obulokozi bwange agulumizibwenga!

2 Samueli 22:51

Katonda agha kyabazinga y'agonza obughanguzi, oyo ye yalonda amwoleka nga bw'amugonza einho, era oyo nga ni Daudi ni baidhukulu be ebyanda n'ebyanda.”

2 Samueli 7:24

Wataagho Abaisiraeli babenga bantu bo ebyanda n'ebyanda ate iwe Musengwa Katonda waafuuka Katonda waibwe.

2 Samueli 7:5

“Ja okobe omugheereza wange Daudi oti Musengwa Katonda akoba ati, ‘Odhuuba oti niiwe oja okunzimbira endhu ey'okubangamu?

1 Bakyabazinga 8:13

Mpegaano nkuzimbiire eisinzizo ery'ekitiibwa, ekifo mw'onaabanga enaku dhoonadhoona.”

1 Bakyabazinga 8:27

“Aye obwo bwenebwene iwe Katonda oghanga okuba ku nsi? Ate oba waire mu igulu lyene, erisingayo okuba ghaigulu tosugamu, memale onaasuga otya mu isinzizo lino lye nzimbye!

1 Ebyomubyanda 16:14

Oyo ni Musengwa Katonda waife, ebiragiro bye bikola mu nsi yoonayoona.

Zabbuli 109:1

Wo Katonda wange, niiwe ye nsaaka, otansiriikirira!

Zabbuli 118:14

Musengwa Katonda n'omubeezi wange ampa amaani era n'eyandokola.

Zabbuli 118:21

Wo Musengwa Katonda, nsiimye kuba onkoleire nga bwe nkusabye era wampa obughanguzi.

Zabbuli 118:28

Niiwe Katonda wange, era ndidha kukusiimanga iwe Katonda wange, ndidha kukoberanga abantu nga bw'oli omukologho.

Zabbuli 132:5

okutuusa nga ntairegho ekifo Musengwa Katonda mw'aba, ekifo Omukologho wa Yakobo mw'asula.”

Zabbuli 140:7

Wo Musengwa Katonda, niiwe Musengwa Katonda wange ow'amaani anwanirira era n'ankuuma mu lutalo.

Zabbuli 145:1

Wo Katonda wange era Kyabazinga wange, ndidha kukusaakanga olw'obukulu bwo, era nkusiimenga ebyanda n'ebyanda.

Zabbuli 18:46

Musengwa Katonda mulamu! Oyo n'olubaale mwe neewogoma, agwaine asaakibwenga; Katonda oyo n'obulokozi bwange, agulumizibwenga!

Zabbuli 22:10

Mu kuva mu nda nateebwa mu ngalo dho, era kasookanga maama anzaala niiwe Katonda wange.

Zabbuli 22:3

Ate nga niiwe Omutukuvu, asaakibwa Isiraeli yoonayoona.

Zabbuli 27:1

Musengwa Katonda n'entaala yange emmuliikirira era n'omulokozi wange, kale ni ghazira ye ntya. Musengwa Katonda n'ekisenge ekigumu mwe neewogoma, kale ni ghazira alintiisatiisa.

Zabbuli 28:8

Musengwa Katonda n'amaani g'abantu be, era n'ekisenge ekigumu kyabazinga we ye yasiiga omuzigo mwe yeewogoma.

Zabbuli 30:1

Wo Musengwa Katonda, ndidha kukusaakanga buliidho, kuba wamponia, waalobera abazigu bange okuneeyagaliraku.

Zabbuli 34:3

Muneeyimbeku twatule nga Musengwa Katonda bw'ali omukulu, era tusaakire ghalala eriina lye.

Zabbuli 48:14

muti: “Katonda ono, ni Katonda waife ebyanda n'ebyanda. Ono n'aidha okutukulemberangamu ebyanda n'ebyanda.”

Zabbuli 59:17

Niiwe amaani gange, niiwe ye ningiriireku, kuba iwe Katonda wange, niiwe ye neesiga, Katonda angonza obutalekera.

Zabbuli 68:20

Katonda waife ni Katonda alokola, era Katonda waife ni Musengwa Katonda waife atuwonia okufa.

Zabbuli 99:5

Musaake Musengwa Katonda waife, mumusinze nga muli mu maiso ag'ekityamo kye eky'obwakyabazinga, kuba mutukuvu!

Zabbuli 99:9

Musaake Musengwa Katonda waife, mumusinze nga muli ku lusozi lwe olutukuvu; kuba Musengwa Katonda waife mutukuvu.

Okuvaayo 14:13

Aye Musa yaabairamu ati: “Mutatya, imwe mube bube bagumu, mwidha kubona Musengwa Katonda ky'anaakola okubawonia Abamisiri abo olwaleero luno. Kuba Abamisiri abo be muli kubona olwaleero timuja kwirayo kubabona kabiri.

Okuvaayo 3:6

Era yeeyongera okumukoba ati: “Ninze Katonda wa lata wo, Katonda wa Aburahamu, Katonda wa Isaaka era Katonda wa Yakobo.” Musa yeeghemba mu maiso ng'ali kutya okulinga ku Katonda.

Okuvaayo 4:22

Era oidha kukoba kyabazinga oti, ‘Musengwa Katonda ati bw'akoba: Isiraeli n'omwana wange omuberi,

Okuvaayo 40:34

Agho ekire kyaidha kyaghemba ku Weema ey'Okwagaananirangamu ni Musengwa Katonda, era ekitiisa kya Musengwa Katonda kyaidhula Eweema eyo.

Okuvaayo 6:7

Ndidha kubafuula bantu bange, era nze mbenga Katonda waimwe. Olwo mulimanha nga ninze Musengwa Katonda waimwe, nga mbatwikwire emirimo emikalangufu Abamisiri gye babakaka okukola.

Isaia 12:2

Bona, Musengwa Katonda n'omulokozi wange; ndidha kumwesiganga nga ghazira kye ntya. Musengwa Katonda oyo n'amaani gange, oyo n'olwembo lwange, era n'omulokozi wange.

Isaia 25:1

Wo Musengwa Katonda wange, ndidha kukugulumizanga era nsaakenga eriina lyo. Kuba okoze ebyewuninkiriza, waatuukiriza n'obwesigwa n'amazima ebyo bye wategeka okukola okuva eira.

Isaia 45:17

Aye Musengwa Katonda buliidho aidha kulokolanga Isiraeli. Imwe Abaisiraeli ensoni tidhiribagema waire okuswazibwaswazibwa ebyanda n'ebyanda.’ ”

Isaia 49:6

Musengwa Katonda oyo yankoba ati: “Iwe eky'okuba omugheereza wange n'okola ogw'okwizaagho ekitiisa ky'ebika bya Yakobo, n'okwiza Abaisiraeli abaawonagho, tikimala. Ku ebyo ndyongerezaaku okukufuula eitaala eri amaghanga, olwo ensi yoonayoona erokolebwe.”

Isaia 66:1

Musengwa Katonda akoba ati: “Eigulu n'ekityamo kyange eky'obwakyabazinga, ate ensi, kwe nta ebigere byange. Kale mulinzimbira ndhu nabaki? Era kifo ki mwe ndiwuumulira?

Yeremia 3:23

Okusinza kwe twasinzanga ku busozi, n'okwasiikana kwe twayasiikananga ku nsozi, bwenebwene byali bya kwerimba. Mu butuufu Musengwa Katonda waife ni yenka alokola Isiraeli.’

Yeremia 31:33

Ekiseera ekyo bwe kirituuka, eno n'endagaano ye ndikola n'Abaisiraeli: Ndibataamu amateeka gange, naagaghandiika ku myoyo gyaibwe. Nze ndiba Katonda waibwe, beene baaba bantu bange.

Yeremia 32:38

Baliba bantu bange, nze naaba Katonda waibwe.

Habakkuku 3:13

Waja okulokola abantu bo, okulokola oyo eyasiigibwa omuzigo okuba kyabazinga. Wakuba omukulembeze w'abakozi b'ebibi waamutentena, era waamaliragho irala be yakulemberanga.

Zekaria 13:9

Era abo abaliba mu kitundu ekyo ekirala ndibatukuza ng'oti ni feeza bwe bamukenenula mu muliro, era naabagezesa ng'oti ni zaabu bwe bamugezesa. Balinsaba, era zeena naabairamu. Ndibeeta bantu bange, era boona bandheta Katonda waibwe.”

Luka 1:77

oghe abantu be amagezi ag'okulokoka, mu kusoniyibwa ebibi byaibwe.

Luka 2:30

Kuba amaiso gange gaboine okulokola kwo,

Yoanne 4:22

Imwe musinza kye mutaidhi aye ife tusinza kye twidhi, kuba obulokozi buva mu Buyudaaya.

Yoanne 5:23

Abantu boonaboona bate mu Mwana ekinhagansi nga bwe bata mu Lata ekinhagansi. Kiisi atata mu Mwana kinhagansi, ni Ise eyamutuma tamutaamu kinhagansi.

Ebikolwa by'Abatume 4:12

Okulokolebwa kufunirwa mu oyo yenka, ghazira wundi asobola kulokolerwamu, kuba naire mu maina agagheebwa abantu ghansi gh'eigulu, ghazira lye tusobola kulokolerwamu.”

2 Ab'e Korintho 5:19

Kye tukoba ni kino nti Katonda yaleetera abantu boonaboona okwisania naye ng'abita mu Kurisito, nga tababalira bibi bye baakola naire. Era twena yatugemya obukwenda obubaleetera okwisania naye.

Ab'Efeso 2:22

Era mu oyo mwena muzimbibwa mwafuuka endhu ya Katonda mu Mwoyo.

Amateeka Agokubiri 10:21

Mumusaakenga, oyo ni Katonda waimwe. Mweboneraku n'amaiso gaimwe eby'amaani era ebitiisa bye yabakolera.

Ab'e Filippi 2:11

Era kiisi lulimi lwatule luti: Yesu Kurisito ni Musengwa. Olwo Katonda era Lata agheebwe ekitiisa.”

Ab'e Filippi 4:13

Nsobola okugumira byonabyona olw'amaani Kurisito g'ampa.

Ab'e Kolosai 2:9

Kuba mu Kurisito n'omuli Obwakatonda bwonabwona mu buntu,

Okwolekebwa 15:3

Baayemba olwembo lwa Musa omugheereza wa Katonda, n'olwembo olw'Entaama Ento, nga bakoba bati: “Musengwa Katonda Aghanga Ebintu Byonabyona, by'okola bikologho era byewuunhisa! Kyabazinga ow'amaghanga goonagoona, by'okola bituufu era bya mazima.

Okwolekebwa 19:1

Ebyo bwe byawa, naawulira mu igulu ekyawulikika ng'oti mamiro ga maani ag'abantu olukunkumuli, nga bakoba bati: “Musaake Katonda waife! Kuba obulokozi n'ekitiisa n'obukumu bibye!

Abalamuzi 5:21

Omwidhuzo ogw'omu mwiga Kishoni gwabaghalabania, gwabayoolookeraku gwabeeyaagho. Nze ndidha kutambuza maani, nga tiira inhuma!