Okuvaayo 12:48 - Baibuli Ekibono kya Katonda 2014

⁴⁸ Omuntu ow'endha bw'abasengangamu memale n'ayenda okulya ku Kibinuko eky'Okwidhukiriraku Okubitizibwa olw'okusinza Musengwa Katonda, musooka kukeketanga bantu be abasaadha n'abalenzi memale mwamuganha era oyo mumutwalanga ng'Omuisiraeli mwene. Aye omuntu yeenayeena atali mukekete atalyanga ku Kibinuko ekyo.

Okuvaayo 12:48 ပူးပေါင်းရင်းမြစ်များ

Amainhama 17:11

Anaakeketebwanga oluwutu olw'omubiri gwe ako n'akanaabanga akamanhiso ak'endagaano yange n'imwe.

Amainhama 17:12

Kiisi mwana mulenzi azaalibwa mu imwe mu nse dhoonadhoona, bw'anaaghezanga enaku omunaana munaamukeketanga, ni bw'anaabanga omwiru eyazaalirwa mu ndhu dhaimwe oba omwiru ye mwagula obugule ku bantu ab'endha.

Okuvaayo 12:19

Mwidha kumalanga enaku musanvu nga timuba na kizimbulukusa mu ndhu dhaimwe. Era omuntu yeenayeena anaalyanga omugaati oguzimbulukusiibwa mu nnaku edho, anaabanga nga takaabalibwa nga Muisiraeli, k'abe musenze oba Muisiraeli.

Okuvaayo 12:43

Musengwa Katonda yaakoba Musa ni Aaroni ati: “Gano n'amateeka ge munaajiirangaku nga mulya Ekibinuko eky'Okwidhukiriraku Okubitizibwa: Omuntu ow'endha atali Muisiraeli atakiryangaku.

Ezekieli 14:7

“Omuntu yeenayeena ow'omu ighanga Isiraeli, oba omusenze yeenayeena eyasenga mu Isiraeli, bw'anvaaku n'aghaayo omwoyo gwe okusinza ebitali nze Katonda, era n'abijiiraku ni bimuleetera okukola ebibi, memale kabiri n'aidha okwebuuza ku mulanzi, nze Musengwa Katonda mwene, ninze ndimwiramu.

Ezekieli 44:9

“Kale ni, nze Musengwa Katonda nsazeegho nti ezira mugwira yeenayeena ataakeketebwa era atajiira ku mateeka gange, anaikirizibwanga kwingira mu isinzizo lyange, waire omugwira oyo aba aghalala n'abantu bange Abaisiraeli.”

Ezekieli 47:22

yaaba yaimwe ey'ensikirano. N'abagwira abaasenga mu imwe era ni bazaalira mu imwe n'abaana, boona balifuna omugabo ng'Omuisiraeli owundi yeenayeena.

Abalevi 19:34

Mubabisenga ng'oti Baisiraeli banaimwe abazaale baamu, era mubagonzenga ng'oti ni bwe mwegonza beene, kuba mwena mwali basenze mu nsi Misiri. Ninze Musengwa Katonda waimwe.

Okubala 9:14

“Omuntu ow'endha eyasenga mu imwe bw'anaayendanga okukola Ekibinuko eky'Okwidhukiriraku Okubitizibwa olw'okusinza Musengwa Katonda, aidha kugondera amateeka goonagoona n'ebiragiro ebigema ku kibinuko ekyo. Amateeka geene ago n'agagemanga ku musenze ni ku Muisiraeli mwene.”

Ab'e Galatia 3:28

Mperaano ghazira ati ono Muyudaaya ate ole Mugureki, ono mwiru ate ole yeetaaya, oba ati ono musaadha ate ole mukazi kuba mwenamwena mwafuuka muntu mulala mu Kurisito Yesu.

Ab'e Kolosai 3:11

Olwo ghabe nga tighakaali kuboola oti ono Mugureki, ono Muyudaaya, ono mukekete, ate ono ti mukekete, ono wa ighanga lindi, ono ti mugundhufu, ono mwiru, ate ono ti mwiru. Kurisito n'ali byonabyona era n'ali mu byonabyona.