Okulira 1:8 - Baibuli Ekibono kya Katonda 2014

⁸ Abantu ab'omu Yerusalemu abo baayonoona inho mu maiso ga Katonda, baamufuukira ekyenhinhalwa. Abaabatangamu ekitiisa baatoolera okubanhooma nga bababona ng'oti n'omuntu ali amadu. Bwenebwene bali mu nnaku era beebwalabwala olw'ensoni.

Okulira 1:8 ပူးပေါင်းရင်းမြစ်များ

Okulira 1:11

Abantu baamu boonaboona baagala eky'okulya nga bali mu nnaku. Baafaanisaamu ebintu byaibwe eby'omughendo einho basobole okufunamu emere, balobe kulambuka ndhala. Agho baalirira Musengwa bati: “Wo Musengwa Katonda, lingirira obone nga bwe tuli kunhoomebwa!”

Yeremia 13:26

Musengwa Katonda mwene aja kubatoolamu ebivaalo byaimwe, mube madu muswale.

Yeremia 13:22

Bwe weebuuza mule lwaki ebyo byonabyona bikutuuseeku, ni bakukanulaku ebivaalo byo, ni bakugema eby'entaka era ni bakukaka okuba niiwe? Okwiramu kuli nti, lwa kuba ebibi byo binene inho.

Okwolekebwa 3:18

“Kale nkugha amagezi onguleku zaabu alongooseibwa mu muliro osobole okuba omukombe, onguleku ebivaalo ebyeru ovaale owone ensoni edh'okubita ekidu, era onguleku obulezi obw'okusiiga ku maiso go oghange okubona.

Hosea 2:10

Ndimutoolamu ebivaalo yaaba madu mu maiso g'abagonzi be, ghaabulagho amutoola mu buyinza bwange.

Hosea 2:3

Bw'ataalekere ndidha kumwambulamu ebivaalo asigale madu ng'oti ni bwe yali ku lunaku lwe baamuzaaliraku. Ndidha kumufuula ng'oti irungu, abe ng'oti itaka ikalu ery'olubbalangu, era mmuleetere okufa endiwo.

Ezekieli 23:46

Musengwa Katonda akoba ati: “Mubasindikeku ekikuukuulu ky'abantu kibatuntuze era kibanhagululeku ebyaibwe.

Ezekieli 23:29

Nga bwe bakukyaye, balikutoolaku byonabyona bye wakolerera, baakuleka ng'oli madu ng'oti malaaya, era ng'ozira kantu naire. Obwenzi bwo n'obwamalaaya bwo,

Okulira 4:21

Imwe abantu ab'e Edomu n'imwe ababa mu Uzi museke inho era musagambe inho nga mukaali. Aye olwaimwe luli kwidha, lwe muligemesebwa ekikopo eky'obusungu bwa Musengwa Katonda. Mulikinhwa mwatamiira mwatoolera n'okubita amadu.

Okulira 2:10

Abasaadha abakaire ab'omu kibuga Sioni batyama agho ku itaka baasiriikirira. Beeyugha enkungu mu mitwe nga beesibye ebikaakaati olw'enaku. N'abaghala baamu boona baakuba amakiryaivu agho ku itaka.

Yeremia 34:17

Nze Musengwa Katonda nkoba nti mwandheemera mwaloba kugha Baisiraeli banaimwe idembe lyaibwe. Kale ni mubone eno, nze ndidha kubagha imwe eidembe ery'okufiira mu lutalo, n'ery'okufa endwaire ya kawumpuli, n'ery'okufa endhala. Ndidha kubafuula ekintu ekitiisa einho abantu boonaboona ku nsi.

Yeremia 24:9

Ndidha kubafuula ekintu ekitiisa einho abantu boonaboona ku nsi, bafuuke eky'okwogerwaku era eky'okuyeeyereza. Baidha kubanga kivumo era kikolimo, eyo yoonayoona ye ndibasansaaniza.

Yeremia 15:4

Ndidha kubafuula ekintu ekitiisa einho abantu boonaboona ku nsi, olw'ebyo Manasse mutabane wa Hezekia bye yakola mu Yerusalemu nga ni kyabazinga wa Buyudaaya.’

Yeremia 6:28

Boonaboona badheemu era bampwitu. Baja nga basalaganaku ebibono. Emyoyo gyaibwe mikalangufu ng'oti kyuma kya kikomo era ng'oti n'ekyuma ekigumu einho. Era boonaboona bakupankupania.

Yeremia 4:31

Mpuliire okusinda ng'oti n'okw'omukazi ali kulumwa okuzaala, era naawulira okwana ng'oti n'okw'omukazi ali kuzaala omwana we omuberi. Okwo n'okulira kwa Yerusalemu ali kusika omuuka nga tigwidha, n'ayandhuluza emikono ng'akoba ati: ‘Nkagwireku nze! Abatemo bali kwenda kundhita!’”

Isaia 47:3

Abantu balikubona ng'oli madu, nga bakuswaziiza n'ensoni dhaakugema. Nja kwesasuuza era ezira muntu ye ndisaasira naire.”

1 Bakyabazinga 9:9

Olwo abantu baliirangamu bati, ‘Lwa kuba baava ku Musengwa Katonda waibwe, eyatoola badhaadha baibwe mu nsi Misiri, ate baira ku kugheereza n'okusinza bakatonda abandi. Musengwa Katonda kyaviire n'abatuusa ku kabi akaaga agho.’ ”

1 Samueli 2:30

Nze Musengwa Katonda wa Isiraeli kyenva ni nkoba nti, nasuubiza ng'ab'endhu yo n'ab'endhu ya dhaadha wo banampeerezanga ekiseera kyonakyona. Aye mpegaano nze Musengwa Katonda nkoba nti ekyo nkimenhiegho, kuba abo abantaamu ekitiisa, be ndidha okutangamu ekitiisa, ate abo abaanhooma, tibaateebwengamu kanhagansi.

1 Bakyabazinga 9:7

olwo nditoola Abaisiraeli mu nsi ye mbaghaire, era naalekulira agho eisinzizo lino lye ntukwiza okunsinzizangamu. Isiraeli erifuuka eky'okwogeraku era yaafuuka enseko dh'abalamu mu maghanga goonagoona.

Amainhama 3:7

Olwo amaiso gaibwe bombi gaazibuka, baategeera nga bali madu. Kale baatunga amakaba ag'omuti omutiini, baagakolamu ebivaalo beeghemba.

Okulira 1:17

Ekibuga Sioni kiri ng'oti n'omuntu agoloire omukono ng'ali kusabiriza, aye ghaabula amusaasiraku. Musengwa yalagira abantu abeezungulwire abantu ba Yakobo boonaboona, babe bazigu baibwe. Yerusalemu kyafuuka ekyenhinhalwa eri abantu abo.

1 Bakyabazinga 9:6

Aye iwe oba baidhukulu bo, bwe mulinvaaku ni mudheemera amateeka n'ebiragiro byange bye mbaghaire, ate ni mwira ku kugheereza n'okusinza bakatonda abandi,

Yeremia 32:23

Aye bwe baatuuka mu nsi eno ni bagitwala n'eba eyaibwe ku bwaibwe, tibaagondera biragiro byo, waire okwebisa nga bwe wabagalagira. Ghazira kye baakolaku ku ebyo bye wabalagira okukola. Kale ni, iwe n'okubaleetaku okuzikirira kuno kwonakwona.

Ezekieli 39:23

Era amaghanga galimanha ng'ab'eighanga Isiraeli baatwalibwa mu bunhage lwa bibi byaibwe, kuba baaneefuulaku bandeetera okubalekulira agho, naabaghaayo mu ngalo edh'abazigu baibwe baabaita boonaboona.