Okubala 10:10 - Baibuli Ekibono kya Katonda 2014

¹⁰ Aye era ni mu biseera byaimwe eby'eisanhu, ni ku mbaga edh'ebibinuko byaimwe ebyalagirwa, ni ku ntadiikwa y'omwezi, mwidha kufuuwanga amagwala nga muleese ebigheebwayo byaimwe ebyokebwa n'ebigheebwayo byaimwe olw'okutabagana. Ekyo kiidha kundeeteranga nze Katonda waimwe okubaidhukira. Ninze Musengwa Katonda waimwe.”

Okubala 10:10 ပူးပေါင်းရင်းမြစ်များ

2 Bakyabazinga 4:23

Iba yaamubuuza ati: “Lwaki oli kuja y'ali olwaleero, ate nga ti lunaku lwa Sabbato waire okuba olw'Ekibinuko eky'Okuboneka kw'Omwezi?” Omukazi yairamu ati: “Iwe otafaayo.”

1 Ebyomubyanda 15:24

Bakabona bano nga n'ab'okufuuwa amagwala mu maiso g'Esanduuku ya Katonda: Shebania, Yoshafati, Nethaneli, Amasai, Zekaria, Benaia, ni Eliezeri.

1 Ebyomubyanda 15:28

Kale batyo Abaisiraeli boonaboona baaleeta Esanduuku y'Endagaano ya Musengwa Katonda nga bali kukuba emizira, eno nga bwe bafuuwa endeka n'amagwala, era nga bwe bakuba n'ebide, n'entongooli, n'endingidi, nga biri kuvuga inho.

1 Ebyomubyanda 16:42

Hemani ni Yeduthuni era n'abaakuumanga amagwala, n'ebide, n'ebivuga ebindi byonabyona bye baakubanga okwembera Katonda. Ate batabane ba Yeduthuni yaabata ku gw'okukuumanga emiryango.

2 Ebyomubyanda 29:26

Abalevi baayemerera nga bagemye n'ebivuga bya Daudi, ni bakabona boona baayemerera nga bagemye amagwala.

2 Ebyomubyanda 29:28

Abantu boonaboona abaali beesolokeiza agho, baasinza. Abembi baayemba, n'abafuuyi b'amagwala baagafuuwa. Ebintu byaba bityo, okutuukiza irala ekigheebwayo ekyokebwa lwe kyawaagho.

2 Ebyomubyanda 7:6

Bakabona baayemerera mu bifo byaibwe. N'Abalevi boona baayemerera nga balingagaine ni bakabona abo, nga bagemye ebivuga Daudi bye yakola okusaakirangaku Musengwa Katonda era baabikozesa mu lwembo Daudi oyo lwe yabeegeresa olw'okwebaza Musengwa Katonda, olw'okuba okugonza kwe tikukoma, kubaagho byanda na byanda. Bakabona baafuuwa amagwala nga n'Abaisiraeli boonaboona beemereire.

Ezera 3:10

Abazimbi bwe baatoolera okutaagho omusingi gw'eisinzizo lya Musengwa Katonda, bakabona nga bali mu bivaalo byaibwe eby'obwakabona baidha n'amagwala, n'Abalevi ab'oku nda ya Asafu boona baidha n'ebide, nga boonaboona baidha okusaaka Musengwa Katonda, nga Daudi kyabazinga wa Isiraeli bwe yalagira.

Nehemia 12:35

n'abandi ku bakabona abaajanga nga bafuuwa amagwala, bano: Zekaria mutabane wa Yonathani era mwidhukulu wa Shemaia, Shemaia yaaba mutabane wa Mattania, Mattania yaaba mutabane wa Mikaia, Mikaia yaaba mutabane wa Zakkuri, ate Zakkuri yaaba mutabane wa Asafu.

Zabbuli 150:3

Mumusaake nga mufuuwa amagwala, mumusaake nga mukuba endingidi n'entongooli.

Zabbuli 81:3

Mufuuwe eigwala ku Kibinuko eky'Okuboneka kw'Omwezi, ni ku lunaku lwe gutyaime ku ntebe.

Zabbuli 81:4

Ekyo kya iteeka mu Isiraeli, era kiragiro kya Katonda wa Yakobo.

Zabbuli 89:15

Wo Musengwa Katonda, nga ba nkabi abo abakukubira emizira, ni batambula nga bagonzi y'oli.

Okuvaayo 28:29

“Mu nsambo eyo, Aaroni aidha kubanga n'amaina ag'abaana ba Yakobo ku kivaalo kye eky'omu kifuba, mwene ng'Omukulu wa Bakabona ky'anaakozesanga okumanha Katonda ky'ayenda buli lw'anaajanga mu Kifo Ekitukuvu mu maiso ga Katonda kibe eky'okwidhusa eri Abaisiraeli.

Okuvaayo 30:16

Oidha kusoloza feeza oyo okuva ku Baisiraeli, ye baidhanga okughaayo olw'ebibi byaibwe, omukozese mu mirimo egy'omu Weema ey'Okwagaananirangamu ni Musengwa Katonda. Omutango ogwo gwidha kubanga ekiidhukizo mu maiso gange nze Musengwa Katonda eri Abaisiraeli olw'obulamu bwaimwe.”

Isaia 27:13

Ku lunaku olwo, eigwala lirivuga n'amaani, okweta Abaisiraeli boonaboona abaliba mu Assiria ni mu Misiri, baidha baasinza Musengwa Katonda ku lusozi olutukuvu mu Yerusalemu.

Abalevi 23:24

“Kobera Abaisiraeli oti ku lunaku olusooka olw'omwezi ogwomusanvu, ghanaabangagho okuwuumulira irala olw'ekiidhukizo. Kunaalangirirwanga nga bafuuwa endeka, era muneesolozanga okusinza.

Okubala 10:9

Bwe munaabanga muja okulwana olutalo mu nsi yaimwe ng'omuzigu abalumbye, mwidha kufuuwanga amagwala ng'akamanhiso ak'okuja. Olwo nze Musengwa Katonda waimwe ndidha kubaidhukiranga mbawonie abazigu abo.

Okubala 28:11

“Ku lunaku olusooka olwa buli mwezi, mwidha kughangayo eri nze Musengwa ekigheebwayo ekyokebwa, nga kirimu bino: ente enume ento ibiri, entaama enume enkulu ndala, n'entaama ento enume musanvu edh'omwaka omwaka omulala omulala, nga byonabyona biziraku kikyamu kyonakyona.

Okubala 29:1

“Ku lunaku olusooka olw'omwezi ogwomusanvu mwidha kwesolozanga okunsinza, era mutalukolerangaku mulimo gwonagwona. Ku lunaku olwo mwidha kufuuwanga endeka,

Matayo 11:28

“Mwidhe ye ndi imwe mwenamwena abadaaga n'abali n'ebibavuna, ndidha kubawuumuza.

Ebikolwa by'Abatume 10:4

Korunelio yaamulingirira era ng'atya, yaamukoba ati: “Musengwa, kiki?” Malaika yaamwiramu ati: “Katonda aidhukiire okusaba kwo n'okutona kwo.

1 Ab'e Korintho 15:52

mu kaseera akatonioli ng'oti kutemya na kuzibula. Endeka bw'erivuga n'abafu balizuukizibwa nga tibakairayo kufa kabiri, olwo ife twafuuka bufuuke.

1 Ab'e Thessalonika 4:16

Musengwa mwene aliika ng'ava mu igulu, ekiragiro kyawulirwa mu iroboozi ery'amaani, isebamalaika yaayeta era endeka ya Katonda yaavuga. Abo abaafa nga baikiriza mu Kurisito n'abalisooka okuzuukira,

1 Ab'e Thessalonika 4:18

Agho ni buli muntu agumye mwine n'ebibono ebyo.

Yoshua 4:7

Nga mubakobera muti, ‘Amaadhi ag'omwiga Yorudani gaalekera agho okutambula, Sanduuku y'Endagaano bweyali ng'eri kusala omwiga ogwo.’ Kale amabaale ago ganaabanga kiidhukizo eri abantu Abaisiraeli ebyanda n'ebyanda.”

Yoshua 6:4

Bakabona musanvu, nga buli muntu agemye endeka eyakolebwa mu iyiga ery'entaama, baidha kukulemberamu Sanduuku y'Endagaano. Ku lunaku olwomusanvu mulyezungulula ekibuga emikuzi musanvu nga bakabona bafuuwa endeka.

Okwolekebwa 22:17

Mwoyo n'Omugole bakoba bati: “Idha!” N'oyo awulira bino akoba ati: “Idha!” Kiisi ali ndiwo aidhe, era kiisi ayenda maadhi ga bulamu, agafune aghazira kusasula.

1 Samueli 20:5

Daudi yaakoba Yonathani ati: “Bona eno, enkyo n'olunaku olw'Ekibinuko eky'Okuboneka kw'Omwezi. Era nandibaire nga nteekwa okutyama ni kyabazinga okulya. Aye ndeka nje neegise mu nsiko okutuusa eigulo ly'olunaku olunairirira olwenkyo.