Obadia 1:3 - Baibuli Ekibono kya Katonda 2014

³ Okwekuluntaza kwo kukulimbye, kuba odhuuba oti ekifo ky'olimu kyesigika inho ng'oti n'ekifo ekigumu eky'okwewogomamu ekyabaadhibwa mu ibaale. Era olw'okuba amaka go gali ghaigulu mu nsozi, okoba oti, ‘Naani alisobola okumpanula eno n'andhisa ghansi?’

Obadia 1:3 ပူးပေါင်းရင်းမြစ်များ

Amainhama 36:8

Kale, Esau, era ayetebwa Edomu, yaabanga mu Seiri ensi ey'ensozi.

2 Bakyabazinga 14:7

Amazia yaitiramu Kiiko ky'Omuunhu abaisirukale Abaedomu omutwalo mulala (10,000), yaanhaga ekibuga Sela mu lutalo, yaakituuma eriina Yokitheeli, lye bakaakyeta ni ye buli eno.

2 Ebyomubyanda 25:11

Amazia yaasiba omwoyo, yaakulembera eigye lye, yaaja mu Kiiko ky'Omuunhu, yaitirayo abaisirukale Abaedomu omutwalo mulamba (10,000).

2 Ebyomubyanda 25:12

Abayudaaya baagema n'abantu abandi omutwalo mulala, baabatwala ghaigulu ku ngulu ku lubaale, memale baabawoloba ghansi, boonaboona baamanhianguka.

Yobu 20:6

Omubi asobola okukula yaawaiguka okutuuka ku igulu, ng'omutwe gwe gutuuka ku bire.

Ensambo 16:18

Okwekuluntaza kuleeta okuzikirira, n'okwegulumiza kwavaamu okugwa.

Ensambo 18:12

Okwekuluntaza n'okukulembera okuzikirira, aye okwewombeeka n'okusooka memale omuntu baamutaamu ekinhagansi.

Ensambo 29:23

Okwekuluntaza okw'omuntu kumuleetera okugwa, aye obuwombeefu bw'omuntu bumuteesaamu ekinhagansi.

Isaia 16:6

Aye ab'omu Buyudaaya bakoba bati: “Twawulira ira okwekuluntaza kw'Abamoabu, n'okwebona bonka. Era twidhi nga bwe beetwala okuba aba ghaigulu nga beepankapanka. Aye ebyo bye beesaakiriza nabyo bya bwereere.”

Yeremia 21:13

Mubone eno, imwe abantu ababa mu kiiko. Ndidha kubakolaku waire mugungumala ng'oti ibaale eikologho eriri ku museetwe. Era mukoba mule muti, ‘Naani anaidha okutulumba? Era naani anaatuuka eno ye tuba?’

Yeremia 37:9

Nze Musengwa Katonda mbalabula mulobe kwerimba muti Abababilonia tibaidha kwira. Bwenebwene baidha kwira.

Yeremia 48:28

“Imwe abantu b'e Moabu, muve mu bibuga byaimwe, muje mubenga mu mbaalebaale. Mube ng'oti mayemba agazimba mu ndhatika edhiba mu gabaale.

Yeremia 49:16

Okwekuluntaza kwo kukulimbye, era ghazira akutya kuba olowooza oti ekifo ky'olimu kyesigika inho, ng'oti n'ekifo ekigumu eky'okwewogomamu ekyabaadhibwa mu ibaale. Era weesigulira inho ku ky'amaka go okuba nga gali ghaigulu mu nsozi. Aye Musengwa Katonda oyo alikughanulayo yaakwisa ghansi. Musengwa Katonda mwene n'akobye.”

Yeremia 49:4

Lwaki abantu imwe abatali beesigwa mwesuutiriza? Amaani gaidha kubawaamu. Lwaki mwesigulira ku bukombe bwaimwe, nga mukoba muti ghazira asobola kukana n'abalumba?

Ezekieli 28:16

Weemalira inho mu by'okusuubula byakuleetera okukozesa obukambwe, waakola ebibi. Kale naakubinga ku lusozi lwange olutukuvu ng'oli mwonoonefu. Era kikerubi ekyakukuumanga kyakubingirira okukutoola mu mabaale ag'omughendo agamirimiinha.

Malaki 1:4

Abantu Abaedomu baidhukulu ba Esau, basobola okukoba bati: “Waire endhu dhaife baadhimenhamenha, tuliiramu twadhizimba twadhiizaagho.” Aye Musengwa Katonda Afuga Amagye akoba ati: “Baleke bazimbe, aye era nja kudhimenhamenha, okutuusa bwe balyetebwa ‘Eighanga ery'abakozi b'ebibi’, era ‘Abantu Musengwa Katonda be yasungughalira okuva eira n'eira, ebyanda n'ebyanda.’ ”