Mika 4:7 - Baibuli Ekibono kya Katonda 2014

⁷ Waire nga balema era nga baatwalibwa eghala einho okuva ewaibwe, ndidha kubafuula bakaawonagho era mbafuule eighanga ery'amaani. Era nze Musengwa Katonda mwene, ndidha kubafugiranga ku lusozi Sioni okuva n'olwo okutuusa ebyanda n'ebyanda.”

Mika 4:7 ပူးပေါင်းရင်းမြစ်များ

Zabbuli 2:6

ati: “Kyabazinga wange ye nalonda, namuta ku lusozi lwange olutukuvu Sioni.”

Isaia 16:5

Olwo omuntu ow'oku lulyo lwa Daudi, alityama ku kityamo eky'obwakyabazinga, yaafuga abantu n'ekisa ng'abagonza obutalekera era nga tasaliriza. Aliba mwangu mu kukola ebituufu ng'akolera ku mazima.”

Isaia 24:23

Olwo omwezi guligema enzikiiza, n'endhuba yaaloba kwaka; kuba Musengwa Katonda Afuga Amagye n'aliba kyabazinga ku lusozi Sioni ni mu Yerusalemu. Era alyoleka ekitiisa kye eri abakulembeze b'abantu.

Isaia 6:13

Era ni bwe ghalisigalagho mu nsi eyo omuntu omulala omulala ku buli bantu eikumi, yeena alizikirizibwa kabiri, yaaba ng'oti n'ekikolo eky'omuti omukologho, ekisigalagho nga gutemeibwagho.” Ekikolo ekyo n'ekiba ensigo kwe gusibukira.

Isaia 60:22

N'amaka agasingayo obutono galifuuka ekika ekiramba, era ekika ekisembayo obutono kirifuuka eighanga ery'amaani. Nze Musengwa Katonda ekyo ndikireetera okwangugha okubaagho, ng'ekiseera kyakyo kimaze okutuuka.”

Isaia 66:8

Naani eyaali awuliireku ekintu ng'oti n'ekyo, era naani eyaali akiboineku? Ensi esobola okuzaalibwagho mu lunaku olulala luti? Eighanga lisobola okumerukagho mu kaseera obuseera? Aye Sioni yali yaakalumwa ati, ng'azaala abaana be.

Ezekieli 43:7

“Iwe omuntu, kino n'ekifo ekibaamu ekityamo kyange eky'obwakyabazinga, ekifo mwe nnaabanga nga ndi mu bantu bange Abaisiraeli okubafuganga ebyanda n'ebyanda. Ka babe abantu beene ab'eighanga Isiraeli oba bakyabazinga baibwe, ghazira aliirayo kabiri kwonoona liina lyange eitukuvu, n'anvaaku kusinza bintu ebitali nze Katonda, oba okuzimbira emirambo gya bakyabazinga ebiidhukizo

Danieli 2:44

Mu biseera eby'abafuzi abo, Katonda ow'eigulu alitaagho obwakyabazinga nga ghazira kisobola kubuzikiriza, era ng'ezira ighanga lisobola kubaghangula. Aye bulimaniangula obwakyabazinga obundi bwonabwona bwabusaaniagho, bwene bwabaagho ebyanda n'ebyanda.

Danieli 4:34

Agho kyabazinga Nebukadinezzari yaakoba ati: “Ekiseera ekyo nga kiwoireku, nze Nebukadinezzari nalinga ghaigulu ku igulu, nairamu okutegeera obukalamu. Agho neebaza oyo Ali Ghaigulu Yeene, naamusaaka era naamugha ekitiisa, oyo omulamu ebyanda n'ebyanda. Kuba obwakyabazinga bwe bwa byanda na byanda, era obufuzi bwe bulibaagho ense n'ense.

Danieli 7:14

Era baamugha obukumu, ekitiisa, n'obwakyabazinga. Olwo abantu boonaboona abava mu maghanga goonagoona, era aboogera enimi dhoonadhoona, basobole okumugheerezanga. Obufuzi bwe tibukoma, bubaagho byanda na byanda, era obwakyabazinga bwe tibalibuzikiriza.

Danieli 7:27

Olwo obwakyabazinga, n'obukumu, n'ekitiisa, ebiri ghansi gh'eigulu, balibigha abatukuvu b'oyo Ali Ghaigulu Yeene. Obwakyabazinga bwaibwe buliba bwa byanda na byanda, era abafuzi boonaboona ab'ensi balibagonderanga baabagheereza.”

Hosea 1:10

Abaisiraeli baliba bangi inho ng'oti musenho gwa ku nhandha ogutasoboka kubalibwa oba okupimwa. Mperaano Katonda abakoba ati: “Timuli bantu bange,” aye ekiseera kirituuka yaabakoba ati: “Muli baana ba Katonda omulamu.”

Yoeli 2:32

Aye kiisi alisaba Musengwa Katonda okumubeera alirokolebwa, kuba ku lusozi Sioni mu Yerusalemu eribaayo abaliwona, nga Musengwa Katonda mwene bwe yakoba. Abo Musengwa Katonda mwene baalirondamu n'abaliwonagho.”

Yoeli 3:17

“Olwo mulimanha nga ninze Musengwa Katonda waimwe, era nga mba ku lusozi lwange olutukuvu Sioni. Yerusalemu kiriba kibuga kitukuvu, era abagwira tibaliiramu kukighangula kabiri.

Obadia 1:21

Abasaadha abalwani ab'amaani ab'omu Yerusalemu baja kulumba Edomu bakighangule era bakifuge. Era Musengwa Katonda mwene n'anaabanga kyabazinga.”

Mika 2:12

“Aye imwe abantu bange Abaisiraeli, abaliwonagho, nja kubasoloza mbaleete ghalala ng'omwayi bw'asoloza entaama dhe mu kisibo kyadho. Era ekiketezo kyaimwe kija kwiramu okwidhula abantu nga baseregulya buseregulye ng'oti n'ekyayiro ekirimu entaama kamaala.”

Mika 2:13

Agho Mika yaalanga ati: “Katonda mwene aja kwiguliragho abantu be, abakulemberemu ng'abatoola mu bunhage. Baja kughagulagho omulyango ogw'ekibuga, babitemu baje nga ghazira na kibakobaku. Musengwa Katonda mwene era kyabazinga waibwe, n'aja okubakulemberamu abafulumye.”

Mika 5:3

Kale Musengwa Katonda aja kulekulira agho abantu be Abaisiraeli okumala entangama, okutuusa omukazi ali kulumwa okuzaala lw'alizaala omufuzi oyo. Olwo Baisiraeli baine baja kwira okuva mu bunhage, beeyimbe ku baganda baibwe abaasigala.

Mika 7:18

Ezirayo katonda ali ng'oti niiwe, Musengwa Katonda. Osonigha ebibi eby'abantu bo abawoniegho. Tosungughala bujiiririire, aye osangaala okutwoleka okugonza kwo okutakoma.

Zefania 3:13

Era abantu abo abaliwonagho mu Isiraeli tibalikola kisobu naire, tibalyogera bya buguya, oba okukozesa olulimi olubuzaabuza. Baidha kubanga bulungi nga bazira kye badhulirira, era nga ghazira kintu kyonakyona kibatiisa.”

Zefania 3:20

Mu kiseera ekyo mwenamwena nja kubasololeza ghalala mbaize eka. Bwenebwene nja kubafuula bamanhifu era abasaakibwa mu nsi yoonayoona, era mbairizeegho ebirungi nga mwenamwena mubona.” Musengwa Katonda n'akobye.

Luka 1:33

Alifuga ekika kya Yakobo ebyanda n'ebyanda, era Obwakyabazinga bwe tibulikoma.”

Okwolekebwa 11:15

Agho malaika owomusanvu yaafuuwa eigwala lye. Ghaabaagho amamiro mu igulu nga gakoba gati: “Obwakyabazinga obw'ensi bufuuse bwa Musengwa waife era bwa Kurisito: aidha kufuganga ebyanda n'ebyanda.”