Matayo 7:11 - Baibuli Ekibono kya Katonda 2014

¹¹ Kale, oba nga imwe ababi mwidhi okugha abaana baimwe ebirabo ebirungi, Iseimwe ali mu igulu talisingagho inho okugha ebirungi abamusaba?

Matayo 7:11 ပူးပေါင်းရင်းမြစ်များ

Amainhama 6:5

Musengwa Katonda yaabona ng'omuntu ku nsi afuuse mubi inho era ng'ebidhuubo bye bibi ekiseera kyonakyona.

Amainhama 8:21

Musengwa Katonda yaawunhiza akawoowo, yaasangaala, yaakoba mule ati: “Tikairayo kukolima nsi kabiri olw'omuntu by'akola, kuba omwoyo gwe gwidhwire bubi bwereere okuva mu buto bwe. Tikairayo kabiri kuzikiriza bintu biramu byonabyona nga bwe nkoze.

2 Samueli 7:19

Ate nga ekyo kyali kintu kitono inho ku iwe Musengwa Katonda, kuba era osuubiiza bingi ku izaire lyange mu biseera eby'omu maiso. Era ebyo, iwe Musengwa Katonda wange obyoleike nze omuntu obuntu naabimanha.

Yobu 15:16

Memale olwo aghanga atya okwesiga omuntu omwonoonefu era atagasa, eyeededa ebyonoono ng'oti yeededa maadhi!”

Zabbuli 84:11

kuba Musengwa Katonda oyo n'endhuba etumuliikirira ye tuja era n'atuwonia ng'oti ngabo. Atusaasira era yaatugha ekitiisa. Abo abakola by'ayenda ghazira kirungi ky'abaima.

Zabbuli 85:12

Bwenebwene Musengwa Katonda aidha kutugha ebirungi, ensi yaife ebale ebibala kyodo.

Zabbuli 86:15

Aye iwe Musengwa Katonda, niiwe Katonda asaasira era agemerwa abantu ekivunika, olwagho okusungughala, ogonza abantu obutalekera era oli mwesigwa inho.

Zabbuli 86:5

Wo Musengwa Katonda iwe oli mulungi, onsonigha era tolekera kugonza abo abakusinza.

Isaia 49:15

Musengwa Katonda oyo yaabairamu ati: Omukazi asobola okwerabira omwana we ayonka, yaaloba kugemerwa kisa mwana we oyo ye yazaala? Aye waire ng'omukazi asobola okwerabira, nze tiribeerabira naire.

Isaia 63:7

Ndiromboodha nga Musengwa Katonda bw'atugonza nga talekera, era naamusaaka olw'ebyo byonabyona by'atukoleire. Era ndimusaaka kuba ayoleike ekisa ekitaloodheka eri ab'endhu ya Isiraeli, olw'okusaasira kw'ali nakwo okwidhwire okugonza okungi einho.

Yeremia 17:9

“Naani asobola okutegeera omwoyo gw'omuntu? Ezira kirimbalimba nga gwene; mubi inho ebitaloodheka.

Yeremia 33:14

Musengwa Katonda yaakoba ati: “Bona, ekiseera kiri kwidha ntuukirize ekisuubizo kye nasuubiza abantu ab'omu Isiraeli n'ab'omu Buyudaaya.

Hosea 14:2

Mwire eri Musengwa Katonda era okusaba kwaimwe n'okube kufuuke ekigheebwayo kyaimwe kye mumugha, nga mumweghemba muti: “Tusonighe ebibi byaife byonabyona, osanhukire ebyo ebirungi mu ife. Twidha kukusaakanga n'eminwa gyaife.

Mika 7:18

Ezirayo katonda ali ng'oti niiwe, Musengwa Katonda. Osonigha ebibi eby'abantu bo abawoniegho. Tosungughala bujiiririire, aye osangaala okutwoleka okugonza kwo okutakoma.

Malaki 1:6

Musengwa Katonda Afuga Amagye akoba bakabona ati: “Imwe bakabona, omwana ata mu ise ekinhagansi, n'omugheereza yaakita mu musengwa we. Kale ni oba nze ndi lata waimwe, lwaki timuntaamu kinhagansi? Era oba ndi musengwa waimwe, lwaki timuntya? Lwaki muunhooma, aye kabiri mwamala mwambuuza muti, ‘Tukunhooma tutya?’

Matayo 23:9

Era ku nsi kuno mutabanga na muntu ye mweta ‘Lata’, kuba Iseimwe ali mulala, ali mu igulu.

Matayo 7:10

Oba ng'amusabye ekyenhandha n'amugha omusota?

Yoanne 3:16

Atyo Katonda bwe yagonza abantu ab'oku nsi, yaaghaayo Omwana we omulala bedengedenge kiisi amwikiriza alobe kuzikirira aye afune obulamu obutawaagho.

Ab'e Roma 3:19

Twidhi nga buli kyonakyona ekiri mu Mateeka kigema ku abo abafugibwa Amateeka, ghalobe kubaagho eyeewolereza, era abantu ab'omu nsi boonaboona Katonda abasalire omusango.

Ab'e Roma 3:9

Kale ife Abayudaaya tuli ni kye tusinga abamaghanga agandi? Busa, tuzira kye tubasinga kuba mmaze okubalaga nti Abayudaaya n'abamaghanga agandi boonaboona bafugibwa ekibi,

Ab'e Roma 8:32

Oyo ataasaasira na mwana we mwene, aye n'amughaayo ku lwaife twenatwena, aliroba atya okutugheera aghalala n'Omwana we oyo ebintu byonabyona?

Ab'e Galatia 3:22

Aye ng'ebyaghandiikibwa bwe bikoba, ensi yoonayoona esibiibwa mu maani ag'ekibi, olwo ekirabo ekyasuubizibwa olw'okwikiriza mu Yesu Kurisito kibe nga kigheebwa abo abaikiriza.

Yakobo 1:17

Kiisi kirabo kikalamu era ekituukiriire, kiva mu igulu ye Lata eyatonda ebyaka ku igulu. Oyo tafuukafuuka, oba okuleeta enzikiiza ng'akyukakyuka.

1 Yoanne 3:1

Mubone Lata nga bwe yatugonza, ife okwetebwa abaana ba Katonda! Ate nga era kye tuli. Ensi kyeva n'etatumanha lwa kuba yeena tiyamumanha.

1 Yoanne 4:10

Kuno ni n'okugonza, ti lwa kuba nga ife twagonza Katonda aye Katonda yatugonza era yaatuma Omwana we abe omutango olw'ebibi byaife.