Mariko 13:11 - Baibuli Ekibono kya Katonda 2014

¹¹ “Ate bwe babagemanga ni babaghaayo muteraliikiriranga kya kwogera, aye ekinaabagheebwanga mu saawa yeene eyo kye munaakobanga. Kuba ti niimwe aboogera aye Mwoyo Mutukuvu.

Mariko 13:11 ပူးပေါင်းရင်းမြစ်များ

2 Samueli 23:2

Daudi oyo yakoba ati: “Omwoyo gwa Musengwa Katonda gwogerera mu nze, antaire ebibono bye mu kanwa.

Isaia 50:4

Musengwa Katonda andhegereisa bye nnaayogera, bisobole okwiza amaani mu muntu akooye. Katonda oyo anzuusa buli kaakyeire yampa amaani, ag'okuwulira by'aba aja okundhegeresa.

Matayo 10:17

Mwekuume abantu kuba balibaghaayo mu mbuga, era ni mu sinagoga dhaibwe, balibakuba enkoba.

Mariko 13:12

Omuntu alighaayo muganda we okwitibwa, lata w'omwana alighaayo omwana, era abaana balidheemera ababazaala, baabaita.

Mariko 13:9

“Imwe beene mwekuume baidha kubatwala mu mbuga, baidha kubakubira mu sinagoga era balibasimba mu maiso ag'abafuzi ni bakyabazinga nga babalanga nze, mube abadhulizi mu abo.

Luka 21:12

Aye ng'ebyo byonabyona bikaali kubaagho, balibagema baabadaazadaaza, baabaghaayo mu mikono gya ab'obuyinza mu sinagoga ni mu makomera, baabaseeghayo ye bakyabazinga ni y'abafuzi abandi, ku lwange.

Yoanne 3:27

Yoanne yaabairamu ati: “Ezira afuna kitone kyonakyona nga tikiviire mu igulu.

Ebikolwa by'Abatume 2:4

era boonaboona baidhula Mwoyo Mutukuvu baatoolera okwogera mu nnimi edhindi, nga Mwoyo bwe yabaghanga okwogera.

Ebikolwa by'Abatume 3:13

Katonda wa Aburahamu, Katonda wa Isaaka, Katonda wa Yakobo, Katonda wa badhaadha baife, n'agulumiiza Omwana we Yesu, oyo ye mwaghaayo era ni mumwegaana mu maiso ga Pilato, bwe yali asazeegho okumulekula.

Ebikolwa by'Abatume 4:31

Bwe baamala okusaba, ekifo ghe baali beesololeiza kyatengeesebwa, boonaboona baidhula Mwoyo Mutukuvu, baayogera ekibono kya Katonda nga bagumu.

Ebikolwa by'Abatume 6:10

Aye tibaamusobola olw'amagezi aga Mwoyo eyamwogererangamu.

Ebikolwa by'Abatume 6:15

Abo boonaboona abaali batyaime mu lwekobaano bwe baalingirira Sitefano, baabona nga mu maiso ali ng'oti malaika.

Ebikolwa by'Abatume 7:55

Aye Sitefano nga aidhwire Mwoyo Mutukuvu, yaalingirira mu igulu era yaabona ekitiisa kya Katonda, ni Yesu nga ayemereire ku luuyi olw'omukono omusaadha ogwa Katonda.

1 Ab'e Korintho 2:13

Kale bwe tuba nga twinhonhola abo abali ni Mwoyo, titukozesa bibono bya magezi ga bantu buntu, aye tukozesa bibono bya Mwoyo.

Ab'Efeso 3:5

Mu byanda eby'eira ghazira muntu yeenayeena eyamanhisibwaku ku kino mu nsambo oti n'eno Mwoyo y'akyolekamu Abatume be n'abalanzi be abatukuvu.

Yakobo 1:5

Oba nga ghaligho ku imwe azira magezi, asabe Katonda aidha ku gamugha kuba oyo agabira abantu boonaboona n'omwoyo mulala.

1 Petero 1:12

Katonda yayoleka abalanzi abo ng'ebyo tibaabikola ku lwaibwe beene, aye ku lwaimwe. Ebintu ebyo n'ebyo bye mwawulira nga bibakoberwa abo abaabakobera Amawulire Amalungi. Bwe baali nga babakobera Amawulire Amalungi ago, Katonda yasindika Mwoyo Mutukuvu okuva mu igulu, yaidha okubalamba. Ni bamalaika beegomba okubona ku bintu ebyo.