Isaia 66:24 - Baibuli Ekibono kya Katonda 2014

²⁴ Bwe balibanga bavaayo, baliringanga ku mirambo egy'abantu abandheemera, kuba enhengere edhibalya tidhirifa, n'omuliro ogubookya tigulizikira, era baliba kyenhinhalwa eri abantu boonaboona.”

Isaia 66:24 ပူးပေါင်းရင်းမြစ်များ

Zabbuli 110:6

Aidha kusalira ensi dhoonadhoona omusango, adhiidhuze emirambo era afafaaganie bakyabazinga mu nsi yoonayoona.

Isaia 1:28

Aye alizikiriza abo abamudheemera n'abo abakola ebibi, era yaasaaniagho abo abamuvaaku.

Isaia 1:31

Ab'amaani baliba ng'oti isubi ikalu, ate ebibi bye bakola byaba ng'oti nnimi dha muliro, olwo baliyiira ghalala nabyo, era ghaabulagho n'omuntu asobola okulobera okuzikirizibwa kwaibwe.

Isaia 14:11

Ebitiibwa byo n'enhembo dhe baakwemberanga ku ntongooli, byonabyona babiisiisa e magombe. Enhengere buti n'edhifuuse omufaliso gw'osulaku, era dhaafuuka emyebwiko gye weebwika.’

Isaia 24:20

Ensi eritagala ng'oti mutamiivu, yaayuuzibwayuuzibwa ng'oti ntindi. Ebibi byayo bigizitooghereire byagigwisa, era teja kwirayo kusituka.

Isaia 26:11

Wo Musengwa Katonda, iwe ogalwire omukono gwo okubabonereza, aye era ekyo tibakibona naire. Kale iwe babonereze obaswaze nga bwe weesoomera okukola abazigu bo. Balage nga bw'olumirwa abantu bo.

Isaia 34:10

Omuliro ogwo tigulizikira omusana n'obwire, era guliniokanga omwosi lubeerera. Ensi eyo erifuuka bifulukwa ebyanda n'ebyanda, era ghazira muntu aliirayo kugibitamu kabiri.

Isaia 34:3

Abantu abaliitibwa tibaliziikibwa, aye balisigala bw'agho ekiwunha kyagema woonawoona, n'ensozi dhaakuuluula bwa musaayi gwaibwe.

Isaia 48:22

Musengwa Katonda akoba ati: “Abakozi b'ebibi tibaja kuba na miraala naire.”

Isaia 5:25

Obusungu bwa Musengwa Katonda butumbukiire ku bantu be ng'oti muliro, era agalwire omukono gwe okubabonereza. Ensozi dhiidha kutengeeta, n'emirambo gy'abo abaitiibwa gisigale agho mu nguudo dh'ebibuga ng'oti bikaba. Aye waire ng'ebyo bimaze okubaagho, obusungu bwe bwidha kusigala nga bukaaligho. Era asigale ng'akaasitwire omukono gwe okubabonereza.

Isaia 51:8

kuba baliwaagho ng'oti n'ekivaalo ekiriiriibwa ensiriri oba enseete. Aye obulokozi bwange bwe ndeeta bwidha kubangagho byanda na byanda, mbawonienga aghazira kulekera.”

Isaia 65:15

Abo be nalondamu balikozesanga eriina lyaimwe nga bakolima. Era imwe, nze Musengwa Katonda, ninze mwene ndibaita, aye abo abakola bye nhenda ndibatuuma eriina eiyaaka.

Isaia 66:16

Musengwa Katonda alibonereza abantu boonaboona ng'akozesa muliro na mpiima, era abo b'aliita baliba kamaala.

Danieli 12:2

Era bangi ku abo abali e magombe abaafa balizuukira, abandi baliba mu bulamu obutawaagho ate abandi baaba mu kuswazibwa n'okunhoomebwa okutakoma.

Zekaria 14:12

Musengwa Katonda alibonereza abantu b'amaghanga agalitanula olutalo ku Yerusalemu, ng'abasindikira endwaire embi einho: emibiri gyaibwe girivunda nga bakaatambula, amaiso gaibwe gaabavundira mu bighanga, n'enimi dhaibwe dhaabavundira mu kanwa.

Matayo 3:12

Agemye olugali mu ngalo, aidha kulongoosa bukalamu ekifo kye aghakubirwa engaano, engaano agikungaanize mu kyagi, omusinsi agwokye mu muliro ogutazikira.”

Okwolekebwa 21:8

Aye abo abati, n'abataikiriza, n'abadankaanu, n'abatemo, n'abenzi, n'abalogo, n'abasinza ebitali Katonda, n'abaguya boonaboona, ekifo kyaibwe kiriba mu nhandha ey'omuliro n'obunhota bwa salufa: okwo n'okufa okwokubiri.”