Isaia 60:2 - Baibuli Ekibono kya Katonda 2014

² Bona eno, enzikiiza erigema ku nsi, enzikiiza eri bedimudimu yaasandikira amaghanga. Aye Musengwa Katonda alivaayo ng'oti ndhuba yaakwakiraku, n'ekitiisa kye kya bonekera ku iwe.

Isaia 60:2 ပူးပေါင်းရင်းမြစ်များ

1 Bakyabazinga 8:11

nga bakabona tibaghanga kwingira kukola gwa bugheereza olw'ekire ekyo, kuba ekitiisa kya Musengwa Katonda kyabuna woonawoona mu isinzizo.

Zabbuli 102:16

Musengwa Katonda bw'alizimba Sioni n'akiizaagho alyoleka ekitiisa kye.

Zabbuli 80:1

Wo Katonda tukusaba otuwulirise, iwe alabirira abantu ba Isiraeli ng'oti n'omwayi ow'entaama, era n'okuuma aba Yosefu ng'oti byayo byo. Iwe ali ku kityamo kyo eky'obwakyabazinga ekiri ku bitonde eby'amaghagha ebyetebwa bikerubi,

Isaia 2:5

Kale ni, imwe baidhukulu ba Yakobo, mwidhe tutambulire mu butangaavu bwa Musengwa Katonda.

Isaia 4:5

Musengwa Katonda omusana alitaagho ekire ku Lusozi Sioni ni ku boonaboona abaliba balwesololeizaaku. Ate obwire yaataagho omwosi n'okwaka okw'enimi edh'omuliro. Ekitiisa kya Katonda oyo kirimaamira ekibuga kyonakyona, kyakikuuma.

Isaia 58:10

ni mugha abali endhala emere, n'abo abadaazibwadaazibwa ni mubagha bye beetaaga, olwo enzikiiza egemye bedimudimu ebeezungulwire imwe, erifuuka ng'oti n'obutangaavu obw'omu kasana ghagati.

Isaia 58:8

“Olwo mulimesunkana ng'oti n'endhuba eri kuvaayo, era mwawonezebwa mangu. Ebikolwa byaimwe ebirungi biribakulemberangamu, n'ekitiisa kyange nze Musengwa Katonda kyabavangaku einhuma nga kibakuuma.

Isaia 62:1

Ku lwa Sioni nze tiidha kusirika, ku lwa Yerusalemu tiidha kuwuumula naire, okutuusa nga kimaze okununulwa, n'obughanguzi bwakyo bwayaka ng'oti muliro.

Isaia 66:11

musobole okwonka mwigute amabeere ge agaidhwire, era mugabane ku kitiisa kye ekiswikiriire.”

Isaia 8:22

oba ni balinga ghansi ku itaka, tibalibona kintu kindi naire, okutoolaku enaku n'enzikiiza etiisa, egemye bedimudimu, era mu yeene eyo mwe balibabingira.

Yeremia 13:16

Mughe Musengwa Katonda waimwe ekitiisa ng'akaali kuleeta nzikiiza ni mwekontola ku nsozi. Era nga n'obutangaavu bwe mwasuubira akaali kubufuula nzikiiza eri bedimudimu.

Ezekieli 10:4

Ekitiisa kya Musengwa Katonda kyasituka nga kiva gha bikerubi, kyaja ku mulyango ogw'eisinzizo. Ekire kyagema woonawoona mu isinzizo, oluya lwaidhula obutangaavu obw'ekitiisa kya Musengwa Katonda.

Abalevi 9:23

Musa ni Aaroni baingira mu Weema ey'Okwagaananirangamu ni Musengwa Katonda. Bwe baafuluma, baasabira abantu enkabi, era ekitiisa kya Musengwa Katonda ekimesunkana kyabonekera abantu boonaboona.

Malaki 4:2

Aye imwe abantaamu ekitiisa, ndireetera amaani gange agalokola okuvaayo, gaababuna ng'oti butangaavu obuva ku ndhuba erimu ekiwonia. Muliba ba idembe, mwaja nga mumaduka ng'oti bunhana buva mu kigo.

Okubala 16:19

Kora yaasoloza abantu boonaboona, baayemerera ku mulyango ogw'Eweema eyo nga balingiriire Musa ni Aaroni. Agho ekitiisa kya Musengwa Katonda kyabonekera abantu boonaboona.

Matayo 15:14

Mubaleke abo abatulu abakulemberamu batulu banaibwe ate nga omutulu bw'akulemberamu mutulu mwine, bombi bagwa mu kiina.”

Matayo 23:19

Abatulu imwe, kiki ekisinga, ekirabo oba alutaari etukuza ekirabo ekyo?

Matayo 23:24

Imwe abakulemberamu abandi nga muli batulu, musengeedha ensowera egwire mu maadhi ge muja okunhwa, aye ate mwamira engamiya enamba!

Yoanne 1:1

Mu kwinhama kwa byonabyona Kibono yali ng'aligho era Kibono ng'aba ghalala ni Katonda era Kibono nga ni Katonda.

Yoanne 1:14

Kibono yaafuuka omuntu yaaba mu ife ng'aidhwire ekisa n'amazima. Twabona ekitiisa kye, ekitiisa ng'eky'Omwana wa Lata omulala bedengedenge.

Yoanne 1:18

Ghazira eyaali aboine ku Katonda. Aye Omwana we omulala bedengedenge aba aghalala n'Ise, n'amwoleka abantu ni bamumanha.

Yoanne 8:55

Timumumanhangaku aye nze mwidhi. Bwe nkoba nti timwidhi mba muguya ng'oti niimwe aye mmwidhi era ngema by'akoba.

Ebikolwa by'Abatume 14:16

Mu byanda eby'eira Katonda yaleka abantu boonaboona baakolanga nga bwe baayendanga.

Ebikolwa by'Abatume 17:23

kuba bwe mbaire nga ntambulatambula mu kibuga kyaimwe, naabona ebintu bye musinza era naayagaana alutaari eyaghandiikibwaku eti, ‘Ya katonda atamanhiibwa.’ Oyo ye musinza nga timumwidhi, n'oyo nze ye mbakobera.

Ebikolwa by'Abatume 26:18

Olibazibula amaiso, bagaluke okuva mu nzikiiza baire mu butangaavu, era bave mu buyinza bwa Sitaani baire ye Katonda, basoniyibwe ebibi byaibwe era bafune omugabo n'abo abatukuzibwa olw'okundhikiriza.’

2 Ab'e Korintho 3:18

Era ife twenatwena bwe tutoolebwaku ekitughembye ku maiso, tubonerwamu okumesunkana kwa Musengwa ng'oti mbonerwamu. Okumesunkana okuva ye Musengwa era nga ni Mwoyo, kutufuula twafaanana nga mwene mu kumesunkana okuja nga kweyongera.

Ab'e Kolosai 1:13

Yatutoola mu bufuge obw'ekizikiiza yaatwiza mu Bwakyabazinga obw'Omwana we omugonzi.

1 Petero 2:9

Aye imwe muli lulyo lulonde, bakabona aba Kyabazinga, muli ighanga itukuvu era abantu ba Katonda beene. Katonda oyo n'eyabeeta okuva mu nzikiiza okwira mu butangaavu bwe obwewuunhisa einho, yaabalonda okukobera abantu ebyewuninkiriza bye yakola.