Isaia 59:15 - Baibuli Ekibono kya Katonda 2014

¹⁵ Obwesigwa buziragho mu bantu, era oyo alekayo okukola ebibi bamuyiiga n'obukambwe.” Musengwa Katonda ekyo yakibona era yaasungughala, olw'obutabaagho kukolera ku mazima.

Isaia 59:15 ပူးပေါင်းရင်းမြစ်များ

Amainhama 38:10

Kye yakola kyaloba kusangaaza Musengwa Katonda. Kale Musengwa Katonda oyo yaamwita yeena.

2 Samueli 11:27

Ekiseera eky'okulira bwe kyawaaku, Daudi yaatuma abakwenda baaleeta Bathisheba oyo mu kisaagaati kya kyabazinga, yaamufuula mukazi we, era yamuzaalira omwana omulenzi. Aye ekintu ekyo Daudi kye yakola kyasungughaza Musengwa Katonda.

2 Bakyabazinga 9:11

Agho Yehu yaafuluma, yairayo ye baduumizi baine. Owundi ku abo yaamubuuza ati: “Bye mubaireku bya miraala? Omusaadha oyo omubbamu abaire ali kukukoba ki?” Yehu yaabakoba ati: “Mwena mwidhi bukalamu omusaadha oyo n'ebibono bye.”

2 Ebyomubyanda 21:7

Aye Musengwa Katonda yaaloba kwenda kuzikiriza bantu ba ndhu ya Daudi kubamaliriragho, kuba yasuubiza omugheereza we Daudi oyo ati eizaire lye n'erinaafuganga obwakyabazinga obwo ebyanda n'ebyanda.

Zabbuli 5:9

Mu minwa gy'abazigu bange timuva kya mazima naire, mu myoyo gyaibwe benda bwa kuzikiriza. Ebibono byaibwe magombe geene, enimi dhaibwe badhoogeza bya buguya.

Isaia 1:21

Kyewuunhisa okubona ng'ekibuga ekyalinga ekyesigwa, kifuuse ng'oti malaaya. Ate nga kyaidhulangamu abantu abakola amazima, era kyabangamu abantu abatuufu. Aye mperaano kirimu batemo beereere.

Isaia 10:2

Mulemesa abanaku okusalirwa emisango mu mazima, mwalemya abaavu okukolerwa ebituufu bye bagwaniire, mwanhaga ebintu bya banamwandu, n'ebya bamulekwa mwabinhaagaana.

Isaia 29:21

Katonda alizikiriza abo abaghaayiriza banaibwe emisango gye batakoze, n'abo abayamba abaizi ab'emisango ni batabonerezebwa, era n'abo abaguya ni balemesa omutuufu okusalirwa omusango mu mazima.

Isaia 32:7

Omukupankupania muntu mubi, ni by'akola bibi byereere. Asala amagezi okwitaitana abaavu ng'ayogera eby'obuguya, ni bwe baba nga bye basaba okukolerwa n'ebyo ebituufu bye bagwaniire.

Isaia 46:12

Imwe abantu ab'empwitu mumpulirise, imwe abali eghala einho n'okulokolebwa:

Isaia 48:1

Imwe ab'endhu ya Yakobo muwulire kino: Mwetebwa Baisiraeli abasimuka mu Yuda. Mulayira mu liina lya Musengwa Katonda, era mwayatula nga Katonda wa Isiraeli oyo, ni Katonda waimwe, aye nga bya ku munwa bunwa, ebiziramu mazima waire obwesimbu.

Isaia 5:23

Beedheereza abantu abaliku emisango baabaleetera okugisinga olw'enguzi, aye abaziraku musango baaloba okubakolera ekituufu ekibagwaniire.

Isaia 59:4

Ghaziragho muntu awoza musango mu butuufu ng'ali kukolera ku mazima. Aye muwoza ebiziragho, mwayogera eby'obuguya, memale mwasinga omusango. Mutegeka okukola ebibi era mwamala mwabikola, mwayonoonera irala.

Isaia 65:12

Imwe muliitirwa mu ntalo mwatirimbulwa kuba bwe nabeeta timwanvugira waire okufaayo okuwulirisa bye nkoba. Aye mwakola ebibi ye ndi, mwalondagho okukola ebitansangaaza.

Isaia 66:4

Kale zeena ndibasindikira ebyo byene bye batya ebibaleetera obulumi kuba bwe nayeta ghazira waire omulala ati eyavugira, era bwe nayogera ghazira yafaayo kuwulira. Aye baakola bwa bibi ye ndi, baalondagho okukola ebitansangaaza.”

Yeremia 29:26

“‘Musengwa Katonda yakufuula kabona mu kifo kya Yehoiada, buti niiwe akulira eisinzizo. Mulimo gwo okubona nga buli muntu eyeeralusa ni yeefuula okuba omulanzi, bamusiba ku ndhegere era baamuta ekikoligo mu nkoto eky'ekyuma ekigumu einho.

Yeremia 7:28

Oidha kubakoba oti eighanga lyaibwe tirimpulira nze Musengwa Katonda waalyo era tiriganha kugalagirwa. Tirikaali na mazima, waire okugoogeraku obwogere.’”

Okulira 3:36

Era yaamanha bweghabaagho omuntu asaliirwa omusango mu bukyamu.

Hosea 9:7

Ekiseera eky'okubonerezebwa kituuse, ekiseera ekya buli muntu okufuna ekimusaana. Mulikoba muti: “Omulanzi ono musiru,” era muti: “Omuntu ono aliku omwoyo gwa Katonda, mulalu.” Mukoba mutyo, kuba ebibi byaimwe bingi inho, n'obukyayi bwe muli nabwo bubitirivu.

Amosi 5:10

Abantu imwe, mukyagha omuntu abatakania olw'okusaliriza mu mbuga dh'amateeka. Era n'omuntu ayogera amazima abasina.

Mika 7:2

Mu Isiraeli muzira muntu mwesimbu akaasigairemu. Timukaali atya Katonda! Buli muntu aguniriire kakisa ka kutemula, era olw'ekyo buli muntu atega mwine olutuula.

Mariko 3:21

Ababe bwe baawulira, baaja okumugema baali bakoba bati: “Alalwike!”

Yoanne 10:20

Bangi ku abo baakoba bati: “Aliku omuzimu omubi era mulalu, muwulirisa wa ki?”

Yoanne 8:52

Agho Abayudaaya baamukoba bati: “Mperaano tukakaisa tuti oliku omuzimu omubi! Aburahamu yafa n'abalanzi boona baafa, aye iwe okoba oti yeenayeena akalangukira ku kibono ky'omugha talifa.

Ebikolwa by'Abatume 26:24

Paulo bwe yawoza atyo, Fesito yaayogerera ghaigulu ati: “Paulo olalwike! Okwegeresebwa einho kukulalwisa!”

Ebikolwa by'Abatume 9:1

Aye Saulo yali ng'ali kutuubatuuba n'obusungu obw'okwita abeegeresebwa ba Musengwa. Yaaja ew'Omukulu wa Bakabona,

Ebikolwa by'Abatume 9:23

Enaku kamaala bwe dhaabitagho, Abayudaaya beekobaana okwita Saulo,

Ab'e Roma 8:36

Nga bwe kyaghandiikibwa kiti: “Ku lulwo, tuli mu kabi ak'okufa olunaku lwonalwona. Tutwalibwa ng'entaama edhija okwitibwa.”

2 Ab'e Korintho 5:13

Oba tuli ng'oti balalu, tuli tutyo ku bwa Katonda, aye oba ti tuli balalu, ti tuli tutyo ku lwaimwe.