Isaia 58:5 - Baibuli Ekibono kya Katonda 2014

⁵ Mulowooza muti okwo n'okusiiba nze kwe nhenda ku lunaku omuntu lw'agwaine okwewombeekeraku einho? Muja mwakotesa emitwe ng'oti n'ekitoogo bwekikoteka. Era mweyalira ekutiya mu ivu, mwadhirambaalaku, okwoleka nga bwe munakughaire. Obwo ekyo kye mweta okusiiba ku lunaku nze Musengwa Katonda lwe nsiima?

Isaia 58:5 ပူးပေါင်းရင်းမြစ်များ

2 Bakyabazinga 6:30

Kyabazinga bwe yawulira omukazi oyo bye yayogera, yaakanulamu ebivaalo bye olw'okunakughala. Abantu abaali agho gha kimante ky'ekibuga ghe yali ali kubita, baabona ng'avaire ekutiya ku mubiri gwe olw'okwebonereza.

2 Ebyomubyanda 20:3

Yehoshafati yaatya, yaasaba Musengwa Katonda ng'amweghemba, era yaalangirira ghabeegho okusiiba mu Buyudaaya mwonamwona.

Ezera 10:6

Agho Ezera yaava mu luya emberi gh'eisinzizo lya Katonda, yaaja mu kisenge kya Yehohanani mutabane wa Eliashibu, yaaba eyo okutuusa obwire okukya nga tali kulya waire okunhwa ekintu kyonakyona ng'enaku emugemye olw'Abaisiraeli abaava mu bunhage obutaba beesigwa.

Ezera 8:21

Agho naalangirira okusiiba nga tuli eyo ku mwiga Ahava. Naakoba twewombeeke mu maiso ga Katonda waife nga tumusaba atukulembere mu lugendo lwaife, era atukuume n'abaana baife ni byonabyona bye twali nabyo.

Yobu 2:8

Yobu yaatoola akagyo ak'okweyagisanga ku mubiri, era yatyamanga mu ivu olw'okunakughala.

Zabbuli 69:13

Aye nze nsaba iwe Musengwa Katonda. Wo Katonda wange, ndhiraamu mu kiseera kyo mwene ky'oba ng'olonze, olw'okugonza kwo okungi okutakoma, era n'olw'okusuubiza kwo okwesigika.

Isaia 49:8

Musengwa Katonda era akoba abantu be ati: “Ekiseera eky'okusaasiriramu bwe kirituuka ndikusaasira, naakuyamba ku lunaku olw'okulokolwa. Ndikulwanirira naakukuuma, era naabita mu iwe okukola endagaano n'abantu boonaboona. Oliizaagho ensi buyaaka, abantu bairamu okubanga mu biketezo byaibwe ebyazika buti.

Isaia 58:3

“Baja baabuuza bati, ‘Lwaki tusiiba ng'ate Musengwa Katonda tafaayo? Era lwaki twebonereza aye n'atatufaaku naire?’ “Nze Musengwa Katonda naabairamu nti, ‘Mubone eno, ku lunaku lwe musiibiraku, muba muli kwenooneza bibasanhusa imwe beene. Era mutuntuza n'abakozi baimwe.

Isaia 61:2

Yantuma okulangirira nti ekiseera kituuse, Musengwa Katonda agemerwe abantu be ekivunika, era yeesasuulize ku bazigu baibwe. Era yantuma okugumya abo boonaboona abalira olw'okuba mu nnaku.

Abalevi 16:29

“Eiteeka lino munaalikuumanga enaku dhoonadhoona: Ku lunaku olweikumi olw'omwezi ogwomusanvu, Abaisiraeli n'abasenze abaabasengamu, baneebonerezanga era tibaakolenga mulimo waire omulala.

Abalevi 16:31

Olwo lunaabanga lunaku lutukuvu lwa kuwuumulira irala, era muneebonerezanga. Eiteeka eryo linaakuumibwanga enaku dhoonadhoona.

Zekaria 7:5

“Kobera abantu boonaboona abali mu nsi eno, ni ba kabona, oti bwe baasiibanga ni baliranga maziga mu mwezi ogwokutaanu n'ogwomusanvu okumala emyaka egyo ensanvu, tibaabikolanga lwa kugheesa nze kitiisa.

Matayo 6:16

“Bwe musiibanga, mutadhuunianga ng'abakuusa: Kuba beeyonoona emboneka yaibwe baboneke mu bantu nga basiiba. Bwenebwene ka mbakobere, abo empeera yaibwe bagifunie.

Luka 4:19

n'okulangirira omwaka gwa Musengwa ogw'okulokolwa.”

Ab'e Roma 12:2

Muteebisanga ng'abantu ab'ensi eno bwe beebisa, aye mukyuse ebirowoozo byaimwe musobolenga okumanha ebyo Katonda by'ayenda ebikalamu, ebiikirizibwa era ebituufu.

1 Petero 2:5

Mwidhe y'ali nga muli ng'oti n'amabaale amalamu, abazimbemu endhu ey'omwoyo. Mube bakabona abatukuvu abagheereza emisengo egy'omwoyo egisiimibwa Katonda, nga mubita mu Yesu Kurisito.