Isaia 49:23 - Baibuli Ekibono kya Katonda 2014

²³ Bakyabazinga balibalabirira imwe ng'oti ni baiseimwe beene, ni bainhebantu ba bakyabazinga abo baabalabirira ng'oti ni bainhaimwe beene.” Balibakubira amakiryaivu, baakutama n'ebyeni byatuuka ku itaka, baakomba enkungu ku bigere byaimwe. Olwo mwamanha nga ninze Musengwa Katonda era mwamanha muti abaneesiga tibaliswazibwa.

Isaia 49:23 ပူးပေါင်းရင်းမြစ်များ

Amainhama 27:29

Abantu aba buli nsambo bakugheerezenga, n'amaghanga kamaala gakukubirenga amakiryaivu! Ofugenga baganda bo, era abaana ba inhoko bakukubirenga amakiryaivu! Kiisi akukolimira akolimirwenga, era kiisi akusabira enkabi, yeena agheebwenga enkabi!”

Amainhama 43:26

Yosefu bweyaira eka, baganda be baamuleetera mu ndhu ebirabo bye baali nabyo, era baamukubira amakiryaivu.

Zabbuli 138:4

Wo Musengwa Katonda, bakyabazinga boonaboona ab'oku nsi baidha kukusaakanga, kuba baawulira bye wakoba.

Zabbuli 25:3

Bwene otaganha abo abasuubirira mu iwe kuswala, aye abo ab'empwitu abakudheemera, ka baswale.

Zabbuli 34:22

Musengwa Katonda anunula obulamu bw'abagheereza be, ghazira ku abo abamwesiga aja kusalirwa musango kumusinga.

Zabbuli 68:31

Abakwenda abakologho balireetebwa okuva e Misiri; ate ab'e Ethiopia baagololera Katonda emikono gyaibwe.

Zabbuli 69:6

Wo Musengwa Katonda Afuga Amagye, ka ndobe kuswaza abo abasuubira mu iwe. Wo Katonda wa Isiraeli, nhamba ndobe kunhoomesa abo abakusinza.

Okuvaayo 6:7

Ndidha kubafuula bantu bange, era nze mbenga Katonda waimwe. Olwo mulimanha nga ninze Musengwa Katonda waimwe, nga mbatwikwire emirimo emikalangufu Abamisiri gye babakaka okukola.

Isaia 14:1

Musengwa Katonda aliiramu okugemerwa Abaisiraeli ekivunika, yaabalonda kabiri okuba abantu be. Era alibaizaayo mu nsi yaibwe, baaba omwo. N'abasenze baliidha baabeeyimbaku, baabanga ghalala ni baidhukulu ba Yakobo abo.

Isaia 14:2

Amaghanga kamaala galiyamba Abaisiraeli okwirayo mu nsi yaibwe, Musengwa Katonda ye yabagha. Era abamaghanga agandi balifuuka bairu ba Baisiraeli abo, baabagheerezanga. Olwo abo abaatwala Abaisiraeli nga banhage baaba nga bafuulibwa okuba abanhage ab'Abaisiraeli abo. Era Abaisiraeli abo balifuganga abo abaabatuntuzanga.

Isaia 25:9

Ku lunaku olwo balikoba bati: “Mubone, Katonda waife wuuno. Tubairenga tumuteegerera okwidha okutuwonia. Ono ni Musengwa Katonda ye tubairenga tuteegerera, mpegaano ka tusangaale era tusagambe, kuba atulokoire.”

Isaia 26:8

Wo Musengwa Katonda, ife tujiira ku ebyo by'oyenda, era titwerabira liina lyo; kuba mu eryo mwe tufunira bye twegomba.

Isaia 29:22

Musengwa Katonda eyanunula Aburahamu kyava n'ayogera ku b'endhu ya Yakobo ati: “Imwe abantu bange, timuliiramu kuswazibwa kabiri, era timuliiramu kusiiwuuka mu maiso lwa nsoni kubagema.

Isaia 41:20

Olwo abantu balibona baamanha nga nze Musengwa Katonda ninze nkoze ekyo. Era balikirowoozaaku baakitegeera nga nze Omutukuvu wa Isiraeli ninze nkireeteire okubaagho.”

Isaia 43:10

Imwe Abaisiraeli niimwe abadhulizi bange era niimwe abagheereza bange be nalondamu, musobole okuumanha era mundhikirize. Olwo mukitegeere nga ninze Katonda zenka. Tebangayooku katonda yansooka kubaagho, era tighalibaagho alindhiririra naire.

Isaia 45:14

Musengwa Katonda era akoba Isiraeli ati: “Obukombe bwa Misiri n'ebintu by'Ethiopia eby'okusuubula birifuuka bibyo. N'abantu b'e Seba abawaigufu balifuuka bairu bo, baakunonereza nga bali ku ndhegere, era baidha y'oli okukukubira amakiryaivu nga baatula bati, ‘Bwenebwene Katonda ali n'iwe wenka, era oyo ni Katonda yenka, ezirayo wundi.

Isaia 45:17

Aye Musengwa Katonda buliidho aidha kulokolanga Isiraeli. Imwe Abaisiraeli ensoni tidhiribagema waire okuswazibwaswazibwa ebyanda n'ebyanda.’ ”

Isaia 49:7

Musengwa Katonda Omutukuvu era Omununuzi wa Isiraeli, yeeyongera yaayogera n'omugheereza w'abafuzi oyo abantu ye banhooma einho, n'amaghanga ye gakyagha. Yaamukoba ati: “Bakyabazinga balikubona ng'osibwirwa, baasituka baakutaamu ekinhagansi, n'abakungu boona balikubona baakukubira amakiryaivu; kuba Musengwa Katonda omwesigwa era Omutukuvu wa Isiraeli n'eyakulonda.”

Isaia 50:7

Aye ebyo nze tibiimalaamu maani waire okuntabula, kuba Musengwa Katonda ambeera. Kale ni neevaamu naabagumira ng'oti ibaale, era ndidhi nga tiidha kuswazibwa.

Isaia 52:15

Atyo bw'alyewuunhisa amaghanga kamaala, bakyabazinga baabulwa eky'okwogera; kuba balibona ekitabakoberwangaku era baategeera kye batawulirangaku.”

Isaia 52:6

Kale ni ekiseera kirituuka abantu bange baamanha nga ninze Katonda, era nga ninze ndhogeire.”

Isaia 60:14

Era abaana b'abo abaakutuntuzanga, baliidha baakukubira amakiryaivu; n'abo boonaboona abaakunhoomanga balikotesa emitwe gyaibwe agho gha bigere byo, baakweta ‘Ekibuga kya Musengwa Katonda,’ baakweta ‘Sioni, Ekibuga kya Katonda, Omutukuvu wa Isiraeli.’

Isaia 60:16

Amaghanga ni bakyabazinga balikulabirira ng'oti n'inhina w'omwana bw'amulabirira. Era olimanha nga ninze Musengwa Katonda Omulokozi wo era Omununuzi wo, Katonda Owamaani owa Isiraeli.

Isaia 60:3

Amaghanga galiidha eri obutangaavu bwo, ni bakyabazinga baidha eri okumesunkana kwo.

Isaia 62:2

Yerusalemu, amaghanga galibona bw'onunwirwa, ni bakyabazinga boonaboona baabona ekitiisa kyo. Olituumibwa eriina eiyaaka, Musengwa Katonda mwene ly'alikugha.

Isaia 64:4

Okuva eira n'eira ghazira muntu yaali aboineku waire okuwuliraku, oba okulowoozaaku ku Katonda owundi akolera abamusinza ebyewuninkiriza, okutoolaku iwe wenka.

Ezekieli 37:6

Nja kubayunga n'emiziisa, mbaghembeku emamba n'omubiri, era mbafuuwemu omuuka mube balamu. Olwo mumanhe nga ninze Musengwa Katonda.”

Yoeli 2:27

Olwo imwe Abaisiraeli mulimanha nga nze mba mu imwe, era nga nze Musengwa Katonda, ninze zenka Katonda waimwe, ezirayo wundi. Abantu bange tibaliirayo kabiri kuswazibwa.”

Mika 7:17

Balyeghaluliza mu nkungu ng'oti misota, nga bava mu bifo byaibwe eby'okwewogomamu, baira ye iwe Musengwa Katonda waife, nga badhugumira olw'okutya einho.

Okubala 11:12

Ti ninze eyatoola enda ni nzaala abantu abo, memale onkobe okubabbeedera mu kifuba ng'omulezi bw'abbeeda omwana ayonka. Era oti mbatwale mbatuuse mu nsi ye walayirira okugha badhaadha baibwe.

Matayo 25:16

Eyafuna talanta eitaanu yaja mangu ago yaadhisuubuza, yaazaazaamu talanta edhindi itaanu.

Ab'e Roma 10:11

Ebyaghandiikibwa bwe bikoba biti: “Kiisi amwikiriza taja kugemwa nsoni”,

Ab'e Roma 5:5

Eisuubi lino tirituswaza, kuba Katonda ayugha okugonza kwe mu myoyo gyaife ku lwa Mwoyo Mutukuvu ye twagheebwa.

Ab'e Roma 9:33

nga bwe kyaghandiikibwa kiti: “Bona ndi kuta mu Sioni eibaale eryekontolwaku abantu, olubaale olulibagwisa. Aye kiisi aikiriza oyo taliswazibwa.”

1 Petero 2:6

Kuba ebyaghandiikibwa bikoba biti: “Bona, ndi kuta mu Sioni eibaale, eibaale ery'oku nsonda lye nalonda era ery'omughendo einho, era oyo amwikiriza taliswazibwa.”

Okwolekebwa 3:9

“Kale abo abeesoloza okusinza Sitaani, abeeyeta Abayudaaya ate nga ti Bayudaaya, aye nga baguya, ndibaleeta mu maiso go, baakuba amakiryaivu gha bigere byo, bamanhe bati nkugonza.