Isaia 48:8 - Baibuli Ekibono kya Katonda 2014

⁸ Okuva eira n'eira timubiwulirangaku na matu gaimwe, waire okubimanhaku, kuba namanha nga mwefuulafuula, era ng'okuva lwe mwazaalibwa muli badheemu.

Isaia 48:8 ပူးပေါင်းရင်းမြစ်များ

Zabbuli 40:6

Emisengo, n'ebigheebwayo tobyegomba, era tosabangaku bigheebwayo byokebwa byonabyona kuwaagho, waire ebigheebwayo olw'okusoniyisa ebibi. Aye nze wampa amatu okukuwuliranga.

Zabbuli 51:5

Bona, nagwa mu nda ya maama nga ndi mu kibi; nazaalibwa nga ndi mwonooni.

Zabbuli 58:3

Ababi badaaliima okuviira irala nga bakaali na mu nda; basobya okuviira irala ku kuzaalibwa, nga boogera eby'obuguya.

Isaia 21:2

Mbonekeirwa akabi akaja okugwagho; mboine anhagulula ng'ali kunhagulula, naabona azikiriza ng'ali kuzikiriza. Iwe eigye ly'omu Elamu, ja olumbe, n'iwe eigye ly'e Media, ja ozingize omuzigu. Katonda aidha kumalagho okudaazibwadaazibwa kwonakwona Babiloni kw'aleeta.

Isaia 26:11

Wo Musengwa Katonda, iwe ogalwire omukono gwo okubabonereza, aye era ekyo tibakibona naire. Kale iwe babonereze obaswaze nga bwe weesoomera okukola abazigu bo. Balage nga bw'olumirwa abantu bo.

Isaia 33:1

Mukagwireku imwe abazikiriza banaimwe, ate nga imwe ghazira abazikirizangaku; n'imwe abaghemukira abantu ni mubeefuulaku ate nga imwe ghazira abaghemukirangaku n'abeefuulaku. Ekiseera kyaimwe eky'okuzikiriza bwe kiriwaaku, olwo mwena balibazikiriza; era ekiseera kyaimwe eky'okughemukira abantu nga mubeefuulaku bwe kiriwaaku, olwo mwena balibaghemukira baabeefuulaku.

Isaia 42:25

Kale kyeyava n'atumaliraku obusungu bwe, era n'atusindikira entalo. Yatutumbukizaaku obusungu bwe ng'oti muliro bwayaka mu Isiraeli mwonamwona, aye twaloba kumanha birigho, bwatwokya aye era twaloba kubaagho ni kye twegamu naire!

Isaia 46:8

Imwe abakozi b'ebibi, mwidhukire ekintu ekyo era mukirowoozeeku.

Isaia 47:11

Aye ebizibu birikwidhira ebikusinga amaani, akabi k'otalisobola kwetoolaku kaakutuukaku mu kaseera buseera, waatuuka ku kuzikirira kw'otasobola kwewonia.

Isaia 48:4

Namanha nga bwe muli ab'empwitu, abali n'emyoyo emibbalangafu ng'oti n'ekyuma ekigumu einho, era abali n'ebirowoozo ebikalangafu ng'oti n'ekyuma ky'ekikomo.

Isaia 48:7

Ebintu bino naakaja okubireetera okubaagho, tibibangaghooku naire. Olwo mulobe na kukoba muti mubaire mubiidhi.

Isaia 50:5

Musengwa Katonda yampa okutegeera, naaloba kudheema era naaloba kwira inhuma kumuvaaku.

Isaia 57:4

Imwe aboonooni era abaguya, naani ye muli kuleetaku omuzaanho? Naani ye muli kwasamizaaku eminwa okumusungiriza?

Yeremia 3:20

Aye imwe bwenebwene mwakyuka mwaloba kuba beesigwa ye ndi, ng'oti n'omukazi ava ku iba n'aloba okuba omwesigwa y'ali. Nze Musengwa Katonda, ninze nkobye.’

Yeremia 5:11

Abantu ab'omu Isiraeli n'ab'omu Buyudaaya, tibabaire beesigwa ye ndi naire. Nze Musengwa Katonda, ninze nkobye.”

Yeremia 5:21

Muwulire kino imwe abantu abasiru era abatategeera. Muli n'amaiso aye timubona, era muli n'amatu aye timuwulira.

Yeremia 6:10

Nze nairamu nti: “Ni baani be nnaayogera nabo ni bampulirisa mbalabule? Baakalangusa emyoyo gyaibwe, tibenda kuwulira by'okoba. Obukwenda bw'ontuma okubakobera babusekerera, baaloba kubusanhukira naire.

Hosea 5:7

Tibabaire beesigwa naire ye Musengwa Katonda era bazaire abaana abatali babe. Aye tibaabite mu Kibinuko eky'Okuboneka kw'Omwezi, baja kuzikirira beene ghalala n'enimiro dhaibwe.

Hosea 6:7

“Aye boona okufaananaku ni Adamu baamenha endagaano ye nakola nabo, baaloba kuba beesigwa ye ndi.

Hosea 7:9

aye tibaidhi ng'okwetabula n'abamaghanga agandi kubaleetera okuwaamu amaani, n'eighanga lyaibwe lyatuuka ku kuzikirira.

Malaki 2:11

Abantu b'omu Buyudaaya tibabaire beesigwa ye Katonda naire. Bakoze ebyenhinhalwa mu Yerusalemu, ni mu nsi Isiraeli yoonayoona. Bafumbiirwa abakazi abasinza bakatonda ab'amaghanga agandi. Mu nsambo eyo baayonoona obutukuvu bw'eisinzizo lya Musengwa Katonda ly'agonza.

Ab'Efeso 2:3

N'ife twenatwena twebisanga oti n'abo, mu kwegomba okw'omubiri nga tujiira ku kwenda okw'omubiri n'omwoyo, era okufaanana abantu boonaboona nga tuteekwa okubonerezebwa Katonda.

Amateeka Agokubiri 31:16

Musengwa Katonda yaakoba Musa ati: “Bona, oli kumpi kufa oje weeyimbe ku badhaadha bo. Aye ng'omaze okufa, abantu bano baidha kulekera agho okuba abeesigwa ye ndi. Baidha kumenha endagaano ye nakola nabo, banveeku, basinze emisambwa egy'omu nsi ye bali kuja okubangamu.

Amateeka Agokubiri 31:18

Bwenebwene ndibeegisaaku olw'ebibi bye bakoze nga bakyuka okusinza emisambwa.