Isaia 48:21 - Baibuli Ekibono kya Katonda 2014

²¹ Musengwa Katonda oyo bwe yali ng'ali kubisa abantu be mu irungu, endiwo tiyabagema naire; kuba yayatisa olubaale, amaadhi gaatiiriika nga gava mu lutanda olwo, atyo yaabagha amaadhi okuva mu lubaale olwo.

Isaia 48:21 ပူးပေါင်းရင်းမြစ်များ

Nehemia 9:15

Wabagha emere okuva mu igulu okubawonia endhala, era waabagha amaadhi okuva mu lubaale okubawonia endiwo. Waabakoba baje batoole ebiketezo bye wasuubiza okubagha, bibe ebyaibwe ku bwaibwe.

Nehemia 9:20

Wabagha omwoyo gwo omulungi gubagalagirenga eky'okukola. Tiwalekeraku kubaghanga mannu kulya, era waabaghanga amaadhi okubawonia endiwo.

Zabbuli 105:41

Yakuba olubaale lwayawuka, mwafukumukamu amaadhi, gaakuuluula mu irungu ng'oti mwiga;

Zabbuli 74:15

Wayatisa entanda mwavaamu enhindo dh'ensulo n'obwiga; ate waakaliiza emiiga egitakaliirangaku.

Zabbuli 78:15

Yayatisa embaale mu irungu, yaabafunira amaadhi ag'okunhwa kamaala ng'agava ku ntobo y'enhandha.

Zabbuli 78:16

Yakola emiiga gyakuuluula okuva mu lubaale yaaleetera amaadhi okukuuluula ng'oti mwiga gwene.

Zabbuli 78:20

Kituufu yakuba olubaale mwavaamu amaadhi gaatiiriika, n'emiiga gyakuuluula, gyabanda n'okubanda aye asobola okutufunira emere, oba okutufunira emamba ife abantu be?”

Okuvaayo 17:6

Nze ndidha kuba nga ndi eyo ku lusozi Horebu emberi waimwe. Oidha kukuba olubaale era amaadhi gaidha kuvaamu, abantu ge baghanga okunhwa.” Musa yaakola atyo ng'abakulu ab'ebikunsu mu Isiraeli babona.

Isaia 30:25

Ku lunaku ebimante ebigumu eby'abazigu baimwe lwe birigemwa era abazigu ni baitibwa kamaala, amaadhi amangi galiba gakuuluula nga gava ku nsozi dhoonadhoona endeeyi ni ku busozi bwonabwona obugulumivu.

Isaia 49:10

Endhala teribalumanga waire endiwo okubagemanga. Empewo ebabula teribafuuwanga waire omusana okubookyanga; kuba oyo abagemerwa ekivunika alibakulembera, yaabatuusa ku nsulo dh'amaadhi.

Yeremia 31:9

Abantu bange baliira nga bali kulira amaziga eno nga bwe basaba, nga nze ndi kubaiza ewaibwe. Ndibabisa eri obwiga obulimu amaadhi, era naababisa mu ngira entereevu baaloba kwekontola kugwa; kuba nze, ninze lata w'Abaisiraeli, era Efuraimu ni mutabane wange omuberi.”

Okubala 20:11

Era Musa yaagalula omukono yaakuba olubaale emikuzi ebiri n'omwigo gwe. Amaadhi amangi einho gaava mu lubaale olwo, abantu baanhwa n'ebyayo byaibwe.