Isaia 45:5 - Baibuli Ekibono kya Katonda 2014

⁵ Ninze Musengwa Katonda zenka, ezirayo Katonda wundi naire. Ndikugha amaani ge weetaaga, waire nga iwe tondidhi.

Isaia 45:5 ပူးပေါင်းရင်းမြစ်များ

1 Bakyabazinga 8:60

Olwo abantu ab'omu maghanga goonagoona ku nsi basobole okumanha nga Musengwa Katonda oyo Katonda, era nga ni Katonda yenka, ghazira wundi naire.

Ezera 1:2

“Kyabazinga Kuro ow'e Perusia akoba ati: Musengwa Katonda ow'eigulu, yampa obwakyabazinga bwonabwona obw'oku nsi, era ampaire obuvunaanizibwa okumuzimbira eisinzizo e Yerusalemu ekiri mu Buyudaaya.

Yobu 12:18

Avaalulula bakyabazinga ebivaalo eby'ekitiisa yaabafuula abairu, yaabasiba ebikerebetu.

Yobu 12:21

“Aleetera abakungu okunhoomebwa, ab'obukumu yaabamala amaani.

Zabbuli 18:31

Ghazira Katonda wundi okutoolaku Musengwa Katonda; ghazira lubaale lundi lwa kwewogomamu okutoolaku Katonda waife oyo.

Zabbuli 18:32

Katonda oyo n'ampa amaani era yantoolera mu ngira ebizibu,

Zabbuli 18:33

yangumya ebigere ku itaka ng'oti bya mpongo, era yangumiza irala eyo ghaigulu mu nsozi.

Zabbuli 18:39

Niiwe owampa amaani ag'okulwana olutalo olwo, abo abaanumba waabasuula ku itaka naabaniinaniinaku.

Zabbuli 86:10

Iwe oli mukologho, ni by'okola byewuunhisa; niiwe Katonda wenka.

Okuvaayo 9:14

Ku mukuzi guno nja kukubonereza nga nkusindikira ebibamba iwe mwene, n'abakungu bo, n'abantu bo abandi, olwo omanhe ng'ezirayo wundi ali ng'oti ninze Musengwa Katonda, mu nsi yoonayoona.

Isaia 22:21

naamuvaaza ekivaalo kyo eky'obukulu bw'oliku, naamusiba n'olusibiro lwo, era naamugha n'obuyinza bw'obaire oli nabwo. Aliba ng'oti ni lata ow'abatyamye b'omu mu Yerusalemu era ow'Abayudaaya boonaboona.

Isaia 37:20

Wo Musengwa Katonda waife, mpegaano ni tukweghembye tuwonie, otutoole mu ngalo edh'Abassiria. Olwo abantu abamaghanga agandi boonaboona basobole okumanha nga iwe, Musengwa Katonda, niiwe Katonda wenka.”

Isaia 43:10

Imwe Abaisiraeli niimwe abadhulizi bange era niimwe abagheereza bange be nalondamu, musobole okuumanha era mundhikirize. Olwo mukitegeere nga ninze Katonda zenka. Tebangayooku katonda yansooka kubaagho, era tighalibaagho alindhiririra naire.

Isaia 44:6

Musengwa Katonda Afuga Amagye, Kyabazinga era Omununuzi wa Isiraeli, akoba ati: “Ninze entoolo era ninze enkomerero, era nze zenka, ninze Katonda. Ezirayo kyetebwa katonda okutoolaku nze zenka.

Isaia 44:8

Mutatya era mutawaamu maani. Mukiidhi bukalamu ng'okuva eira n'eira n'okutuusa ye buli eno, mbairenga mbakobera ebiribaagho. Era niimwe abadhulizi bange. Ate eriyo ekyetebwa katonda okutoolaku nze? Ninze zenka ali ng'oti n'olubaale mwe mwewogoma, ezirayo wundi ye ndidhi.”

Isaia 45:1

Musengwa Katonda yalonda kyabazinga Kuro, yaamutuma okughangula amaghanga, n'okutoola ku bakyabazinga obukumu. Musengwa Katonda alimwiguliragho emiryango gy'ebibuga, ghaaloba kubaagho agiigalagho. Musengwa Katonda akoba Kuro oyo ati:

Isaia 45:6

Kino nkikoze, abantu boonaboona okuva e buvandhuba okutuuka e bugwandhuba, basobole okumanha nga ninze Musengwa Katonda zenka, ezirayo Katonda wundi naire.

Isaia 46:9

Mwidhukire ebyaligho mu biseera eby'eira, mumanhe nga ninze Katonda zenka, ezirayo wundi; era ezirayo ali ng'oti ninze.

Isaia 47:8

Kale ni wulira kino, iwe ayenda einho amasanhu: Oja waatyama waasiira n'enkondo, waakoba mule oti, ‘Ninze aligho, ezirayo wundi okutoolaku nze. Nze tija kuba namwandu, waire okufiirwaku abaana.’

Ezekieli 30:24

Olwo naaleetera emikono gya kyabazinga w'e Babilonia okuba egy'amaani era naamuta mu ngalo empiima yange. Aye naamenha emikono gya kyabazinga wa Misiri, yaasindira mu maiso ga kyabazinga ow'e Babilonia ng'oti n'omuntu afumitiibwa ebibwa ebija okumwita.

Yoeli 2:27

Olwo imwe Abaisiraeli mulimanha nga nze mba mu imwe, era nga nze Musengwa Katonda, ninze zenka Katonda waimwe, ezirayo wundi. Abantu bange tibaliirayo kabiri kuswazibwa.”

Yoanne 1:1

Mu kwinhama kwa byonabyona Kibono yali ng'aligho era Kibono ng'aba ghalala ni Katonda era Kibono nga ni Katonda.

Amateeka Agokubiri 32:39

Mpegaano ni mukimanhe, nga nze, era Nze zenka, ni Nze Katonda; ezirayo katonda wundi okutoolaku Nze. Ninze aita, era ninze agha obulamu. Nfumita era naawonia; ghazira asobola kuntoolaku kiri mu buyinza bwange.

Amateeka Agokubiri 4:35

Ebyo Musengwa Katonda yabibooleka, musobole okumanha nga mwene ni Katonda yenka, ezirayo wundi.

Amateeka Agokubiri 4:39

Kale ni mukimanhe olwaleero era mukikuume mu myoyo gyaimwe muti Musengwa Katonda, ni Katonda mu igulu ni mu nsi. Ezirayo wundi.