Isaia 43:2 - Baibuli Ekibono kya Katonda 2014

² Bw'olibita mu maadhi agenda okukumira, ndiba ghalala n'iwe. Ni bwe galiba ag'emiiga tigalikweyaagho. Ni bw'olibita mu muliro tigulikwokya, ezira kabi kalikutuukaku;

Isaia 43:2 ပူးပေါင်းရင်းမြစ်များ

Yobu 5:19

Aidha kukuwonianga mu bizibu byonabyona; buliidho tootuukibwengaku kabi koonakoona.

Zabbuli 23:4

Era ni bwemba nga ndi kutambulira mu kikonko ekiidhwire enzikiiza etiisa ng'oti kufa, ezira kibi kye ntyamu, kuba iwe oli ninze. Mpulira emiraala bw'oba ng'ogemye omwigo gwo ogunkuuma, era ng'ogemye n'ogwo ogundholeka engira.

Zabbuli 32:6

Kyenva ni nkoba kiisi akutya, akusabenga mu biseera eby'enaku, olwo ebizibu ebyekuluumulula ng'oti mwiga gwa mwidhuzo lwe bitalimutuukaku.

Zabbuli 66:10

Iwe Katonda waife, watugezesa, waatwekebeedha ng'oti ni feeza bw'alongoosebwa.

Zabbuli 66:12

Waleka abantu baatuniina mu mitwe; twabita mu bizibu ebyokya ng'oti muliro. Twabita ni mu bizibu ebingi ng'oti maadhi ga mwidhuzo. Aye buti watutuusa aghalungi.

Zabbuli 91:15

Bw'anandhetanga ndidha kumuvugiranga; ndidha kubanga ghalala naye mu buli kizibu. Mmuwonienga ebimunhigiriza, era mmugheesenga ekitiisa.

Okuvaayo 14:29

Aye nga Abaisiraeli baabita mu nhandha nga batambulira ku itaka ikalu, ng'amaadhi geebunze ku mbali ni ku mbali ng'oti bimante.

Okuvaayo 3:12

Agho Katonda yaamusuubiza ati: “Ndidha kubanga n'iwe, era kano kalikubeera akamanhiso, okwoleka nga ninze nkutumye: bw'olimala okutoola abantu abo mu Misiri, mulinsinziza ku lusozi luno.”

Isaia 29:6

nze Musengwa Katonda Afuga Amagye ndibalwanirira, nga nkozesa okutyabuka kw'olukuba okw'amaani, era nga ntengeesa ensi ni musisi. Era ndikozesa n'empewo eyeezungulula n'amaani, naakozesa n'enimi edh'omuliro oguzikiriza kiisi kiri mu ngira yaagwo.

Isaia 30:27

Bona ere, obuyinza n'ekitiisa kya Musengwa Katonda biri kwidha, waire nga bikaali ghalaku. Omwosi ghalala n'omuliro, byoleka obusungu bwe obubitirivu. Bw'ayogera, ebyo by'ayogeire byokya ng'oti bwa muliro gwene oguzikiriza.

Isaia 41:10

Otatya, kuba nze ndi ghalala n'iwe. Oteeraliikirira, kuba nze ninze Katonda wo. Ndidha kukuyamba nkughe amaani, era nkulwanirire nkuleetere okughangula.

Isaia 41:14

Musengwa Katonda Omununuzi wo era Omutukuvu wo, iwe Isiraeli ninze nkoba ati: Otatya, waire ng'oli mugoogombe era omunafu ng'oti lugereegere. Nze ndidha kukuyamba.

Isaia 43:5

Otatya, kuba nze ndi ghalala n'iwe. Ndisoloza abantu bo nga mbatoola e buvandhuba n'e bugwandhuba, naabaiza ghalala.

Yeremia 42:11

Mulekere agho okutya kyabazinga w'e Babilonia. Nze ndi n'imwe era ndidha kubatoola mu ngalo dhe mbawonie.

Yeremia 46:28

Ndi ghalala n'imwe era ndidha kubalokola. Ndidha kuzikiriza amaghanga goonagoona ye nabasansaaniza. Aye imwe tija kubazikiriza. Waire nga tija kubaleka buleke agho nga tibabonereiza, aye era ndibabonereza ekigwaniire nga mbasaasira. Nze Musengwa Katonda, ninze nkobye.”

Danieli 3:23

Abasaadha abo bonsatule Shaduraka, ni Meshaki, ni Abedinego, baagwa mu kikoomi ekiri kugeigera omuliro nga basibe.

Haggai 1:13

Haggai oyo yaakobera abantu obukwenda bwa Musengwa Katonda ati: “Musengwa Katonda akoba ati, ‘Ndidha kubanga ghalala n'imwe.’ ”

Zekaria 13:9

Era abo abaliba mu kitundu ekyo ekirala ndibatukuza ng'oti ni feeza bwe bamukenenula mu muliro, era naabagezesa ng'oti ni zaabu bwe bamugezesa. Balinsaba, era zeena naabairamu. Ndibeeta bantu bange, era boona bandheta Katonda waibwe.”

Malaki 4:1

Musengwa Katonda Afuga Amagye akoba ati: “Olunaku luli kwidha abo abeetwala okuba aba ghaigulu n'abakozi ab'ebibi, lwe baliya ng'oti isubi ikalu. Ku lunaku olwo baliya ensaga n'emizi, okutuuka okuweekereragho.

Matayo 1:23

“Bona, omughala omwegha aja kutoola enda azaale omwana wa bulenzi, era eriina balimweta Emmanueli”, ekitegeeza kiti: “Katonda ali n'ife.”

2 Timotheo 4:17

Aye Musengwa yali ninze, era yampa amaani naakobera mu bwidhuvu abamaghanga agandi ekibono kya Katonda, baakiwulira. Olwo yamponia okunsalira ogw'okufa.

2 Timotheo 4:22

Musengwa abe n'omwoyo gwo. Enkabi dha Katonda dhibe n'imwe mwenamwena.

Abaheburayi 11:29

Okwikiriza n'okwasobozesa Abaisiraeli okubita mu Nhandha Emyufu nga bali ng'oti babita ku bukalu, aye Abamisiri bwe baagezaaku baadimira.

Yoshua 1:5

Ndidha kubanga n'iwe buliidho nga bwe nabanga ni Musa. Tija kukulekulira agho naire. Ezira muntu aja kukughangula, enaku dhoonadhoona dh'olimala ng'oli mulamu ku nsi.

Yoshua 1:9

Oteerabira kye nkulagiire nti: Banga mumalirivu era atatya, otatiribiranga oba okuwaamu amaani, kuba Nze Musengwa Katonda wo ndidha kubanga n'iwe buli gh'oja.”