Isaia 41:17 - Baibuli Ekibono kya Katonda 2014

¹⁷ Abantu bange abaavu n'abali mu bwetaavu, bwe balinoonia amaadhi ni gababula, amamiro ni gatuuka n'okubakala olw'endiwo, nze Musengwa Katonda ndiiramu okusaba kwaibwe nze Katonda wa Isiraeli tiribalekulira agho.

Isaia 41:17 ပူးပေါင်းရင်းမြစ်များ

Amainhama 28:15

Bona, ndi n'iwe, ndidha kukukuumanga yoonayoona y'onaajanga, era ndidha kukwiza mu nsi eno; tirikulekulira agho, okutuusa nga mmaze okutuukiriza ebyo bye nkukobye.”

1 Bakyabazinga 17:8

Agho Musengwa Katonda yaakoba Eliya ati:

2 Ebyomubyanda 6:17

Wo Musengwa Katonda, iwe Katonda wa Isiraeli, nkweghembye ni, ganha ekyo kye wasuubiza omugheereza wo Daudi kituukirire.

Zabbuli 22:15

Amaani gankaze ng'oti n'olujo olukalanga, olulimi lwaneesibira ku kibuno naasigala agho mu nkungu ng'omufu.

Zabbuli 34:6

Omuntu omunaku Musengwa Katonda amuwulira yaamuwonia, yaatoolagho ebizibu bye byonabyona.

Zabbuli 37:25

Okuva mu buto, buti nkairiighe, aye tibonangaku nga Musengwa Katonda alekulira agho omutuufu, waire okubona ng'abaana ab'omutuufu basabiriza.

Zabbuli 42:2

Ng'omuntu ali n'endiwo bw'aba, zeena ntyo bwe nhenda einho okuba iwe Katonda wange gh'oli, Katonda iwe omulamu. Ndituukaku li mu maiso go ni nkubona?

Zabbuli 50:15

Munsabenga nga muli mu bizibu, ndidhanga kubawonia, imwe muntengamu ekitiisa.”

Zabbuli 74:21

Otaganha abo abazira bwogerero kuswazibwa; yamba abaavu n'abali mu bwetaavu basobole okusaaka eriina lyo.

Zabbuli 94:14

Musengwa Katonda taja kusuulirira bantu be; taja kulekulira agho ighanga lye yeerondera.

Okuvaayo 17:3

Aye abantu olw'okuba baali ndiwo, nga bazira maadhi ga kunhwa, baaja mu maiso n'okwemuluguunhiza Musa nga baamukoba bati: “Lwaki watutoola e Misiri okutwisa endiwo, ife n'abaana baife, n'ensolo dhaife?”

Okuvaayo 17:6

Nze ndidha kuba nga ndi eyo ku lusozi Horebu emberi waimwe. Oidha kukuba olubaale era amaadhi gaidha kuvaamu, abantu ge baghanga okunhwa.” Musa yaakola atyo ng'abakulu ab'ebikunsu mu Isiraeli babona.

Isaia 30:19

Imwe abantu ababa mu Yerusalemu, timukairamu kabiri kulira maziga. Oluliba okulira muti, nga Musengwa Katonda abagemerwa kivunika ng'awuliire okulira kwaimwe, ng'abagha kye mumusabye.

Isaia 42:16

Ndikulemberamu abatulu, naababisa mu ngira dhe bataidhi. Enzikiiza ye balimu ndigifuula butangaavu, naasaania aghali ebikonko, baabita aghatereevu. Ebyo ndibibakolera, era tiribalekulira agho.

Isaia 43:20

Ensolo edh'omu nsiko dhirintaamu ekitiisa, n'ebibe ni maaya byansaaka; olw'okuba ntaagho emiiga mu nsi enkalukalu naaleetera amaadhi okuba mu irungu, olwo naagha abantu bange be nalondamu okunhwa.

Isaia 44:3

Ndireeta amaadhi gaagwa mu nsi eziramu waire itondo lya maadhi, era naata emiiga mu itaka eryakala. Ndireeta omwoyo gwange gwaika ku baana baimwe, era naayugha enkabi dhange ku baidhukulu baimwe.

Isaia 48:21

Musengwa Katonda oyo bwe yali ng'ali kubisa abantu be mu irungu, endiwo tiyabagema naire; kuba yayatisa olubaale, amaadhi gaatiiriika nga gava mu lutanda olwo, atyo yaabagha amaadhi okuva mu lubaale olwo.

Isaia 49:10

Endhala teribalumanga waire endiwo okubagemanga. Empewo ebabula teribafuuwanga waire omusana okubookyanga; kuba oyo abagemerwa ekivunika alibakulembera, yaabatuusa ku nsulo dh'amaadhi.

Isaia 55:1

Musengwa Katonda akoba ati: “Mwidhe mwenamwena abali endiwo, mwidhe aghali amaadhi. N'imwe abazira mpiiya mwidhe, mugule emere mulye. Mwidhe mugule omwenge ogw'emizabbibu n'amata aghazira kusasula naire.

Isaia 58:11

Nze Musengwa Katonda mwene ndibakulemberangamu buli kaakyeire, naabagha ebirungi ebibamala obukalamu era naabaleetera okuba abagumu era ab'amaani. Mulibanga ng'oti n'enimiro ye bafukirira amaadhi, era ng'oti n'ensulo y'amaadhi etakala.

Isaia 61:1

Omwoyo gwa Musengwa Katonda gundiku, kuba yansiiga omuzigo, yantuma okukobera abadaazibwadaazibwa amawulire amalungi. Yantuma okugumya abaawaamu emyoyo, n'okulangirira eri abali mu bunhage nti baidha kulekulwa babe ba idembe, n'abasibe nti baidha kusibulwa mu ikomera.

Isaia 62:12

Mulyetebwa “Bantu batukuvu,” era “Abantu aba Musengwa Katonda abaanunulwa.” N'iwe Yerusalemu olyetebwa “Kibuga Katonda ky'ayenda,” era “Kibuga Katonda ky'atalekulirangaku agho.”

Isaia 65:13

Kale ni, nze Musengwa Katonda nkoba nti, abo abansinza balirya era baanhwa, aye imwe endhala eribaluma n'endiwo yaabagema. Beene balisagamba, aye imwe muliswazibwa.

Isaia 65:24

Banaabanga bakaali na kundheta nga nabawuliire ira, era banaajanga okumala okunsaba nga nabaizeemu ira.

Isaia 66:2

Ebintu byonabyona ninze nabikola n'engalo dhange. Kale byonabyona byange. Aye omuntu ye nsangaalira n'oyo omuwombeefu era eyeeneniiza, antaamu ekitiisa era n'akola bye ndagira.”

Yeremia 31:25

Ndiizaamu amaani abo abakooye, era naigusa emere abo boonaboona abaanafugha olw'endhala.

Okulira 4:4

Baleka abaana baibwe enimi dhaabakalira mu kanwa mwaibwe olw'endiwo ey'amaadhi; abaana baasaba emere aye ghaabula agibagha.

Ezekieli 47:8

Agho yankoba ati: “Amaadhi ago gakuuluula nga gaja mu biketezo eby'e buvandhuba ebiri mu kiiko ekirimu omwiga Yorudani. Bwe gatuuka mu maadhi ag'omu nhandha, galongoosa amaadhi ago ag'omu nhandha gaafuuka malungi.

Matayo 5:3

“Ba nkabi abaavu mu mwoyo, kuba Obwakyabazinga obw'omu igulu bwaibwe.

Matayo 5:6

Ba nkabi abalumwa endhala n'endiwo ey'okukola ebituufu, kuba baliigusibwa.

Luka 16:24

Agho yaayeta ati, ‘Aburahamu lata, nsaasira otume Lazaro ainhike olwala lwe mu maadhi, aidhe ampozewozeeku olulimi, kuba ndi kulumizibwa inho eno mu muliro.’

2 Ab'e Korintho 12:9

Aye yandhiramu ati: “Ekisa kyange kikumala, kuba amaani gange gabonekera mu bunafu bwo.” Kale kinsangaaza inho okwesaaka olw'obunafu bwange, amaani ga Kurisito gabe mu nze.

Okwolekebwa 21:6

Era yankoba ati: “Biwoire! Ninze Alufa ni Omega, entoolo n'enkomerero. Kiisi ali ndiwo ndimugha yaanhwera ku bwereere ku nsulo ey'amaadhi ag'obulamu.

Okwolekebwa 22:17

Mwoyo n'Omugole bakoba bati: “Idha!” N'oyo awulira bino akoba ati: “Idha!” Kiisi ali ndiwo aidhe, era kiisi ayenda maadhi ga bulamu, agafune aghazira kusasula.