Isaia 30:22 - Baibuli Ekibono kya Katonda 2014

²² Olwo mulitoola ebifaananie byaimwe ebibaadhe bye mwalimbyaku feeza, n'ebyo bye mwakola mu zaabu, mwabisuula ere ng'ebintu ebitali birongoofu, nga mukoba muti: “Muje ere, era timwiranga!”

Isaia 30:22 ပူးပေါင်းရင်းမြစ်များ

2 Ebyomubyanda 31:1

Ebyo byonabyona nga biwoire, Abaisiraeli boonaboona abaaligho baaja mu bibuga bya Buyudaaya, baamenhamenha empango edh'amabaale, baasimulagho ebifaananie eby'omusambwa omukazi Ashera n'ebifo ebigulumivu eby'okusinzizaamu, ni alutaari. Baaja baakola batyo mu biketezo ebindi byonabyona ebya Yuda, n'ebya Benjamini, n'ebya Efuraimu, n'ebya Manasse, okutuusa lwe baabizikiriza byonabyona. Agho abantu boonaboona bairayo mu bibuga byaibwe, buli muntu mu kibandha kye.

Isaia 27:9

Aye Abaisiraeli balisoniyibwa ebibi byaibwe, nga bamaze okumenhamenha alutaari dh'emisambwa n'okusekulasekula amabaale gaadho ni gafuuka ensaano. Era nga bamaze okukomya okuniokezanga obubbaani ku alutaari edho, era nga basaaniizaagho kiisi kamanhiso akooleka omusambwa omukazi Ashera.

Isaia 31:7

Ku lunaku olwo, mwenamwena mulisuula ere ebisinzibwa ebitali Katonda ebya feeza ni zaabu, imwe beene bye mwekolera ebibaleetera okukola ebibi.

Isaia 40:19

Tali ng'oti n'ekisinzibwa ekitali Katonda omukozi ky'ayiiya obuyiiye, ate omugheesi w'ebintu bya zaabu n'akirimbyaku zaabu, era n'akitaaku ebintu ebiri ng'oti ndhegere dha feeza.

Isaia 46:6

Abantu baja baafukumula mu nsawo dhaibwe zaabu, baapima ni feeza ku minzaani. Olwo baasasula omugheesi era baalagira ebintu ebyo abigheeseemu ekifaananie eky'omusambwa, era baamala baakikubira amakiryaivu baakisinza.

Okulira 1:17

Ekibuga Sioni kiri ng'oti n'omuntu agoloire omukono ng'ali kusabiriza, aye ghaabula amusaasiraku. Musengwa yalagira abantu abeezungulwire abantu ba Yakobo boonaboona, babe bazigu baibwe. Yerusalemu kyafuuka ekyenhinhalwa eri abantu abo.

Ezekieli 14:6

“Kale ni kobera ab'eighanga Isiraeli oti nze Musengwa Katonda ndi kubakoba nti: Mwenenie, mukyuke muve mu kusinza ebitali nze Katonda. Mukyuke muve ku ebyo byonabyona ebyenhinhalwa bye mujiiraku.

Ezekieli 18:6

Atasinza ebyo ebitali nze Katonda ab'eighanga Isiraeli bye basinza, era atalya ku misengo gye bagheerayo mu masabo ku nsozi. Atasendasenda muka beene n'aba naye mu buliri, era ataba mu buliri na mukazi ng'ali mu biseera bye eby'okulwala.

Ezekieli 36:31

Agho muliidhukira empisa dhaimwe edhaali embi n'ebikolwa byaimwe ebyali ebibi. Olwo mwekyagha olw'ebibi byaimwe n'olw'ebikolwa ebyenhinhalwa bye mwakola.

Ezekieli 7:19

Balisuula ere feeza waibwe mu nguudo, baasuula n'ere zaabu waibwe ng'oti n'ekintu ekitagasa naire kuba feeza ni zaabu tibirisobola kubanunula ku lunaku Musengwa Katonda lw'aliragiraku obusungu bwe. Era tibirisobola kubaigusa mu kwegomba kwaibwe waire okubaigusa ni bibamalaku endhala okubaluma, kuba byene ebyo n'ebyabaleeteranga okwekontola ni bagwa mu kwonoona.

Ezekieli 7:20

Ebyamadholobera byaibwe ebyabonekanga obulungi era nga bibeeyagaza, baabigheesaamu bwa bifaananie ebyenhinhalwa ebiziramu muganhulo naire. Kale ni, Musengwa Katonda kyaviire n'abireetera okubafuukira ebitali birongoofu.

Hosea 14:8

Abaisiraeli tibaliirayo kabiri kusinza ebitali Katonda. Ndidha kubaghanga kye banansabanga, era ndidha kubalabiriranga. Ndidha kubateerangagho ekinsense ng'oti n'omuti ogutawaawuza makaba. Ninze ensimuko ey'ebirungi byonabyona bye bafuna.”

Abalevi 13:52

Kabona anaakyokyanga, kuba eyo n'endwaire ey'ebigenge. Eteekwa okuzikirizibwa.

Zekaria 13:2

Nditoola mu nsi Isiraeli ebisinzibwa ebitali Katonda, ghalobe kubaagho muntu abiidhukira waire okwidhukira amaina gaabyo. Nditoolagho n'abo boonaboona abeeyeta abalanzi, era naatoola ni mu bantu omwoyo ogwenda okusinza ebitali Katonda.

Matayo 4:10

Agho Yesu yaamukoba ati: “Sitaani ja ere! Kuba kyaghandiikibwa kiti, ‘Osinzanga Musengwa Katonda wo, era ni yenka y'ogheerezanga.’ ”

Amateeka Agokubiri 7:25

Mwokyenga n'omuliro ebifaananie ebibaadhe eby'emisambwa gyaibwe. Muteegwanizanga feeza waire zaabu abiriku, era mutamutwalanga, olwo alobe kubafuukira imwe mutego, kuba okusinza ebitali Katonda kiba ekyenhinhalwa eri Musengwa Katonda.

Okwolekebwa 19:20

Ekisolo kyagemebwa ghalala n'omulanzi omuguya eyakola ebyewuunhio mu maiso gaakyo. Ebyewuunhio ebyo bye yakozesa okuguya abo abaaganha okuteebwaku akamanhiso k'ekisolo era n'okusinza ekifaananie kyakyo. Ekisolo ekyo ghalala n'omulanzi omuguya, bombi baasuulibwa mu nhandha ey'omuliro n'obunhota bwa salufa nga balamu.